Ál-Farabı atyndaǵy Oqýshylar saraıynda jas aqyn Abzal Maqashtyń «Katarsıs» qoıylymy ótti. Ahmet Baıtursynulynyń «Qyryq mysal» eńbeginiń negizinde jazylǵan sahnalyq qoıylymda adamshylyq arnalary, jan ishindegi arpalys, minez dertteri, tazarý, táýbege kelý syndy irgeli rýhanı dińgekter qamtylady.
– Oqıǵa janýarlar qalasynyń bas sýdıasy Túlkijan Aldapsoǵarovtyń óz qylmysyn jasyratyn kezinen bastalady. Kúnderdiń kúninde janýarlar qalasynda qaýipti juqpaly indet tarap ketedi. Bolǵan náýbetti «qudaıdyń jazasy» dep qabyldaǵan birshama dindar qaýym zorlyq-zombylyqtan tyıylyp, qulshylyq-ǵıbadattaryn molaıtady. Qasqyrlar oraza ustap, saýysqandar sadaqa berip ketedi. Alaıda olardyń bári Túlkijan Aldapsoǵarovtyń qala basshysy Arystan Aqyrǵanulynyń ornyn kózdep júrgeninen múldem beıhabar, – deıdi jas aqyn.
Pesanyń qoıýshy rejısseri – «Jas qalamger» uıymynyń jetekshisi, pedagog Nárııa Aqbabaqyzy. Qoıylymdy somdaǵan balalar arqyly bási bıik, tynysy keń taqyryptar aq zaldyń ár túkpirine jetti. Shyn máninde, tek jas emes, eresek adamdardyń aqyl-oıyna salmaq salatyn qordaly týyndy aıtýly sahnalardan nasıhattalsa quba-qup bolary daýsyz.
