Respýblıkalyq «Zorlyq-zombylyǵy joq qoǵam» bastamasy aıasynda bıylǵy qańtar men maýsym aılarynda birneshe is-shara ótkizý josparlanǵan. Jobanyń alǵashqy kezeńinde 14-18 jastaǵy balalar arasynda «Balalar zorlyq-zombylyqqa qarsy» respýblıkalyq sýret baıqaýy ótip otyr. О́ner saıysynyń maqsaty – óskeleń urpaq boıynda belsendi azamat ustanymyn qalyptastyrý.
Qazirgi kezde baıqaý qorjynyna elimizdiń barlyq aımaǵynan 400-den astam jumys kelip túsken. Sýretterdiń 17 paıyzy janýarlarǵa, 36-sy otbasyndaǵy, 23-i psıhologııalyq zorlyq-zombylyqqa qatysty bolsa, 24-i mekteptegi býllıng taqyrybyn qozǵaıdy.
Jıynda Almaty qalasy ákimdigi áleýmettik damý bóliminiń bas ınspektory, Áıelder isteri jáne otbasylyq-demografııalyq saıasat jónindegi komıssııanyń hatshysy Gúlnar Ámirova, Prezıdent janyndaǵy Áıel isi jáne otbasy-demografııalyq saıasatynyń ulttyq komıssııasynyń múshesi Gúlnar Omarova sóz sóılep, is-sharanyń mańyzyna toqtaldy.
«Zorlyq-zombylyǵy joq qoǵam» jobasynyń bastamashysy ári uıymdastyrýshysy «EDU Stream» halyqaralyq kompanııalar tobynyń bas dırektory Natalıa Muhamedjanova baıqaý sharty boıynsha balalar mekteptegi býllıng, otbasyndaǵy zorlyq, janýarlarǵa kúsh kórsetý sııaqty taqyryptardy tańdaǵanyn atap ótti. «Kelip túsken sýretterdi saralaı otyryp, máseleniń túp-tamyry áldeqaıda tereńde jatqanyn kóremiz. Jobany iske asyrý arqyly bastamashy top elimizdiń árbir azamatyn bul jaǵdaıdan beıtarap qalmaýǵa, ásirese balalardy qorǵaýǵa shaqyrdy», deıdi ol.
Almaty qalasy polısııa departamenti jergilikti polısııa qyzmeti basshysynyń orynbasary, polısııa maıory Aıdyn Eleýsizov otbasylyq janjalda balalar dene jaraqatymen qatar psıhologııalyq turǵydan zardap shegetinin aıtady. Onyń dálelin balalar salǵan sýretterden de kórýge bolady. Qazirgi kezde memlekettik organdar qıyn jaǵdaıdaǵy otbasylardyń áleýmettik jaǵdaıyna qaraılasý, balalardyń bilim alýyna turaqty qoldaý kórsetip keledi. «Bul iste sheteldik tájirıbege de nazar aýdarǵan abzal. Mysaly, zorlyq-zombylyq kórsetkishi tómen elder qatarynda turǵan Norvegııada áleýmettik jaǵdaılar tolyq sheshilgen. Munda jastar otbasyn qurýdy aldyn ala josparlaıdy. Salystyrmaly túrde alsaq, Almaty qalasynda áıelderge qarsy qylmys byltyr 35 paıyzǵa tómendedi. Sondaı-aq ótken jyly myńnan astam áıelge qoldaý kórsetilse, bıyl da bul jumys bilim, densaýlyq, polısııa mekemeleri tarapynan turaqty iske asyp keledi», deıdi polısııa maıory.
«Zorlyq-zombylyǵy joq qoǵam» jobasy balalar baıqaýymen ǵana shektelmeıdi. Jumys toby EQYU, BUU, Aýstrııa men Qazaqstannyń zorlyq-zombylyqpen kúreske qarsy quzyrly organdary ókilderi, sarapshylarmen kezdesip, ozyq tájirıbelerdi saralamaq.
«Zorlyq-zombylyǵy joq qoǵam» jobasy aıasynda áleýmettik jelide #menzorlyqqaqarsymyn heshtegimen fleshmob ótedi. Joba bıyl maýsym aıynda Astanada ótetin forýmda qorytyndylanady.
ALMATY
