Osy jyldar ishinde KGIR ózin Qazaqstan men halyqaralyq ınvestısııalyq qoǵamdastyq arasyndaǵy yntymaqtastyqty nyǵaıtý úshin tıimdi dıalog alańy retinde kórsete aldy.
Bıyl kún tártibine ınnovasııalyq tehnologııalardy paıdalaný, azyq-túlik qaýipsizdigin qamtamasyz etý, kólik-logıstıkalyq áleýetti damytý, eksporttyq múmkindikterdi keńeıtý jáne t.b. máseleler usynylǵan.
Is-sharaǵa Ulybrıtanııa, Vetnam, Germanııa, Kanada, Qatar, Qytaı, BAÁ, Saýd Arabııasy, AQSh, Túrkııa, Fransııa, Chehııa jáne basqa da birqatar el ókilderi keldi.
Premer-mınıstr óz sózinde atap ótkendeı, Ortalyq Azııadaǵy sheteldik ınvestısııalardyń 70%-y Qazaqstanǵa tıesili.
«О́tken jyly tikeleı sheteldik ınvestısııalardyń jalpy kólemi 18%-ǵa ósip, $28 mlrd-qa jetti. Bıylǵy 6 aıda ulttyq ekonomıkaǵa taǵy $14 mlrd-qa jýyq tikeleı sheteldik ınvestısııalar tartyldy. Elimizdiń táýelsiz kredıttik reıtıngisiniń turaqtylyǵyn Fitch, S&P jáne Moody's halyqaralyq agenttikteri rastap otyr», dedi Álıhan Smaıylov.
Úkimet basshysy Prezıdent Qasym-Jomart Kemeluly Toqaev bıylǵy Qazaqstan halqyna Joldaýynda jańa ekonomıkalyq modelge kóshý qajettigin jarııalaǵanyn eske saldy. Atap aıtqanda, Úkimet aldyna 2029 jylǵa qaraı ekonomıka kólemin $450 mlrd-qa deıin, ıaǵnı 2 esege arttyrý boıynsha aýqymdy mindet qoıyldy.
«Investısııalardy tartý ekonomıkamyzdyń ósýiniń negizgi faktory bolyp tabylady. Ulttyq ınvestısııalyq saıasat sheńberinde ESG standarttaryn eskere otyryp, Qazaqstan 2029 jylǵa deıin keminde $150 mlrd sheteldik ınvestısııa tartýǵa múddeli. Sol úshin biz ınvestorlarǵa qolaıly jaǵdaılar jasaýdy, onyń ishinde ınvestısııalardy qoldaý quraldaryn jetildirýdi odan ári jalǵastyramyz», dedi Premer-mınıstr.
Máselen, kásipkerlik qyzmet salasynda bızneske qoıylatyn artyq talaptardy alyp tastaýdy kózdeıtin jańa retteýshi saıasat engizilip jatyr. Táýekelderdi basqarý júıelerin avtomattandyrý nátıjesinde 1 qańtardan bastap tekserýler adamı faktorsyz taǵaıyndalatyn bolady. Jańa Salyq kodeksinde óńdeýshi sektordy damytý boıynsha erekshe sharalar kózdelip otyr.
Sonymen qatar shaǵyn jáne orta kásipkerlikti qoldaýdyń jańa keshendi baǵdarlamasy ázirlenýde. Otandyq ónerkásipti damytý úshin satyp alýlarda offteık-kelisimsharttardyń úlesin 10%-ǵa deıin jetkizý josparlanyp otyr. Injenerlik-kommýnaldyq júıelerdi jańǵyrtý maqsatynda «Tarıfti ınvestısııaǵa aıyrbastaý» baǵdarlamasy iske asyrylýda, onyń aıasynda aldaǵy 6 jylda 3 trln teńgege jýyq ınvestısııa tartý kózdelip otyr.
«Jobalardy sapaly ınfraqurylymmen qamtamasyz etý úshin 2029 jylǵa deıingi Ulttyq ınfraqurylym jospary ázirlenip jatyr. Kúrdeli munaı-gaz jobalaryna ınvestısııalardy tartý maqsatynda bıyldan bastap Jaqsartylǵan modeldik kelisimshart aıasynda qarjylaı yntalandyrý mehanızmi engizildi. Basym salalardaǵy quny $50 mln-nan asatyn ınvestısııalyq jobalar úshin 25 jyl ishinde Qazaqstan zańnamasynyń turaqtylyǵyna kepildik beretin Investısııalar týraly kelisim bekitý múmkindigi bar. Búginde jalpy quny $1,5 mlrd-ty quraıtyn 6 ınvestısııalyq kelisimge qol qoıyldy», dedi Álıhan Smaıylov.
Oǵan qosa Qazaqstanda $500 mln-nan astam somany ınvestısııalaý kezinde 10 jylǵa salyq zańnamasynyń turaqtylyǵyna kepildik beretin Investısııalyq mindettemeler týraly kelisim engizildi.
«Jobalarǵa tıimdi monıtorıng júrgizý jáne iske asyrýdy baqylaý maqsatynda ınvestısııalyq jobalardyń Jalpyulttyq pýly quryldy. Oǵan $69 mlrd-tan astam somany quraıtyn 1 000-ǵa jýyq joba kirdi», dedi Premer-mınıstr.
Ol sondaı-aq eksport pen ımportty almastyrýǵa baǵyttalǵan tereń óńdeý klasterlerin damytý úshin 20-dan astam asa iri jobany iske asyrý boıynsha jumystar júrgizilip jatqanyn aıtty. Sonymen qatar barlyq memlekettik organdardyń ınvestısııalyq jobalar tartý jáne iske asyrýdyń biryńǵaı onlaın júıesine ıntegrasııalanýyn qamtamasyz etetin Ulttyq sıfrlyq ınvestısııalyq platforma qurylady.
Álıhan Smaıylov búginde 83 eldiń azamattary Qazaqstanǵa vızasyz kele alatynyn, al 109 memlekettiń rezıdentteri úshin elektrondyq vızalar resimdeý qoljetimdi ekenin eske saldy. Buǵan qosa erekshe ınvestorlyq vızalar qarastyrylǵan. Sondaı-aq elde bıznes úshin óńirdegi teńdesi joq qyzmetterdi usynatyn biregeı bıznes alańy – «Astana» halyqaralyq qarjy ortalyǵy jumys isteıdi.
«Bul qadamdardyń barlyǵy eldiń ınvestısııalyq áleýetin ashýǵa jáne naqty nátıjelerge qol jetkizýge baǵyttalǵan. Qazaqstan álemdik standarttarǵa sáıkes ınvestısııalyq klımatty odan ári arttyrý úshin bar kúshin salady. Sondaı-aq ınvestorlardyń suranystaryna sáıkes qosymsha kerekti qoldaý sharalaryn turaqty túrde engizetin bolamyz. Osy múmkindikterdi paıdalana otyryp, Qazaqstan ekonomıkasyna belsendi ınvestısııa salýǵa shaqyramyz», dep túıindedi sózin Premer-mınıstr.
