Quralaı Eshmuratova: Qýyrshaq bala qııalyn asqaqtatady

Kindigimdi Sábıra Maıqanova kesti

– Quralaı Haleketqyzy, áńgimemizdiń álqıssasyn jaryq dúnıe esigin ashqan jarqyn sátińizden bastaıyqshy. Bilýi­mizshe, teatrda, spektakl ústin­de ómirge kelgen ekensiz. Al kin­digińizdi sahna sańlaǵy Sábıra Maıqanova kesipti desedi...

– Ol ras. О́ziń biletindeı, men Semeı óńirinde týyp-óstim ǵoı. Ákem de, anam da – óner adamy. Ákem ómir boıy sol Semeı teatrynyń akteri bolyp qyzmet etken. Úsh soǵysqa qatysypty. Allanyń peshenesine jazǵan ja­ryǵy, dám-tuzy taýsylmasa kerek, qandy maıdan ortasynan aman kelip, teatrdaǵy jumysyn jalǵastyrypty. Sol kezde men ómirge kelippin.  Anam da ónerden alys emes, bıshi de, ártis te bolǵan adam. О́kinishke qaraı, ómirden erte ótip ketti. Ananyń súti, ákeniń quty arqyly boıyna óner darypty deıtinniń bireýi men bolsam kerek, tipti ómirge keletin oryn retinde de perzenthanany emes, teatrdy tańdaǵan ekenmin. Ol kezde teatrlar aılap gastroldik saparlarǵa shyǵyp, eldiń túkpir-túkpirin, aýyldy jerlerdiń barlyǵyn aralaıtyn edi ǵoı. 1945 jyldyń jazynda Sábıra Maıqanova, Shahan Mýsın bastaǵan ákemteatrdyń beldi akterleri Semeıge gastroldik saparmen kelip, qoıylym qoıady. Anamnyń ol kezde aıy-kúni jetip otyrsa kerek. Biraq «Almatydan teatr kelipti» degendi estigende qaıtip úıde tynysh otyrsyn, spektakl tamashalaýǵa teatrǵa keledi. Qyzyq bolǵanda qoıylym ústinde tolǵaǵy qysyp, anamdy jabylyp júrip sahnanyń art­qy jaǵyna ákeledi. Sóıtip, shiliń­gir shildeniń 4-i kúni spektakl ústinde teatrdyń grım bólme­sin­de ińgálap men ómirge kelippin. Kindigimdi qazaq sahnasynyń anasy atanǵan alyp aktrısa, ańyz tulǵa Sábıra Maıqanova kes­ken eken sonda. Keıin es bile kele anamnan: «Sonda meni qa­laı bosandyńyz? Aıqaılap qo­ıy­lym kórýge kelgen kórermenge kedergi keltirgen joqsyz ba?» dep surasam: «O ne degeniń, qy­zym? Aıqaı túgili qatty dema­lýdyń ózine qoryqtym» dep jaýap berdi. Kórdińiz be, ne degen jankeshtilik?! Men sonda anam­nyń, jalpy sol kezdiń adam­darynyń ónerge degen sheksiz mahab­batyna, kórermenine degen rııasyz qurmetine áli kúnge deıin tańǵalamyn. Janymen súıgen kásibin janynan artyq qoıǵan naǵyz óner adamdary ǵoı ol kisiler. Sol kezde qan­daı spektakl júrip jatqanyn ákem­nen suramappyn. Soǵan áli ókinemin. Biraq qoıylymdaǵy keıipkerlerdiń biriniń esimi Quralaı bolsa kerek. Sonyń qur­metine Quralaı atandym dep oılaımyn.

 – Teatrda týyp, teatrda ósken kishkentaı Quralaıdyń ónerden ózge oıynyń bolmaýy da zańdy shyǵar...

– «Uıada ne kórseń, ushqanda sony ilersiń» dep qazaq beker aıtpasa kerek. Meniń de es bilgeli tanyǵanym, kórgenim teatr bolǵan soń, ónerde ózgege kóńil qoıma­dym. Jalǵyz-aq armanym boldy, ol – aktrısa bolý. Sol arman­nyń jeteginde Semeıden Almaty­ǵa kelip, Qurmanǵazy atyn­da­ǵy konservatorııanyń teatr bólimine, professor, KSRO halyq ártisi A. Toqpanovtyń sheberhanasyna oqýǵa túsip, ony 1967 jyly bitirip shyqtym. Ol kez­de turmysqa shyǵyp ta úlgergen edim. Tuńǵyshym Toǵjanǵa júkti boldym. Dıplomymdy alyp balalar men jasóspirimder teatry­na kelip edim, júktiligime baıla­nysty meni jumysqa qa­byl­da­mady. Sodan amalsyz qýyrshaq teatryna taban tiredim. Baǵyma oraı bul jaqta qazaqtildi bólim ashylyp, soǵan maman tapshy eken, meni quraq ushyp, qushaq jaıa qarsy aldy. Mine, osy sátten bastap meniń ómirim de, ómirlik muratym da túbegeıli ózgerdi. Tórt jyldaı qyzmet etken soń ujym biliktiligimdi arttyryp, tájirıbe jınap qaıtý úshin Máskeýge oqýǵa jiberdi. Tańdaý jasaý qıyn bolsa da, bilimnen bas tartpadym. Esesine Máskeý qalasynda qýyrshaq óneriniń bilgiri, KSRO halyq ártisi, Reseıdegi qýyrshaq óneriniń negizin qalaǵan maman, bilikti pedagog  Sergeı Vladımırovıch Obrazsovtyń sheberhanasynda tárbıelenip, mol tájirıbe jınadym. Ol kisiden óte kóp bilim aldym, qýyrshaqtyń qyzyǵy men qyr-syryna qanyqtym. Sergeı Vladımırovıch aqsúıek bolmysty adam, bilikti pedagog, naǵyz óz isiniń mamany bolatyn. Meniń qýyrshaqqa degen máńgilik mahabbatymnyń oıanýyna yqpal etip, sebepker bolǵan birden-bir adam sol kisi. Jalpy, meniń ustazdan jolym bolǵan desem, maqtanǵandyǵym emes. Asqar Toqpanovtaı taý tulǵanyń dáristerinen túıgen danalyq Obrazsovtyń sheberhanasynda shyńdaldy. Qos ustazymnan alǵan bilimdi áli kúnge deıin azyq etip kelemin. 

– Sózińizdiń arasynda «Máskeý maǵan tańdaý jasatty» dep qaldyńyz... Ol qandaı táýekel edi?

– Ártis bolý qandaı úlken jaýapkershilik bolsa, áıel adam úshin onyń salmaǵy birneshe ese aýyr. Ásirese otbasyly bolsań, kóp nárseni qurban etýge týra keledi. «Myńdy birge satam ba, álde myńdy birdiń jolynda qurban etem be?» degen san oı men mindet sharpysqan tyǵyryqtan shyǵýdyń túbi báribir táýekel bolary anyq. Meniń de aldymda sondaı úlken tańdaý turdy.  Stýdent kezimde turmys qurdym. Ol kezde eki qyzym ómirge kelgen bolatyn. Amal joq, bala-shaǵamdy, joldasymdy tastap, alys saparǵa attandym. Sebebi armanymnan bas tarta almadym. Oqýǵa degen qushtarlyq, mamandyqqa degen mahabbat túbi maǵan báribir tynym tapqyzbasyn bildim óıtkeni. Alaıda otbasy, jaqyndarymnan aılap alysta bolý ońaı bolmady. Ásirese er adam úshin bul úlken synaq eken. Joldasym da óner adamy bolatyn. Aradaǵy uzaq jol men qashyqtyqqa tótep bere almady. Osylaısha, jol ortasynda óz jónimizdi tabýǵa týra keldi.

Balany aldaı almaısyń...

– Alpys jyl boıy jansyz qýyrshaqtarǵa jan bitirip, san túrli beınede sóıletken qaı­rat­ker Quralaıdy qýyrshaqqa eń al­ǵash ǵashyq etken qandaı kúsh?

– Bizdiń kezimizde qýyrshaq kóp bolǵan joq qoı. Bar bolǵan kúnniń ózinde ony satyp alyp beretin aqsha qaıdan bolsyn? Ártis adamdar onsha baı emes degendeı. Biraq esesine, bizdiń úıde kúnde keshkisin mańaıyna úıdegi bar balany jınap alyp, ertegi oqyp beretin ájemiz boldy. Sol kisi bizdi qııaldaýǵa, ertegige senýge úıretti. Ájemniń taǵy bir keremet qasıeti – bizge arnap shúberekten basyn býyp, qolyn tigip, kózin kómirmen boıap qýyrshaq jasap beretin. Sol qýyrshaqtan qyzyq, sol qýyrshaqtan ystyq oıynshyqty  ómirimde kórmeppin. Meniń qýyrshaqqa degen mahabbatymnyń bastaýynda bálkim osyndaı bir jyp-jyly estelikter jatqan shyǵar dep oılaımyn.

– Teatr óneriniń ishinde qýyrshaq óneri eń qıyny sanalady. Sebebi senimine selkeý túsirgendi bala tanymy keshirmeıdi. Mundaı olqylyqtar jiberilmeýi úshin jas mamandardy qalaı tárbıeleý kerek?

– Iá, shynymen de qýyrshaq óneri – óte qıyn, kúrdeli óner. Bul – bir. Ekinshiden qýyrshaqty sezine bilý kerek. Saýsaq pen júrek birge soqpasa, qýyrshaqtyń plastıkasy men akterdiń ishki plastıkasy birge júrmese, onda shynaıy beıne de týmaıdy. Al qýyrshaqty olaı sezinip oınatý ár adamnyń qolynan kelmeıdi. Qýyrshaq teatrynyń ártisinde Alladan berilgen aıryqsha bir daryn bolady. Sol qasıet daryǵan akterdiń kórermen úshin teńdesi joq. Balanyń senimi týraly óte durys aıttyńyz. Olardy aldaý óte qıyn. Sondyqtan da qolymyzdaǵy qýyrshaqqa bar senim men sezimimizdi salamyz. Sebebi qýyrshaq sahnaǵa shyǵyp jaı ǵana júrip, jaı ǵana qımyldaı salmaıdy. Onyń árbir áreketinde ómir bar. Al ony shynaıy jetkizip, kórermenin sendire bilý naǵyz ártistiń ǵana qolynan keledi. Eń bastysy, qýyrshaqqa oınatyp júrgen akterdiń ózi senýi kerek. Sonda oǵan bala da rııasyz ılanatyn bolady. Qýyrshaqtyń qudireti sonda.

Qýyrshaq teatrynda ǵımarat joq

– Al búgingi qýyrshaq teatr­lary­nyń qandaı problemasy bar?

Aıta berse, qýyrshaq teatrynda másele kóp qoı. Sonyń eń áýelgisi – qýyrshaqtyń ózi. Qazirgi tańda elimizde qýyrshaq jasaıtyn mamandar óte tapshy, tipti joq dese de bolady. Buǵan deıin bolǵan mamandardyń kóbi ómir­den ótip ketti. Kózi tirileriniń ózi biraz jasqa kelip qaldy. Al jas mamandar, ókinishke qaraı, bizdegi joǵary oqý oryndarynda daıarlanbaıdy. Sebebi olardy oqytatyn ustaz joq.  Sondyqtan da amal joq, qýyrshaqtardy shetelden tapsyrys berip aldyrýǵa májbúrmiz. Onyń mashaqaty shashetekten ekenin ózińiz de topshylap otyrǵan bolarsyz. Jalpy, bizde qýyrshaq teatr­laryna degen kózqaras durys emes qoı. Balalardyń teatry dep bıliktegiler mensinbeı qa­raıdy. Al onyń bolashaq­tyń irgetasy ekendigin eshkim sezin­gisi, uǵynǵysy kelmeıdi. Qazaq «El bolamyn deseń, besigińdi túze» dep beker aıtty deısiń be? Osy jaǵynan kelgende qýyrshaq teatrlarynyń qazirgi jaǵdaıy kóńil kónshitpeıdi. Jalaqy máselesi men ártister­diń turǵyn úı jaǵdaıynan  bas­tap, qarapaıym ǵana teatr ǵımaratyna deıin qamqorlyqqa zárý. Basqany aıtpaǵanda, bas qalamyz – Astananyń tórinde turǵan qýyrshaq teatrynyń ǵımaratynyń jaǵdaıy jylarman kúıde. Arnaıy teatr bolyp salynbaǵannan keıin kún saıyn túrli qaıshylyqtarmen betpe-bet kelip jatamyz. Áý basta turǵyn úı kesheni retinde boı túzegen ǵımarattyń birinshi qabatyn jaılaǵan biz úshin joǵary qabatta turatyn turǵyndardyń qas-qabaǵyna qarap, jaltaqtap júrip óner týdyrý óte qıyn. Spektakl bastalǵan sátte elektr kerneýiniń shekten tys kóbeıýinen joǵarǵy qabattaǵy páterlerdiń jaryǵy óship qalady. Al keshki saǵat toǵyzdan keıin qatty mýzyka qoıyp daıyndyq jasaý tipti múmkin emes. Turǵyndar­dyń jaǵdaıyna qaraı jaltaq­tap júrgennen keıin, sapaly óner týdyrý máselesin qozǵaý­dyń ózi qısynsyz sııaqty.  Sonda da áýpirimdep júrip kishken­taı kórermenderimizdiń rýhanı suranysyna jaýap berýge barynsha tyrysyp júrmiz. Mu­nyń barlyǵy qýyrshaq teatryna degen kózqarastyń durys emestiginen. Alysqa barmaı-aq, kórshiles elderdiń qýyrshaq ­teatrlaryna kirseńiz, kóńilińiz kóterilip, shabyttanyp shyǵa­syz. Osyndaı kóńil kúı kishken­taı kórermenderimizden buryn, ásirese ártisterimizge de asa qajet ekeni anyq. Saltanatymen talaıdy tamsandyrǵan astanamyzdyń tórinen baldyrǵandarymyzǵa arnalǵan eńseli qýyrshaq teatry boı kóterse, bas qalamyzdyń sánine qalaı jarasar edi?!.

– Qazirgi aqparattyq tehno­lo­gııanyń qaryshtap turǵan za­manynda balany qýyr­shaq ­teatrymen tańǵaldyrý múm­kin be? Qýyrshaq teatryna bal­­dyr­ǵandardyń kelý belsendiligi qalaı?

– Qýyrshaq degen sıqyrly álem ǵoı. Qansha jerden aqparattyq tehnologııa qaryshtap damyp, zaman jahandanǵanymen bala tanym báribir qýyrshaqpen oınap, syrlasýyn toqtatpaıdy. Sol sııaqty qýyrshaq teatrynan da bala tehnıka qozǵaı almaıtyn, tek sezim ǵana selt etkizip, qııal ǵana qııanǵa samǵatatyn shynaıy emosııalarǵa jolyǵady. Áıtse de bir baıqaǵanym, qazir zaman solaı ma eken, ata-analardyń balasyn teatrǵa ákelýge ýaqyttary bola bermeıdi. Kúni boıy jumysta, keshke turmystyń mashaqatymen áýre. Sol qarbalas balanyń rýhanı suranystaryna álbette salqynyn tıgizbeı qoımasy anyq. Balany bolashaǵymyz dep qarasaq, onyń búgingi sábı suranystarymen de júıeli jumys istep, sezimderin barynsha baıytýǵa, ómir týraly túsinigin keńeıtýge kúsh salý kerek. Eger balańyz úsh jasynda bireýge jany ashyp, meıirimniń ne ekenin sezinbese, onda onyń erteńinen de izgilikti is kútpeı-aq qoıyńyz. Sebebi bala kórgenin, kórip túısingenin boıyna sińiredi. Al ol sezim izgilik pen meıirimnen, qamqorlyqtan quralsa, demek bolashaǵymyz da baıandy degen sóz. Sondaı emosııanyń barlyǵyn bala qýyrshaq teatry arqyly tanyp, talǵaıdy. Tanym kókjıegin keńeıtedi. Kóp ata-ana, ásirese qazaq ata-analar osy jaǵyna salǵyrt qaraıdy. Jaı ǵana salystyryp qaraıtyn bolsaq, orystildi aýdıtorııa 100 oryndyq zaldy lyq toltyrsa, qazaqsha qoıylymda jarty zal tolsa, soǵan qýanamyz. Bul neni bildiredi? Ata-analardyń áli de teatrdyń qundylyǵyn tolyq­taı tanymaı kele jatqandy­ǵyn ańǵartady. Búgingi qýyr­shaq teatry­na baratyn bala – er­teń­gi drama men opera jáne balet teatrlarynyń kórermeni, demek zaıyrly memlekettiń zııaly qa­ýymyn quraıtynyn esten shy­ǵar­maýymyz kerek. Sebebi bala – bizdiń bolashaǵymyz. Al bo­la­shaǵymyzǵa nemquraıly qaraý – ult aldyndaǵy úlken qylmys.

Dramatýrgter teatrǵa kelmeıdi

– Teatrdyń tiregi – dramatýrgııa desek, qýyrshaq teatry­na arnap pesa jazatyn avtor­lar bar ma?  Jalpy, bala ta­qy­rybyna boılap júrgen dra­ma­týrgterdiń izdenisi kóńi­lińizden shyǵa ma?

– Bala taqyryby – móldir álem. Olardy tańǵaldyrý qandaı ońaı bolsa, ılandyrý sondaı qıyn. Sondyqtan balamen baılanysty dúnıeniń barlyǵy shynaıy bolǵany jaqsy. Al sábı psıhologııasynan, qýyrshaq tabıǵatynan habary joq avtor álbette bala men qýyrshaq arasynda altyn kópir bola almasy anyq. Bilesiz be, meni tańǵaldyratyny – Astanada qýyrshaq teatry ashylǵan 2007 jyldan beri qoıylymdarymyzǵa birde-bir qazaqtyń aqyn nemese jazýshysy kelgenin kórmeppin. Kelse tek «Myna bir pesam bar edi, qoıýǵa bola ma?» dep kelýi múmkin, biraq keıin ol pesanyń jaǵdaıy qalaı ekenin bilip ári qaraı qunttap jatqany da neken-saıaq. Bizdiń jastaý kezimizde jaǵdaı múldem basqa bolatyn. Aqyn-jazýshylar, tipti kompozıtorlarǵa deıin qýyrshaq teatrynan shyqpaıtyn. Sáken Júnisov, Orazbek Bodyqov, Ospanhan Áýbákirov, Latıf Hamıdı, Nurǵısa Tilendıev, Abdolla Qarsaqbaev syndy aǵalarymyzdy qýyrshaq teatrynan jıi kóretinbiz. Jaı ǵana kelip qoımaı, balalarǵa arnap pesa jazyp, qoıylymdary­myz­ǵa laıyqtap mýzyka da shyǵa­ra­tyn. Sonyń biri – Ospanhan Áýbákirovtiń «Aldar kóse» qoıy­lymy. Spektakldiń kompozıtory Nurǵısa Tilendıev aǵa­myz boldy.  Áli esimde «Aldar kóse» qoıylatyn kúni qos avtordyń qasyna rejısser Abdolla Qar­saqbaev aǵamyz qosylyp, zal­dyń sońǵy qatarynda otyryp qoıylym tamashalaıtyn. Bala­men bala bolyp, solarmen bir­ge qosyla ishek-silesi qatqansha kúlip otyrǵan aǵalarymyz­dyń aıaýly beınesi áli kúnge deıin kóz aldymda. Balanyń ortasynda júrip jazǵan shyǵarmanyń báribir bási bólek bolady. Al biz­degi úlken problema – dramatýrg­ter teatrǵa jolamaıdy, alys­tan otyryp jaza salǵysy keledi. Sonyń saldarynan qýyrshaq pen kórermen arasynda baılanys ornata almaıdy. Kezinde bas qalamyzdyń tórinde Qýyrshaq teatryn ashatyn bolyp, jańa teatrdyń shymyldyǵyn erekshe bir ulttyq qoıylymmen túrgimiz keldi. Senesiz be, soǵan laıyqty pesa taba almaı, «Qyz Jibek» jyrynyń balalarǵa arnalǵan sahnalyq nusqasyn ózim jazyp shyǵýǵa týra keldi. Muny talantym tasyǵannan jazdy deısiz be? Qýyrshaq tabıǵatyn túsinip, bala tilimen áserli sóılete alatyn avtor taba almaǵan soń, amalsyz osyndaı qadamǵa bardyq. Sebebi qýyrshaqtyń tabıǵaty basqa. Ol kópsózdilikti kótermeıdi, plas­tıka men mımıkaǵa basymdyq berilse ajary ashylyp, qulpyra túsedi. Osy syndy bul salanyń óziniń talaptary bar. Máselen, birneshe jyl buryn jazýshy, dramatýrg Roza Muqanovanyń «Máńgilik bala beıne» shy­ǵar­masyn qýyrshaq teatrynda qoıdyq. Avtordy premeraǵa sha­qyrýyn shaqyrsaq ta, ol kisi qa­laı qabyldar eken dep qatty ýaıymdadyq. «Osyndaı qasiretti ta­qyrypty qýyrshaqqa oınatyp, mazaq etkenderiń be?» dep ren­jise qaıtemiz dep qobaljyǵa­nym­dy da jasyrmaımyn. Qoıylym sońyna qaraı avtorǵa qarasam, Roza hanym kóziniń jasyn súrtip otyr eken. Qýanyp kettim, tipti kózimnen jas ta shyǵyp ketti. Spektaklden keıin: «Myna spektakl talaı jerde qoıylyp júr ǵoı. Kınosy da shyqty. Adam jylata almaǵan janymdy myna kishkentaı aq qýyrshaq jylatty-aý...» dedi. Budan artyq qandaı baǵa kerek? Mine –  qýyrshaqtyń qudireti!

– Osydan 17 jyl buryn elorda tórinde shymyldyǵy túrilgen memlekettik qýyrshaq teatrynyń negizin qalaýǵa atsa­lystyńyz. Aıaǵyn apyl-tapyl basqan jas teatrdy baǵ­bandaı baptap, anasyndaı aıala­dyńyz desek te bolady. Teatr­dyń búgingi jaı-kúıi qalaı? Qandaı jańalyqtary bar?

– Iá, bul teatr shynymen meniń tól balam sekildi. О́mirge kelgeninen beri ózim baptap kele jatyrmyn ǵoı. Men úshin búginde odan asqan ystyq meken joq. Repertýarynan bastap, teatr­dyń jaǵdaıy, ártisterimniń jaı-kúıi, bári-bári alańdatady. О́ıt­ke­ni balaǵa qyzmet etip jatqannan keıin qoıylymdarymyz­dyń barlyǵy sábı sanasyna sáýle shashýǵa, meıirim men mahab­bat­qa tárbıeleýge baǵyttalsa deı­miz. Solardyń janyn izgilendir­gim keledi. Qýyrshaq teatry­nyń búgingi kórermeni – elimiz­diń erteńi ekendigin qazirden bas­tap eskerip, sol maqsat jolynda ter tógýimiz kerek. О́kinishke qaraı, qazirgi ata-analardyń kópshiligi balamnyń qarnyn toıǵyzyp, kıimin bútindesem, aǵylshyn tilin oqytyp, qalaýyn alyp bersem boldy, tárbıe máselesi sonymen támam dep oılaıtyn bolýy kerek. Al balanyń jan áleminiń jeti­lýi, olardy rýhanı kemeldendi­rý­ge kóp mán berile bermeıdi. Al ómirinde qýyrshaq teatryna bir kelip qoıylym kórip, qııal­dap kórmegen, keıipkerlerdiń kóńil kúıine alańdap, túrli se­zim­der­di bastan keship kórmegen bala­nyń erteń eren isterdiń basynda júretindigine senim az. О́ıt­keni balanyń materıaldyq suranysymen qatar rýhanı qa­jettilikterine de mán berý asa ma­ńyzdy ári jaýapty dúnıeler­diń biri. Sondyqtan da men ár qa­zaq balasynyń kemeldik bıigi­n­e je­týin qalaımyn. Qýyrshaq bala qııalyn asqaqtatady. Osy­ny umyt­pasaq eken. Mine, teatry­myz­dyń ashylǵanyna bıyl 17 jyl bolady eken, osy ýaqyt ara­ly­ǵynda maqsatymyzdan bir sát te aýytqyǵan emespiz. Tek endi aldaǵy ýaqytta qýyrshaq teatry­na arnalǵan ǵımarat máselesi oń sheshimin tapsa, buǵan deıin tehnıkalyq jaǵdaı jar bermeı kele jatqan kóptegen oı-maqsat, armandarymyzdy júzege asy­ramyz ǵoı dep senemin. Shúkir, jyl saıyn ártisterimizdiń qa­ta­ry jas akterlermen tolyǵyp, bir qaýym elge aınalyp kele­miz. Ár tórt jyl saıyn Qazaq ulttyq óner ýnıversıtetinde meniń sheberhanamnan tárbıelenip shy­ǵyp jatqan ártister qatary­myz­ǵa qosylyp, elimizdegi qýyrshaq ónerin órkendetýge at­salysyp júr. Jyl saıyn óte­tin halyqaralyq «Quralaı» fes­tıvali de qýyrshaq óneri­niń tek el aýmaǵymen shektelmeı, alys-jaqyn shetel ónerimen bite qaınasýǵa mol múmkindik syı­laýda. Alla ǵumyr berse alda­ǵy ýaqytta da kórermenderimizdi jaqsy, taǵylymy mol qoıy­lym­darymyzben qýanta beremiz ǵoı dep oılaımyn.        

–  Áńgimeńizge rahmet.

Áńgimelesken –

Nazerke JUMABAI,

«Egemen Qazaqstan»