«Koppelııa» baleti «Astana Operada» teatrdyń balet trýppasynyń kórkemdik jetekshisi Reseıdiń Halyq ártisi Altynaı Asylmuratovanyń bastamasymen 2019 jyly kórermenimen qaýyshqan bolatyn. Rolan Petıdiń baletterin álemniń kóptegen sahnasyna shyǵaryp júrgen tanymal baletmeıster Lýıdjı Bonıno Altynaı Asylmuratovanyń shaqyrýymen álemdik jaýhardy elordalyq teatrda qoıdy. Dekorasııalar men kostıýmderdi áıgili Esıo Frıdjerıo Franka Skýarchapınomen birlesip jasady. Elordalyq teatrda kostıýmderdi jańǵyrtý boıynsha sýretshi retinde Anna Verde, jaryq boıynsha sýretshi ári tehnıkalyq úılestirýshi retinde Jan-Mıshel Dezıre ter tókti.
Rolan Petı 1924 jyly 13 qańtarda Parıjde dúnıege kelgen. Bala kezinen san alýan ónerge qyzyǵýshylyq bildirgen 9 jasar Rolandy ákesi Parıj Operanyń balet mektebine beredi. 40-shy jyldary kordebalet ártisi bolyp júrgen kezinde ol jeke nómirler jasaı bastaıdy, al 1945 jyly «Komedıanttar» baleti oǵan zor jetistik ákeledi. Sol kezde ol óziniń alǵashqy jeke trýppasyn qurdy. Sheksiz daryny men menshikti tanymal máneri maestrony óz zamanynyń jetekshi horeograftarynyń biri etedi. Klassıkalyq horeografııaǵa adal bola otyryp, ol ony zamanaýı bı jáne teatr óneriniń elementterimen baıytýǵa tyrysty.
«Rolan Petı – birtýar horeograf, HH ǵasyrdyń ataqty klassıgi. 90-shy jyldardyń ortasynda maǵan onymen jumys isteý baqyty buıyrdy. Ol maǵan zor yqpalyn tıgizdi jáne de onymen birge Marsel teatrynda jumys istegen kezeńim ómirimniń mańyzdy belesi, áldebir kásibı baspaldaq ispetti. О́ner ıesi keremet adam edi, kúsh-qaıraty tasyp tursa da, minezin eshkimge kórsetken emes, onyń qııalynda shek joq edi. Keı kúnderi ol bir nárseniń jaısyz ekenin sezinse, al shabyty kelgende jumysqa kirisip, tyń dúnıeler jasaıtyn. Al biz oǵan úlgerip, barlyǵyn lezde jattap alýǵa jáne este saqtaýǵa tıis edik. Sol kezde dúnıege kelgen tamasha spektaklder qazir de ómir súrýde jáne olar búgingi tańda da ózekti. Rolan Petı salmaqty dúnıelerdi sahnalaǵanymen, ázil-qaljyńǵa da sheber-tin, sondyqtan ol jeńil, ázil-syqaq baletterdi de jasady, munyń jarqyn dáleli – «Koppelııa», dedi Altynaı Asylmuratova.
Alǵash ret «Koppelııa» 1870 jyly Parıj operasynda qoıylyp, onyń premerasyn Napoleon III Bonapart áıelimen birge tamashalaǵan. Sodan beri, mine, 154 jyl boıy qoıylym álemdik teatr sahnalarynda zor tabyspen usynylyp, horeograftardyń jańa býynyn shabyttandyryp keledi.
Leo Delıbtiń týyndysy Rolan Petıdiń horeografııasynda álemniń árbir qıyrynda zor tanymaldylyq pen suranysqa ıe. Dramasyz, kúldirgi oqıǵa jelisi men ásem horeografııa baletti jeńil ári merekedegideı etip kórsetedi. Ásem áýender, túrli sıpattaǵy bıler, shytyrman oqıǵalar men keremet kostıýmder arqyly baıandalatyn bozbala men jan bitken qýyrshaqtyń ǵajaıyp mahabbat hıkaıasy eshkimdi beıjaı qaldyrmaıdy. Az ǵana úzilisten keıin «Astana opera» sahnasyna oralǵan spektakl tek eki kesh qana kórsetiledi.
