Memleket basshysynyń san taqyrypty qamtyǵan suhbaty qoǵamǵa taraǵan negizi joq túrli alypqashpa áńgimeni pyshaq keskendeı tyıyp, el-jurttyń aldaǵy kúnderge degen senimin bekitip berdi. Endi suhbattyń ereksheligine kelsek, birinshiden, onyń syrtqy formasyna toqtalaıyq. Áńgimelesý túrindegi formatqa elimizdiń bas gazeti «Egemen Qazaqstannyń» tańdap alynýyn jurtshylyq jyly, iltıpatpen qabyldady. Kópshilik muny dástúrli-klassıkalyq baspasózdiń ómirsheńdigine ári memlekettik tilge degen qurmet ekenin uǵynyp, áleýmettik jelidegi jel sózderge áýes túrli aqparat arnalarynyń basym bóligi «ásireqyzyl tez ońar» ýaqytsha qubylys ekenin ańǵartty. Suhbattyń ishki mazmunyn aıtsaq, birinshiden, áńgimeniń ashyq, pragmatıkalyq baǵytta órbýi der edik. Pafos joq, jurtty eshqandaı bos ýádege eliktirip, qurǵaq úmitke emeksitý múldem baıqalmaıdy. Júrip kele jatqan jolymyzdyń durys ekenine, alda kezdeser kedergiler men qıyndyqtardy el bolyp eńsere alatynymyzǵa kóz jetkizedi. Halyq úshin eń qajetti áleýmettik-ekonomıkalyq salanyń basty baǵdarlary aıqyndalǵan, ishki jáne syrtqy saıasattyń ózekti máseleleri ret-retimen tekshelenip jetkizilgen. Bastysy, eldiń birligine kesirin tıgizetin san túrli «olaı bolǵan eken, bulaı jasalmaqshy eken» degen sııaqty qaýesetke qurylǵan Qańtar qasireti men qosbılik taqyrybyndaǵy tushymsyz áńgimelerge tolyq toqtaý jasaldy.
Suhbatta rýhanı taqyryp ta qalys qalǵan joq. Prezıdenttiń myna sózderine nazar aýdaralyq. «Biz ótkendi ańsaýmen ómir súrmeýimiz kerek. Kerisinshe, keleshegimizdi kemel etýge umtylyp, ulttyń ulylyǵyn naqty ispen dáleldeýge tıispiz. Dúnıetanymymyzǵa jat mádenıetterge kózsiz elikteýden, jalǵan patrıotızmnen, dańǵoılyq pen daraqylyqtan saqtanýymyz kerek. Halqymyzdyń boıyndaǵy kemshilikterge kóz juma qaramaı, odan arylýymyz qajet. Munyń bári kún saıyn qubylǵan turlaýsyz zamanda ómir súrip jatqan Qazaqstannyń keleshegi úshin aıryqsha mańyzdy».
Bul – úlken messedj. Bul oılar bizdiń táýelsizdiktiń otyzynshy belesin ortalap qalǵan eńseli el retinde egemendiktiń eleń-alańyndaǵy eıforııadan tolyq shyǵyp, dúnıe damýynda aldy-artyn baǵamdap, «aqyryn júrip, anyq basatyn» memleket retinde ornyqqanymyzdy aıqyndap otyr. Urpaq ulttyq qundylyqtardy boıyna sińire otyryp, ýaqyt kóshinen qalmaýy kerek. Udaıy alda bolýdy órshil maqsat etýge tıis. Ata-babamyz attyń qulaǵynda qalaı oınasa, jas urpaq zamanaýı aqparattyq tehnologııalardy da solaı jetik meńgerip jatsa, úmittiń aqtalǵany sol bolar edi. Ulttyń ulylyǵy, daralyq, otanshyldyq sonda ǵana tanylatynyna kýá bolar edik. Suhbatta jalǵan patrıotızm, dańǵoılyq pen daraqylyq týraly der kezinde aıtyldy. Qoǵamnyń jegiqurty – osylar. Jasandylyq pen jalǵandyq oryn alǵan jerde keri ketýshilik, Abaısha aıtqanda «ósek, ótirik, maqtanshaq» sııaqty jaǵymsyz áreketter boı kótere bastaıdy. Al bul kesapattar ultty eshqashan ushpaqqa shyǵarmaıdy. Túptep kelgende, Otandy súıý, ata-anańdy syılap, jaqsy kórip, qadirlegeniń tárizdi júrekten saf taza kúıinde shyǵýǵa tıis. Biz sonda ǵana etek-jeńin jınaǵan baıandy el bolamyz. Suhbat osy oıǵa jetelep turýymen qundy.
Qýat BORASh,
qoǵam qaıratkeri,
jýrnalıst
