Ulttyq mýzeıdiń aıtýly jobasyna jyldaǵy dástúr boıynsha dıplomatııalyq korpýs ókilderi, qoǵam jáne óner qaıratkerleri, ǵalymdar qatysty. Merekelik jıyn kórisý dástúriniń teatrlandyrylǵan kórinisimen bastalyp, Ulttyq mýzeıdiń jyldaǵy ótkizetin tusaý kesý rásimine ulasty. Rásimge Astana qalasy ákimdiginiń mamandandyrylǵan balalar úıiniń baldyrǵandary arnaıy shaqyryldy.
Is-shara barysynda Naýryz merekesine arnalǵan kórme ashyldy. Kórmege qazaq halqynyń dástúrli jıhazdarynyń ádemi úlgileri – qoldan jasalǵan sandyqtar, tuskıiz jáne túskesteler qoıylǵan. Odan bólek kelgen qonaqtar nazaryna túrki halyqtarynyń ulttyq kıim úlgilerinen defıle usynylyp, qazaq, ázerbaıjan, bashqurt, kúrd, qaraqalpaq, qyrǵyz, uıǵyr, ózbek, tatar halyqtarynyń kıimderi tanystyryldy. Mýzeı alańyndaǵy Konservasııa jáne restavrasııa bólimi qyzmetkerleri men etnomádenı birlestikter qolóner sheberleriniń túrki halyqtarynyń ulttyq qoldanbaly óneri men materıaldy mádenıetine qatysty uıymdastyrǵan keremet kórmesi de kóp kóńilinen shyqty.
«Búgingi keń kólemde uıymdastyrylyp otyrǵan is-sharanyń negizgi maqsaty – túrki halyqtarynyń mádenıetin, sonyń ishinde dástúri men ónerin pash etý, ulttar arasyndaǵy mádenı biregeıligin aıqyndaı otyryp, etnomádenı murany saqtaý men taratý, óskeleń urpaqqa baı dástúrimiz ben muramyzdy jetkizý. «Naýryznama» dep atalatyn onkúndiktiń de túpki maqsaty osy», dep atap ótti Mádenıet jáne aqparat mınıstrligi Mádenıet komıteti tóraǵasynyń orynbasary Sábıt Barlybaev.
Kelgen qonaqtar mýzeı foıesinde besasyq, toǵyzqumalaq, bestemshe, láńgi syndy ulttyq oıyndar oınap, máre-sáre boldy. Is-shara sońynda Naýryzdyń shashýy shashylyp, kórermender túrki halyqtarynyń ulttyq ónerin tamashalap, án men kúıge jan sýardy.
