Elorda kórermenderin Qallekı teatr óneriniń úzdik úlgilerimen tanystyrý maqsatynda ótetin sahna merekesinde teatr sarapshylary men kórermen nazaryna 2022 jyldyń naýryz aıy men 2024 jyldyń naýryzy aralyǵynda jaryq kórgen premeralar usynylady. Atap aıtqanda, Ǵ.Músirepovtiń «Baıan Sulý – Qozy Kórpesh», E.Shmıdtiń «Hat», Q.Jetpisbaevtyń «Bala mergen», E.Jýasbektiń «Úılený», S.Balǵabaevtyń «Qyz jıyrmaǵa tolǵanda», D.Ramazannyń «Joshy han», J.Shaıhıslamuly men Ǵ.Músirepovtiń «Qyz Jibek», Q.Jıenbaıdyń «Patsha kóńilim, ne deısiń?» jáne teatrdyń shyǵarmashylyq zerthanasy daıyndaǵan «Keshki...7» qoıylymdary kórermenin qýantady.
Shara barysynda teatr sarapshylary spektaklderdiń tolyq taldaýyn júzege asyryp, úzdikterdi anyqtaıdy. Sonymen qatar bıyl kórermender de jaýapty sátke atsalysý múmkindigine ıe bolyp otyr. Teatr foıesindegi arnaıy saýalnamany toltyryp daýys berý arqyly olar da úzdikterge qoldaý bildire alady. Al qatysýshylar carapshylar sheshimimen «Úzdik er adam róli», «Úzdik áıel róli», «Ekinshi plandaǵy úzdik er adam róli», «Ekinshi plandaǵy úzdik áıel róli», «Úzdik spektakl», «Úzdik rejısser», kórermen tańdaýy boıynsha «Úzdik akter», «Úzdik aktrısa» «Úzdik spektakl» syndy atalymdarda arnaıy syılyq jáne dıplomdarmen marapattalady.
Keıingi jyldary jaryq kórgen premeralardy keńinen nasıhattap, sahna mártebesin joǵary deńgeıge kóterý, teatrdyń qoǵamdaǵy orny men adamzattyń rýhanı ósip-órkendeýine tıgizer yqpalyn ujym aldynda zertteý, sonymen qatar akterlik ónerdiń kásibı sheberlik turǵysynan shyńdalýy, teatr óneriniń túrleri men janrlaryndaǵy úzdik jumystardy anyqtaý jáne qoldaý, zamanaýı teatr úrdisiniń negizgi tendensııalaryn anyqtaý hám teatr óneriniń klassıkalyq jáne zamanaýı muralary arasyndaǵy shyǵarmashylyq baılanysty nyǵaıtý; elorda kórermenderin Qallekı teatr óneriniń úzdik úlgilerimen tanystyrýdy murat etken aıtýly óner dýmany teatrsúıer qaýymdy 10 kún boıy qýanyshqa bóleıdi. Spektaklder sherýiniń saltanatty jabylýy 27 naýryz kúni Q.Qýanyshbaev atyndaǵy akademııalyq qazaq mýzykalyq drama teatrynyń sahnasynda ótedi.
