Prezıdent 2023 jyldyń elimiz úshin mańyzdy oqıǵalarǵa toly bolǵanyn ataı otyryp, negizgi saıası reformalardyń aıaqtalyp qalǵandyǵyn, onyń ishinde, ásirese Konstıtýsııalyq sottyń jumysyn bastaǵanyn, sol sııaqty Májilis pen barlyq deńgeıdegi máslıhat depýtattarynyń jańa ereje boıynsha saılanǵandyǵyn, sondaı-aq alǵash ret aýdan jáne oblystyq mańyzy bar qala ákimderiniń jáne aýyl men aýdandyq mańyzy bar qala ákimderin saılaýdyń jalǵasqandyǵyn tilge tıek etti.
Q.Toqaev memleketimizdiń ádil jáne básekeli ekonomıka júıesin qurý, ekonomıkany ártaraptandyrý jáne monopolııadan arylý, ınfraqurylymdy jańǵyrtý, bıznesti qoldaý, ınvestısııa tartý jumystarymen myqtap aınalysa bastaǵanyn, sonymen qatar áleýmettik salada qordalanyp qalǵan máselelerdiń birtindep sheshile bastaǵanyn alǵa tartty. Bul aıtylǵandardyń dáleli retinde elimizdiń túkpir-túkpirinde bilim oshaqtary, onyń ishinde, «jaıly mektepter» boı kóterýde ekenin, sondaı-aq aýyldarda densaýlyq saqtaý nysandarynyń da salynyp jatqandyǵyn jáne áleýmettik turǵydan osal toptaǵy azamattarǵa keshendi túrde qoldaý kórsetýge baǵyttalǵan Áleýmettik kodekstiń qabyldanǵandyǵyn atap ótti.
Memleket basshysy ulttyq múddeni eskere otyryp, syndarly ári salıqaly syrtqy saıasatymyzdyń jalǵasatynyna ekpin berip, 2024 jyly elimizdiń birneshe bedeldi halyqaralyq uıymǵa, atap aıtqanda, Shanhaı yntymaqtastyq uıymyna, Ujymdyq qaýipsizdik týraly shart uıymyna, Azııadaǵy ózara is-qımyl jáne senim sharalary jónindegi keńeske, Túrki memleketteri uıymyna, Araldy qutqarý halyqaralyq qoryna, Azyq-túlik qaýipsizdigi jónindegi ıslam uıymyna tóraǵalyq etetinin málim etti.
Prezıdent qasiretti Qańtar oqıǵasyn bylaısha sıpattaıdy: «Men bul týraly kóp oılandym, áli de jıi oılanamyn. Menińshe, qasiretti Qańtar oqıǵasyna jyldar boıy qordalanǵan áleýmettik-ekono-mıkalyq problemalar, jalpy toqyraýdyń bılik pen qoǵamdy azdyryp-tozdyrýy sebep boldy. Qaskóılerdiń memlekettik tóńkeris jasamaq bolǵan josparyn júzege asyrý úshin ekstremıster, qylmystyq toptar jáne ásire dinshilder birge qımyldady. Olardyń maqsaty el ishine úreı týǵyzý, memlekettik ınstıtýttardyń qyzmetin turalatý, konstıtýsııalyq qurylymnyń irgesin shaıqaý, aqyr sońynda bılikti basyp alý edi».
Memleket basshysy jáne bir shyndyqty, óziniń 2019 jyly Prezıdent laýazymyna saılanǵannan keıin elimizdegi kúrdeli bılik júıesiniń qalyptasqandyǵyn búkpesiz ashyp aıtty: «Bázbireýler qosarlanǵan bılik júıesin ornatýǵa talpynǵany, tipti mundaı áreketterdi ádeıi ári muqııat uıymdastyrǵany ras. «Bılik tranzıti» kezindegi ahýaldy saıasattaǵy aılakerler óz múddesine paıdalanyp, qosamjarlanǵan bılik ortalyǵyn qurýǵa tyrysty... Qalaı desek te, memlekette úlken jáne kishi prezıdent degen bolmaýy kerek dep sanaımyn», dedi.
Jalpy, bul suhbatta kóterilgen máselelerdiń bári de elimizdiń turaqty damýy úshin óte mańyzdy.
Ádil AHMET,
Tótenshe jáne ókiletti elshi, professor
