Álemdik arenada júrgiziletin ekijaqty nemese kópjaqty kelissózderde bir jerden shalys ketseń, memlekettiń irgesi shaıqalyp, qabyrǵasy sógilip túsedi. Bul tusta bizdiń úlken artyqshylyǵymyz, Prezıdent Q.Toqaev – syrtqy saıasatty óte jetik biletin, on jyl Syrtqy ister mınıstri bolǵan, BUU-da qyzmet etken álemdik deńgeıdegi halyqaralyq dıplomat. Sondyqtan syrtqy saıasat salasyndaǵy aýqymdy jumystardy atqarýda Memleket basshysynyń álemdik dıplomatııadaǵy abyroı-bedeli men mol tájirıbesi belgili bir dárejede yqpal etedi.
Memleket basshysy suhbatta ult múddesin qorǵaý, ony ilgeriletý, ornyqty damýǵa qolaıly jaǵdaı qalyptastyrý úshin elimiz salıqaly jáne pragmatıkalyq syrtqy saıasatty jalǵastyratynyn basa aıtty. Onyń ishinde Prezıdent elimizdiń syrtqy saıasatynyń negizgi basymdyqtaryn da naqty aıqyndap berdi.
Prezıdent qazirgideı aýmaly-tókpeli geosaıası jaǵdaıda sheteldik seriktesterimizdiń bárimen, ásirese kórshilerimizben ózara tıimdi yntymaqtastyqty damytý mańyzdy ekenine asa mán bergen. Osy oraıda Qazaqstan – Qytaı qarym-qatynasy dostyq, tatý kórshilik jáne máńgilik strategııalyq seriktestik rýhynda qarqyndy damyp keletinine toqtalyp ótedi. О́ıtkeni Qytaımen ortaq shekaramyzdyń bolýy, Shyǵys pen Batystyń arasyndaǵy utymdy jerde turǵanymyz qytaı taýarlaryn túrli baǵytqa Qazaqstan aýmaǵy arqyly tasymaldaýǵa zor múmkindik beredi.
Memleket basshysy atap ótkendeı, Qytaı – óte joǵary damyǵan, sonyń ishinde ozyq tehnologııa salasynda zor tabysqa jetken zamanaýı memleket. Muny búkil álem moıyndap otyr. Sondyqtan Shyǵystaǵy kórshimizben yntymaqta bolý, dostyq qarym-qatynas pen ózara senimniń artyqshylyqtaryn tıimdi paıdalaný elimiz úshin asa mańyzdy ekenin umytpaýymyz kerek.
Suhbatta Q.Toqaev jaqyn kórshimiz Reseı Federasııasynyń álemdik saıasatta asa mańyzdy ról atqaratynyn jáne BUU Qaýipsizdik Keńesiniń turaqty múshesi ekenin umytpaǵan jón ekenin basa aıtyp otyr. Reseı – Qazaqstannyń negizgi saýda-ekonomıkalyq seriktesi. Eki eldiń taýar aınalymy 2023 jyldyń bastapqy 10 aıynda 21,4 mıllıard dollar boldy. Prezıdenttiń aıtýynsha, osy jyly Reseımen ekijaqty ǵylym-bilim jáne mádenı-gýmanıtarlyq saladaǵy qarym-qatynasty nyǵaıtýǵa aıryqsha mán beriledi.
Sondaı-aq Prezıdent 2024 jyly elimizdegi halyqaralyq deńgeıdegi úlken is-sharalarǵa uıytqy bolýǵa tıis asa mańyzdy mindetterdi belgilep berdi. Qazaqstan óńirlik jáne halyqaralyq deńgeıdegi birqatar yqpaldy uıym men birlestikke tóraǵalyq etedi. Sonymen qatar bıyl elimizde birqatar aýqymdy halyqaralyq sammıt, forým ótedi.
Memleket basshysynyń aıtýynsha, ult múddesin eskere otyryp, bıyl da syndarly ári salıqaly syrtqy saıasatty jalǵastyratynymyz kóńilge úlken senim uıalatady.
Gúlsim EŃSEPOVA,
Syrtqy ister mınıstrliginiń keńesshisi
