Shveısarııadaǵy Qazaqstan elshisi Qaırat Sarjanov kesh shymyldyǵyn quttyqtaý sózimen ashty.
«О́nerdiń maqsaty – túsinikti bolý ári kórermenniń sezimine áser etý. Al kórermen zalymen arada dıalog ornap, ár kórermenniń júreginiń tórinen oryn alsaq, tipti shabyttana túsemiz. Árıne, ár saparymyzdyń aldynda barar eldiń mentalıtetin, talǵamyn eskerip, gastroldik baǵdarlamany soǵan sáıkes daıyndaımyz. Osy jolǵy baǵdarlamamyz da aýqymdy ári mazmundy: klassıkany, zamanaýı avtorlyq balet pen teatrymyzdyń kórkine aınalǵan «Uly dala murasy» konserttik baǵdarlamasy. Bul zamanaýı, neoklassıkalyq horeografııa men folklordyń sıntezi ispetti. Osy turǵydan alǵanda, teatrymyz horeografııa men kórkem beıneni sýretteý baǵytyndaǵy izdenisterin toqtatqan joq», dedi teatr dırektory Aleksandr Sovostıanov.
Trýppa alǵashqy kúni Jorj Bıze – Rodıon Shedrın mýzykasyna A.Alonso qoıǵan ańyzǵa aınalǵan «Karmen-sıýıta» baleti men tanymal ánshi Karına Abdýllınanyń lıbrettosy men mýzykasyna teatrdyń bas baletmeısteri Mýkaram Abýbahrıeva qoıǵan «Taǵdyr bultarystary» mıstıkalyq spektaklin kórsetti. Kórsetilim maestro Arman Orazǵalıevtiń jetekshiligindegi teatrdyń sımfonııalyq orkestriniń súıemeldeýimen ótti.
«Men «Astana balet» teatrynyń shyǵarmashylyǵyn erekshe qurmetteımin. Astanada bolǵan kezimde mindetti túrde repertýaryn tamashalaımyn. Teatrdyń Jenevaǵa kelýi men úshin kútpegen tosyn syı boldy. Men úshin bul – Jańa jyl qarsańyndaǵy syılyq ispetti. Bizdi erekshe kúıge bólegen ujymǵa alǵysym sheksiz. Karmen – sezim, qushtarlyq jaıly baıandaıdy ǵoı. Osy sezim arpalysyn boıymnan ótkizgendeı boldym», dep oıymen bólisti Dıana Alpysbaeva esimdi kórermen.
Gastroldik sapar barysynda «Astana balet» ujymy sahnada ónerin pash etip, kásibı biliktiligi men oryndaýshylyq sheberligimen kórermen qaýymdy tánti etti. Gastroldik sapardyń sońǵy kúni tartý etilgen, teatrymyzdy áıgilep turǵan «Uly dala murasy» gala-konserti qazaq bıiniń úzdik úlgilerinen quralǵan halyq bıiniń jaýhary ispetti. Jeneva jurtshylyǵy ulttyq mýzyka, kórkem beıneler men biregeı horeografııany ystyq yqylaspen qabyl aldy.
«Shynymdy aıtaıyn, men úshin bul keremet tosyn syı boldy. Kásibı mansap jolymda kóptegen elde balet týyndylaryn tamashalaǵanym bar. Nıý-Iork, Parıj, Mılan, Máskeýde boldym. Shveısarııada Úlken jáne Marıınskıı teatrynyń, Eıfman teatrynyń jáne ózge de teatrlardyń shyǵarmalarymen tanystym. Balet – ózim úshin óte jaqyn óner. Meniń ishki álemimniń bir bólshegi desem de artyq emes. Sondyqtan bolar, búgin erekshe kúı keshtim. Tipti bir sát orkestr otyrǵan jerge bas suqtym. О́ıtkeni dybystyń taza shyqqany sonshalyq, bálkim bul fonogramma shyǵar degen oı boldy. Sóıtsem, olaı emes. Orkestr týyndyny minsiz oryndady. Orkestrdiń de, balettiń de ártisteri bárimizdi tánti etti. Olarǵa shyǵarmashylyq tabys tilep, talaı shyńdardy baǵyndyrýyna tilektestigimdi bildirgim keledi. Meniń oıymsha, jas ujymnyń shyǵarmashylyǵy dúnıejúzi kórermeniniń qyzyǵýshylyǵyn arttyra túsedi. Shveısarııadaǵy barlyq qazaqstandyqtyń atynan zor alǵysymdy bildirip, alǵan asýlaryńnan alasarmańdar degim keledi», deıdi Jenevada turatyn Aıdar Shaıahmetov.
Mazmundy ári kúrdeli baǵdarlama, óte tyǵyz gastroldik keste men kún saıynǵy kórsetilimder ońaı tımegenimen, ártisterdiń aıtýynsha, jańa belesterdi baǵyndyrýǵa shabyttandyra túsipti.
«Osy tektes mádenı qarym-qatynas – halyqaralyq baılanysty bekite túsýdiń tóte joly. Jalpy, gastroldik sapar bizder úshin óte mańyzdy. Sebebi biz kórermenge shabyt syılaýmen qatar, ózimiz de qanattanamyz. О́ıtkeni sheteldik kórermenniń de ystyq yqylasynan kúsh alamyz. Talaı ǵasyrlyq tarıhy bar teatrda óner kórsetip, ózge mádenıetpen tanysqan kezińde ózińniń de ishki álemin baıı túsedi ǵoı», dedi teatrdyń jetekshi solısi Aınur Ábilǵazına.
«Jenevaǵa sapar – ujymymyzdyń kásibı biliktiliginiń joǵary ekenin taǵy bir márte pash etip, jalpy óner ataýly túrli el men mádenıet ókilderin biriktire alatyn dúnıe ekenin kórsetti», deıdi teatrdyń qoıýshy-horeografy Aıgúl Tátı.
Aıta keteıik, gastroldik sapar Mádenıet jáne aqparat mınıstrliginiń qoldaýymen uıymdastyrylǵan.
