Bul másele Prezıdenttiń udaıy nazarynda ekeni barshaǵa belgili. Buǵan deıingi baǵdarlamalyq baıandamalarynda da atalǵan baǵyt júıeli ári dáıekti aıtylyp keledi. Osy jolǵy suhbatynda da «Memlekettik qyzmetshi qandaı bolýy kerek?» degen máselege ashyq ári aıqyn kózqarasyn bildirdi. Prezıdenttiń pikirinshe, memlekettik qyzmetshiler ózine júktelgen mindetti minsiz atqaratyn kásibı maman ǵana bolmaýy kerek. Olar árdaıym bastamashyl, naqty isimen elge paıda ákeletin jáne ózgeristerdiń ómirsheńdigin halyqqa kórsete alatyn azamat bolýy qajet. Sondaı-aq olar bilimdi-bilikti ǵana emes, sózi men isi úılesetin, tııanaqty, tártipti jáne arly adam bolýy shart. Iаǵnı Prezıdent memlekettik qyzmetshiler tek oryndaýshylar bolmaýy kerek, olar ózgeristerdiń bastaýynda turatyn, jaýapkershilikti ala alatyn bastamashyl tulǵalar bolýy kerek dep otyr. Sózi men isi úılesetin arly adam bolý týraly oıy da erekshe mańyzǵa ıe. Sebebi memlekettik qyzmet adamǵa úlken jaýapkershilik júkteıdi. Mansap dárejesine qaramastan árbir memlekettik qyzmetshi el damýyna ózindik úles qosatyn tarıhı mıssııany arqalap júrgenin shynaıy sezine bilýi kerek.
Sonymen birge, Memleket basshysy óz suhbatynda «eńbekqorlyq pen jasampazdyq joǵary baǵalanýǵa, bilimpazdyq pen jańashyldyq saltanat qurýǵa tıis ekenin» aıta kele, bilimpazdyq, kásibılik, birlik, yntymaq, janashyrlyq, iskerlik, bastamashyldyq, adaldyq, qarapaıymdylyq jáne únemshildik – naǵyz otanshyl, adal azamatqa tán qasıetter men qundylyqtar ekenin naqty kórsetip berdi. Bul eldikti nyǵaıtýdyń alǵy shebinde júrgen memlekettik qyzmetshilerge de qoıylar erekshe talap ekeni anyq. «Barlyq deńgeıdegi sheneýnikter men basshylar qoǵamnyń tamyryn tap basa bilýge, azamattardyń muń-muqtajyn tyńdap-túsinýge, soǵan sáıkes der kezinde nátıjeli sharalar qabyldaýǵa jáne durys sheshim shyǵarýǵa qabiletti bolýǵa tıis. Memleket basshysy memlekettik qyzmetkerlerdiń tulǵalyq bolmysyna tán basty talap – «adam memleket úshin emes, memleket adam úshin» degen qaǵıdatty berik ustaný ekenin aıtty. Eń bastysy, olardyń halyqqa jaqyn bolýy kerektigine nazar aýdartady.
Prezıdenttiń «adam memleket úshin emes, memleket adam úshin» degen qaǵıdasy jańa formasııadaǵy memlekettik qyzmetshilerdiń negizgi ustanymyna aınalýǵa tıis. Sebebi elimizde qalyptasyp jatqan jańa basqarý mádenıeti «Eń aldymen adamdar» qaǵıdatyna negizdeledi. Bul rette Memlekettik qyzmet isteri agenttigi memlekettik qyzmetshilerdiń kásibı-tulǵalyq jetilýi baǵytyndaǵy jumystardy turaqty júrgizip keledi. Aldaǵy ýaqytta Prezıdenttiń memlekettik qyzmetshilerge qatysty aıtqan tujyrymdy baǵyttaryn qyzmetkerlerdi oqytý, qaıta daıarlaý, biliktilikterin arttyrý barysynda jan-jaqty qoldanatyn bolamyz.
Memleket basshysy suhbatynda atqarýshy jáne zań shyǵarýshy bılik tarmaqtarynda jastardyń qyzmet etýine jol ashatyn keshendi sharalar qabyldanǵanyna toqtalǵan. Bıyl Prezıdenttiń tikeleı bastamasymen qolǵa alynǵan Prezıdenttik jastar kadr rezervine úshinshi irikteý ótkizildi. Prezıdenttik jastar kadr rezervi memlekettik qyzmetke talantty jastardy tartýdy kózdeıdi. Memleket basshysy belgilep bergendeı, daryndy, bilikti jastardy elge qyzmet etýge tartý, jumyldyrý, atsalystyrý. Osy joly memlekettik apparattyń salalyq kadrlarǵa qajettiligin eskerip, maqsatty irikteý ótkizildi. Nátıjesinde, 50 adam rezervke alyndy. Bul – elimizde kadr saıasaty ashyq ári ádil júrgizilip otyrǵanynyń kórinisi.
Bir sózben aıtqanda, suhbat qoǵamda qalyptasqan túıtkildi suraqtarǵa núkte qoıyp, oǵan qosa, elimiz damýynyń aldaǵy josparlaryna da qatysty baǵyt-baǵdardy aıqyndaýymen qundy bolyp otyr.
Darhan JAZYQBAI,
Memlekettik qyzmet isteri agenttiginiń tóraǵasy
