Foto: BQO ákiminiń baspasóz qyzmeti
«Memleket basshysynyń óńirlerde Azamattardy qabyldaý ortalyqtaryn keńeıtý boıynsha tapsyrmasyn oryndaý maqsatynda Oral jáne Aqsaı qalasynda azamattardy qabyldaý ortalyǵy ashyldy», dep habarlady Batys Qazaqstan oblysy ákimdiginiń baspasóz qyzmeti.
«Biz Memleket basshysynyń «Halyq únine qulaq asatyn memleket» tujyrymdamasyn iske asyrý baǵytynda jumys júrgizip jatyrmyz. Memlekettik organdardyń ashyqtylyǵyn kórsetetin quraldyń biri – azamattardy jeke qabyldaý. Byltyr oblystyń jergilikti atqarýshy organdarynyń ókilderi 7 746 azamatty jeke qabyldady. Osyndaı ortalyqtar azamattardyń ózekti máselelerin der kezinde quzyrly organ ókilderiniń basshylarymen birlese sheshýge yqpalyn tıgizedi», dedi óz sózinde oblys ortalyǵyndaǵy ortalyqtyń ashylý saltanatyna qatysqan óńir basshysy Narıman Tóreǵalıev.
Atalǵan ortalyqta oblys ákimi aldyn-ala qabyldaýǵa jazylǵan 10 turǵyndy qabyldady. Azamattardyń basym bóligi áleýmettik máselelerin aıtty. О́ńir basshysy tıisti sala basshylaryna bul máselelerdi sheshý boıynsha tapsyrma berdi.
Azamattardy qabyldaý ortalyǵy turǵyndardy tolǵandyryp júrgen ózekti máselelerdi anyqtaý jáne olardy sheshý maqsatynda qurylǵan. Bul jerde oblystyq basqarmalardyń quzyreti sheńberinde keńester beriledi. Oblys ákimi, orynbasarlary, barlyq oblystyq basqarma basshylary men orynbasarlary, aýmaqtyq departament basshylary biryńǵaı kestege sáıkes aldyn-ala jazý arqyly jeke adamdardy qabyldaıtyn bolady.
Endigi kezekte ortalyqta oblystyq basqarmalar, Oral qalasy ákimdigi jáne «Azamattarǵa arnalǵan úkimet» Batys Qazaqstan oblysy Memlekettik korporasııasy qyzmetkerleri qabyldaý ótkizbek.
