Sýretti túsirgen – Erlan OMAR, «EQ»
Saltanatty jıynǵa Parlament depýtattary, Olımpıada jeńimpazdary, sport ardagerleri, bıylǵy álem birinshilikteri men halyqaralyq jarystardyń jeńimpazy men júldegeri, sport jýrnalısteri qatysty. Jıynda sóz alǵan Sport mınıstri Ermek Marjyqpaev bıyl el sporty úshin sátti jyl bolǵanyn, otandastarymyz halyqaralyq arenalarda jeńis týyn jelbiretken sátterge erekshe toqtalyp, úzdikterdi quttyqtady.
«Bıyl el sportynda aıtýly jeńister az bolǵan joq. Jalpy, sport salasy elimizde qarqyndy damyp keledi. Sporttyń barlyq túri boıynsha otandyq sportshylar jankúıerlerdi óz jetistikterimen árdaıym qýantyp júr. Ulttyq qurama sportshylary jyl basynan beri 1 400 halyqaralyq jarysqa qatysyp, 864 medal jeńip aldy. Onyń ishinde 291 altyn, 262 kúmis jáne 311 qola medal bar. Álem chempıonattarynan – 68 altyn medal, Azııa chempıonattarynan – 47 altyn júlde, Azııa oıyndarynan 10 altyn oljalady. Memleket basshysy el táýelsizdigi tarıhynda alǵash ret Azııa oıyndarynyń júldegerlerin qabyldap, marapattaǵanyn erekshe atap ótkim keledi», dedi E.Marjyqpaev.
Jyl qorytyndysy boıynsha «Úzdik» dep tanylǵandar: Núrken Rahmanqul – «Jyldyń úzdik aýyl jattyqtyrýshysy», Kenjeǵalı Bekqulov – «Aýyldyq jerdegi úzdik dene shynyqtyrý jáne sport ádiskeri», Raýan Qazezov – «Aýyldyq jerdegi úzdik dene shynyqtyrý jáne sport nusqaýshysy», Buqar jyraý aýdanynyń dene shynyqtyrý jáne sport bólimi – «Aýdandyq úzdik dene shynyqtyrý jáne sport bólimi», Ishar Kýrbaev – «Jas jáne jasósipirimder quramyndaǵy sportshy», Vıktorııa Volkova – «Jyldyń úzdik balalar jattyqtyrýshysy», Natalıa Sýhacheva – «Dene shynyqtyrý jáne sport salasyndaǵy úzdik maman», Berik Qonysbekov – «Úzdik sport dárigeri», Móldir Jańbyrbaı, Mılad Karımı, Rýslan Qurbanov – «Jyldyń úzdik nátıjeleri», Qazaqstan sporttyq atý federasııasy – «Jyldyń úzdik akkerdıtelgen sport federasııasy», Tımýr Týrlov – «Jyldyń úzdik akkredıttelgen sport federasııasynyń prezıdenti», Ádilet Bármenqulov – «Jyldyń úzdik sport menedjeri», Múmkindigi shekteýli adamdarǵa arnalǵan «Úmit» sport klýby – «Jyldyń úzdik sport uıymy», Almaty qalasy – «Úzdik sporttyq óńir», Sergeı Shabalın (Rýslan Qurbanovtyń jattyqtyrýshysy) – «Jyldyń úzdik jattyqtyrýshysy», Samat Qanaǵatov, Jandos Busurmanov, Erbol Qaıyrov – «Úzdik sport jýrnalısi», Rızabek Aıtmuhan – «Sporttaǵy úzdik serpin», Mahmud Sabyrhan, Erbol Hamıtov «Jyldyń úzdik sportshysy» ataǵymen marapataldy.
