gov.kz
Saltanatty is-sharaǵa Mádenıet jáne aqparat mınıstri Aıda Balaeva, Parlament Májilisiniń depýtattary, QR Prezıdenti janyndaǵy jastar saıasaty keńesiniń ókilderi, memleket jáne qoǵam qaıratkerleri qatysty.
Memleket basshysy Q.Toqaev 2021 jyly «Táýelsizdik urpaqtary» grantyn jas daryndardyń jańa jáne qoldanystaǵy bastamalaryn qoldaý maqsatynda taǵaıyndaǵan bolatyn. Grant aıasynda 63 adam óz jobasyn Qazaqstanda ǵana emes shetelde de túrli salalarda tabysty júzege asyrýda.
«Biz úlken ózgerister dáýirinde ómir súrip jatyrmyz. Jastarǵa durys tańdaý jasaý, senimge laıyq azamat bolý, ózin-ózi damytý, oqý jáne eńbek arqyly tabysqa umtylý sııaqty eń mańyzdy jaýapkershilik júktelgen. Memleket basshysy Qasym-Jomart Toqaev jastardyń damýyna, olarǵa jańa jáne aýqymdy múmkindikter ashýǵa erekshe kóńil bóledi. Bar úmitimiz - eńbek pen bilimniń jolymen júretin, adamdyq qadir-qasıettiń mánin tereń túsinetin, ata-baba dástúrin qasterleıtin jastarda. Búgingi berilgen grant - sizderdiń tabandylyǵyńyz ben talantyńyzdyń, qajyrly eńbegińiz ben adaldyǵyńyzdyń, qoǵam úshin mańyzdylyǵyńyz ben óz áleýetińizdi moıyndaýyńyzdyń syıy. Bul qurmet odan ári damý men yntalanýǵa jetelesin. Árbir qadamdaryńyz jańa jetistikter men jańalyqtarǵa jol ashyp, shyǵarmashylyq, ǵylymı, iskerlik ıdeıalaryńyz elimizdiń damýyna eleýli úles qosýǵa múmkindik bersin. Sizder Qazaqstandy budan da zor kórkeıtetinderińizge senemin!», dedi A.Balaeva.
Bes baǵyt boıynsha kelip túsken 3 myńnan astam ótinim arasynan úzdik dep tanylǵan 30 avtorǵa 3 mıllıon teńge mólsherinde grant tabystaldy.
Olardyń arasynda Qazaqstannyń mádenı murasyn nasıhattaýǵa, halyqtyq mádenı dástúrler men ónerdi ilgeriletýge, IT salasyndaǵy ǵylymı zertteýlerdi, startaptar men jobalardy, ekonomıkanyń negizgi sektorlaryndaǵy kreatıvti bıznes ıdeıalardy iske asyrýǵa baǵyttalǵan joba ıeleri bar.
Elimizde 1992 jyldan bastap dástúrli túrde ǵylymı, shyǵarmashylyq, kreatıvti qyzmetpen aınalysatyn, sondaı-aq sport salasynda jetistikteri bar jastarǵa «Daryn» memlekettik jastar syılyǵy beriledi. Sonymen qatar jas jazýshylar men aqyndar Prezıdenttik arnaýly ádebı syılyqtyń ıegeri atansa, daryndy ǵalymdar D.A. Qonaev atyndaǵy syılyqtar men ǵylymı stıpendııalar alady.
