Foto: azattyq-ruhy.kz
Polisia.kz jazýynsha, bıylǵy maýsymnan bastap IIM Sıfrlyq damý, Innovasııalar jáne aeroǵarysh ónerkásibi, Ádilet, Densaýlyq saqtaý, Eńbek jáne halyqty áleýmettik qorǵaý mınıstrlikterimen birlesip, balalarǵa týǵannan keıin birden jeke sáıkestendirý nómirin berý boıynsha jańa pılottyq joba iske qosyldy.
Búginde 7 myńnan astam jańa týǵan balaǵa JSN berildi.
«Eger buryn JSN balaǵa ata-anasy AHAT organdaryna týý týraly kýálik alý úshin júgingen kezde ǵana berilse, endi JSN balaǵa proaktıvti formatta týǵannan keıin, ıaǵnı týý týraly kýálik berilgenge deıin jáne T.A.Á. berilgenge deıin beriledi», delingen IIM baspasóz qyzmeti taratqan aqparatta.
Engizilgen jańa tetik aıasynda jańa týǵan sábıge JSN berý memlekettik organdardyń aqparattyq júıelerinde onyń týý faktisin bir mezgilde kórsete otyryp, týý týraly medısınalyq kýálikti qalyptastyrý kezinde perzenthanada avtomatty túrde júzege asyrylatynyn eskere otyryp, bul prosestiń ashyqtyǵyn qamtamasyz etedi jáne bala saýdasynyń yqtımal jaǵdaılaryn boldyrmaýǵa múmkindik beredi.
«Sonymen qatar bul jańa týǵan nárestelerdiń tolyq esebin júrgizýge ǵana emes, sondaı-aq memlekettik qyzmetterdi kórsetýdi jańa deńgeıge shyǵarýǵa múmkindik beredi, osylaısha azamattardyń memleket qabyldaıtyn is-áreketter, memlekettik qoldaý sharalary men qyzmetter týraly habardarlyǵyn arttyrady. Máselen, balaǵa JSN berilgen kezde memlekettik organdardyń aqparattyq júıelerinen málimetter «Jeke tulǵalar» memlekettik derekter bazasyna kelip túsedi, al ata-analarǵa qandaı da bir qurylymdarǵa júginýdiń qajeti joq, óıtkeni júıe memlekettik qyzmetter keshenin kórsetý úshin qujattardy avtomatty túrde súıemeldeýdi jáne daıyndaýdy bastaıdy», delingen habarlamada.
