«Ult densaýlyǵyn bekemdeý máselesi de óte ózekti. Barlyq jas sanaty arasynda buqaralyq sport túrlerin nasıhattaı berý kerek. Balalar úshin sporttyq ınfraqurylymnyń barynsha qoljetimdi bolýyn qamtamasyz etý mańyzdy. Buqaralyq sportty damytý – pıramıdaǵa aınalýy qajet. Onyń basyna chempıondar shyqsa, onyń negizinde biz saý ári sanaly urpaqty, myqty ultty qalyptastyramyz. Olardyń jarqyn bolashaǵy úshin úıirmelerdi úılestirýdi tapsyramyn», degen Qasym-Jomart Kemeluly buqaralyq sportty, ónerdi damytýǵa arnalǵan keshendi baǵdarlama qabyldaý máselesin aıtqan bolatyn.
Halyqty sportqa tartý, ulttyq qundylyqtardyń qunyn quldyratpaı baǵalaýǵa beıimdeý jáne ony mıllıondaǵan halyq úshin qoljetimdi etý maqsatynda 2021 jyldyń 1 mamyrynan bastap búkil elde memlekettik sport pen shyǵarmashylyq tapsyrystardy jan basyna shaqqandaǵy qarjylandyrý tetigi iske qosyldy.
Búginde el terrıtorııasynda tutas ıgi bastamaǵa aınalǵan mıssııany bas qalanyń Dene shynyqtyrý jáne sport basqarmasy da iske asyryp otyr.
Megapolıstegi myńdaǵan balanyń belin býyp, úıreteri kóp úıirmelerge tartý máselesi sheshimin tapqan. Yntasy bar kez kelgen astanalyq tegin sporttyq, shyǵarmashylyq baǵyttaǵy úıirmelerge qatysyp sheberligin shyńdaı alady.
Bas qalada bul baǵytta atqarylyp otyrǵan sharalardy Astana qalasynyń Dene shynyqtyrý jáne sport basqarmasynyń buqaralyq sport bóliminiń basshysy Azamat Agzamovtan surap, bildik.
«2023 jyldyń qańtaryna deıin memlekettik shyǵarmashylyq jáne sporttyq tapsyrysty iske asyrý artsport.kz «SoftDeCo» JShS platformada júzege asyryldy. 2023 jylǵy 1 qańtardan bastap jergilikti atqarýshy organdarǵa Baǵdarlamany iske asyrý úshin platformany tańdaý múmkindigi boıynsha ókilettikter berildi. О́tkizilgen Memlekettik satyp alý konkýrsynyń nátıjeleri boıynsha 2023 jylǵy mamyrdan bastap memlekettik sporttyq tapsyrysty iske asyrý damubala.kz. saıty arqyly qoljetimdi», dedi Azamat Agzamov.
Astanalyq búldirshinder úshin shaharda sporttyń 30 túri boıynsha 945 seksııa jumys isteıdi.
Turǵyndar tarapynan eń kóp tańdalatyn tanymal seksııalar: shahmat, dzıýdo, fýtbol jáne kórkem gımnastıka.
«Ákimdik 2024 jylǵa memlekettik sporttyq tapsyrysty iske asyrý úshin 26 000 vaýcher ashty. Sonymen qatar, búgin, 29 qarasha, balalardy sport seksııalaryna jazý úshin kezek ashyldy. 30 qarasha saǵat 00.00-de kezekke tirkelý aıaqtalady. Tegin úıirmelerge tirkelý týraly tolyq aqparat Damubala.kz saıtynda qoljetimdi», dep túsindirdi ol.
Aıta keteıik, DamuBala.kz 4 pen 17 jas aralyǵyndaǵy balalarǵa arnalǵan jan basyna shaqqanda normatıvtik qarjylandyrý baǵdarlamasy boıynsha úıirmelerdi izdeý jáne olarǵa jazylýǵa arnalǵan platforma. Júıege tirkelý arqyly balańyzdy ózińizdiń turǵylyqty ornyńyzǵa jaqyn jerde ornalasqan sporttyq, shyǵarmashylyq baǵyttaǵy tegin úıirmelerge erkin tirkeı alasyz. Platforma arqyly tirkelý tórt satydan turady. Birinshi basqyshta balany tirkeısiz, odan keıin qalaýyńyzdaǵy úıirmeni tańdap, sabaqqa jazylasyz. Sońǵy satyda balany seksııaǵa tirkeý aıaqtalǵanyn baqylap otyrý kerek.
Tegin úıirmege tirkelý barysynda ESP kilttiń bolýy shart. Sondaı-aq tirkelý barysynda ata-ananyń jeke kýáliginiń kóshirmesi men balanyń týý týraly qujaty suralady.
«Úıirme tańdarda balanyń qyzyǵýshylyǵyn eskergen jón. 4 jas - balanyń tili shyǵyp, oıyndaǵysyn aıta alatyn kezeń. Sondyqtan ata-analardy óz armanyn balaǵa tańýdan aýlaq bolýǵa shaqyramyn. Úıirmege jazbas buryn balamen sóılesip, tilegine qulaq asyp, birshama ýaqyt baqylaǵan abzal. Sabaqtan tys ýaqytta balasyn úıirmelerge tasıtyn ata-analardy jıi kóremiz. Bul bala jan-jaqty tulǵa bolyp qalyptasýy úshin mańyzdy bolǵanmen, shekten tys júkteme artý, bos ýaqyt qaldyrmaýdan saqtaný kerek», dedi Astana qalalyq Dene shynyqtyrý jáne sport basqarmasy buqaralyq sport bóliminiń basshysy.
Bilimdi, tárbıeli ári deni saý urpaq – ulttyń eń qymbat baılyǵy. Qurmetti ata-ana, urpaǵyńyzdyń bolashaqta utylmaı, jahandanýǵa jutylmaı jetilýi úshin darynyn damytyp, talabyn tanýdy búginnen bastańyz!
