«EKI TÚIE SÚIKENSE...» nemese apatty sý bógetiniń taǵdyry alańdatady

Bógettiń jaıy bólek

Bálkim buryn kóp adam bul sózdiń tereńine boılaı qoımaǵan shyǵar. Biraq keıingi jyldary elde aýyzsý tapshylyǵy baıqalǵan saıyn babalar eskertýiniń beker emestigine kóz jetkize túsemiz. Bul saladaǵy kúrdeli máseleniń biri – «Ertis – Qaraǵandy» kanalynyń jaǵdaıy.

Prezıdent Qasym-Jomart Toqaev elimizdegi sý máselesin, sonyń ishinde aýyzsý prob­lemasyn jyl saıyn kóterip keledi. Byltyr halyqqa Joldaýynda: «Elimiz úshin sýdyń mańyzy munaı, gaz nemese metaldan kem emes. Sý sharýashyly­ǵy júıesin tıimdi damytý máselesimen der­bes mekeme aınalysýy qajet dep sanaımyn. Sondyqtan Sý resýrstary jáne ırrıgasııa mınıstrligi qurylady» dep, osy salany qadaǵalaıtyn arnaıy organnyń paıda bolýyna muryndyq bolǵany belgili. Al jýyrda Atyraýda ótken Ulttyq quryltaıdyń úshinshi otyrysynda Qasym-Jomart Toqaev ysy­rapshyldyq taqyrybyna toqtala kele, sý máselesine taǵy da oraldy: «Bizde sýdy únemdeýge baılanysty qalyptasqan dástúr joq. Ony ashyq moıyndaýymyz kerek. Al sý bolashaqtyń baılyǵy ekenin búkil álem moıyndaıdy. Bul – Qazaqstan úshin asa mańyzdy másele. Sebebi elimizde sý tapshylyǵy paıda boldy», dedi.

Shyn máninde, qazaq dalasynda sý tap­shylyǵy eshýaqytta kún tártibinen túspegeni – belgili jaıt. О́ıtkeni jerimiz­diń jartysynan kóbi shól men shóleıt bolsa, qalǵan bóligi bastaýyn syrttan alatyn ózenderdiń sýyna táýeldi. Keńes zamanynda Ortalyq Azııanyń qumdy ólkelerin kógaldandyrý jáne Aral teńi­zin qalpyna keltirýge Sibirdiń sýy mol ózenderin Qazaqstanǵa qaraı burýdy kózdegen iri joba jasalǵan edi. О́kinishke qaraı, onyń qurylysy bastalmaı jatyp, tarıh qoınaýyna endi. Osy jobanyń bir bólshegi sanalatyn Ertis-Qaraǵandy, ıaǵnı búgingi Q.Sátbaev atyndaǵy sý arnasy ǵana sátti júzege asyp, halyq ıgiligine berilgen edi. Odan beri de jarty ǵasyrdan astam ýaqyt ótti.

Búginde osy arnanyń tozyǵy jetip, apat aldynda turǵany jıi aıtylyp júr. Keıingi jyldary Parlament depýtattary da el aýmaǵyndaǵy bire­geı jobany zerdelep, qordalanǵan másele kóp ekenin aıtýdan jalyqqan emes. «Qazsý­shar» respýblıkalyq memlekettik kásip­ornyna qaraıtyn sý arnasy – elimizdiń ortalyǵy men soltústigindegi óndiristik aımaqtardy jáne aýyl sharýashylyǵyn sýmen qamtamasyz etetin Ekibastuz, Aqsý, Qaraǵandy, Temirtaý qalalaryna jáne Vıacheslav sý qoımasy arqyly elordamyzǵa aýyzsý jetkizip otyrǵan strategııalyq nysan. Ertis ózeninen bas­taý alyp, Qaraǵandy qalasyndaǵy №1 sorǵy stansasyna deıin 458 shaqyrymǵa sozylyp jatqan arnanyń boıynda 22 sorǵy stansasy ornalasqan. Qaraǵandy qalasy Ertiske qaraǵanda 400 metrden astam bıikte ornalasqandyqtan, atalǵan sorǵy qurylǵylary sýdy joǵary tartyp, bógetterge jınaıdy. Sol jerden ári qaraı aǵyp otyrady. Qarapaıym tilmen aıtqanda, bul arna joǵarydan tómenge emes, kerisinshe, tómennen joǵaryǵa aǵyp jatqan ózen ispettes. Qazirgi kúni onyń boıyndaǵy sorǵy stansalary da, sý bógetteriniń de tozyǵy jetkeni sondaı, ýaqyt ozdyrmaı qaıta jóndeýden ótkizip, jańǵyrtý jumystary júrgizilmese, apattardyń aýyly alys emes.

О́tken jyly jeltoqsan aıynda Má­jilis depýtaty Ajar Saǵyndyqova Sát­baev sý arnasynyń búgingi adam aıarlyq jaǵdaıyn aıtyp qana qoımaı, «Qazsýshar» kásiporny sheteldik bank­terden nesıe alyp, strategııalyq mańyzy bar nysandy bankke kepildik retinde qoıǵanyn synǵa alǵan edi. «2017 jyly «Qazsýshar» sheteldik bankterden mıllıondaǵan kólemde qaryzǵa aqsha alyp, sý arnasyn kepil retinde qoıǵan. Ol aqshanyń qaıda ketip jatqanyn eshkim bilmeıdi. Al nesıe alýǵa ıtermelegen jóndeý jumystary áli aıaqtalmaǵan. Jylyna mıllıondaǵan bıýdjet aqshasy sol nesıeniń paıyzyn óteýge jumsalyp jatyr», dedi depýtat.

Al bıyl 18 aqpanda ótken Senat oty­rysynda depýtat Ernur Áıtkenov Sát­baev sý arnasyndaǵy №87 bógettiń apatty jaǵdaıda ekenin aıtyp, Úkimetten bul problemaǵa jedel nazar aýdarýdy surady. «Qazsýshar» RMK «Q.Sátbaev atyndaǵy sý arnasy» fılıalyna tıesili №4 sý torabynyń №87 bógeti apatty jaǵdaıda tur. 2019 jyly jańǵyrtý jumystary júrgizilgen bolatyn, alaıda jumystar sapasyz atqaryldy jáne tolyq kólemde jasalmaǵan. Búginde arnanyń tehnıkalyq jaǵdaıy nashar jáne qaıta jańǵyrtýdy qajet etedi. Bógetti Pavlodar oblysy ákimdigi men ortalyq memlekettik organdardyń ókilderi mamandardy tarta otyryp teksergen kezde, bóget aýmaǵynyń buzylǵany anyqtaldy», dedi E.Áıtkenov.

Iá, qazirgi kúni Q.Sátbaev atyndaǵy sý arnasyndaǵy jaǵdaıy eń kúrdeli nysan – osy №87 bóget. Onyń apattyq jaǵdaıda dep jarııalanǵanyna da on shaqty jyldyń júzi ótken. Qazir kóktem bastalyp, qar erip, elimizdiń keıbir óńirlerinde aýyl­dardy sý basyp jatyr. Soltústik óńir­de tasqyn qaýpi endi týyndap keledi. Qudaı betin ári qylsyn, eger qar sýy kúsheıip, atalǵan bógetti buzyp ótetin bolsa, Shiderti jáne Shıqyldaq sekildi birneshe aýyldy sý shaıyp, Astanany qosqanda birqatar iri qalanyń halqy aýyzsýsyz qalmaq. Naýryz aıynyń basynda «Amanat» partııasy Partııalyq baqylaý komıtetiniń tóraǵasy Pavel Kazansevtiń tóraǵalyǵymen ótken otyrysta da elimizdegi sý sharýashylyǵy nysandarynyń 70%-y tozyp turǵany, so­nyń saldarynan qaýipsizdik deńgeıi aıtarlyqtaı tómendegeni aıtyldy. 14-15 naýryz kúnderi Partııalyq baqylaý ko­m­ıtetiniń jumys toby Sátbaev sý ar­nasynyń Pavlodar oblysy aýmaǵynda ornalasqan №87 bógetiniń jaǵdaıyn kózben kórý maqsatynda arnaıy saparǵa shyqqan bolatyn. Biz de osy jumys toby quramynda bolyp, birneshe jyldan beri sheshilmeı kele jatqan kúrdeli máseleniń mánisine jan-jaqty úńilip, jýrnalıstik zertteý júrgizbekke bel býdyq.

Aıaqsyz qalǵan jumys

Birden aıta keteıik, №87 bóget sý qoı­masynyń mıllıondaǵan tekshe metr sýyn áreń ustap tursa da, áli kúnge jóndeý jumystary aıaqsyz qalýyna «Qazsýshar» RMK men bas merdiger «Gıdrospesstroı» JShS arasyndaǵy birneshe jylǵa sozylǵan sot úderisi sebep bolyp otyr. Pavlodar oblysyna arnaıy saparǵa shyǵyp, jýrnalıstik zertteý júrgizemiz degende eki tarap ta bizdiń bul bastamamyzǵa úrke qarap, kúdiktenip qarsy aldy. Olardyń bul pıǵylyn «Ne sebepti aıaqastynan keldińder? Bul prob­lemaǵa qalaısha qyzyǵa qaldyńdar? Bul kimniń tapsyrmasy?» degen syndy tosyn suraqtarynan-aq ańǵarýǵa bolatyn edi. Biz kúrdeli jaǵ­daıda turǵan bógetti óz kózimizben kórýdi maqsat tutqanymyzdy aıtyp, sý arnasy basshylyǵy jáne «Amanat» partııasy ortalyq apparatynyń partııalyq baqylaý ınspektory Aıjan Ysqaqovamen birge №87 bógetke at basyn burdyq.

Dál osy jerde sý arnasy boıyndaǵy sorǵy stansalarynyń biri ornalasqan. 2015 jyly bógettiń 1,5 shaqyrymnan astam ýchaskesin «Antares Platinum» JShS apatty jaǵdaıda dep tanyǵan. 2018 jyl­dyń aıaǵynda «Qazsýshar» RMK men «Gıdrospesstroı» JShS arasyn­da «Qanysh Sátbaev atyndaǵy sý arna­synyń №4 sý toraby №87 bógetin qaıta jańǵyrtý» týraly quny 6,2 mlrd teń­geni quraıtyn kelisimshartqa qol qoıy­lypty. 2019 jyldyń naýryz aıynda «Gıdrospesstroı» JShS bógetti qaıta jańǵyrtýdyń memlekettik saraptamadan ótken jumys jobasyn ózgertý týraly bastama kóterip, apatty ýchaskege shpýntty qabyrǵanyń ornyna bur­ǵyıneksııaly tireýishten qabyrǵa ornatýdy usynady. Bul ózgertýdi tapsyrys berýshi «Qazsýshar» RMK qoldap, sol jyldyń aıaǵynda memlekettik saraptamadan ótedi. Negizi bul jumystar 2019 jyly bastalyp, 2020 jyldyń aıaǵynda bitýge tıis bolatyn. Alaıda jumys jobasyn óz­gertip, oń saraptama qorytyndysyn alý­ǵa bir jylǵa jýyq ýaqyt ketýine baılanys­ty tek 2020 jyldyń ortasynda bastalǵan.

Degenmen birneshe aı óter-ótpesten tapsyrys berýshi «Qazsýshar» RMK jasalyp jatqan jańǵyrtý jumystarynyń sapasyzdyǵyn eskertip, keıin kelisimshart toqtatylady. Osy jerde bir túsiniksiz jaıt, «Qazsýshar» basshylyǵy «Gıdro­s­pesstroı» JShS 2020 jyldyń qarasha aıynda burǵylaý tehnıkalaryn alyp ketip, jumysty óz betinshe toqtatty dese, bas merdiger kerisinshe tapsyrys berý­shi tarap jumysty doǵarýdy talap etti dep olardy kinálaıdy. Iаǵnı eki jaq ta bógetti jańǵyrtý jumystarynyń toqtap qalýyna bir-birin aıyptap otyr. «Eki túıe súıkense, ortasynda shybyn óledi» demekshi, eki tarap arasynda júrip jatqan osyndaı «soǵys» saldarynan 2020 jyldan beri bóget ýchaskesinde eshqandaı jóndeý jumystary júrip jatqan joq.

Bizben birge nysandy kórýge bar­ǵan «Q.Sátbaev atyndaǵy sý arnasy» basshysynyń orynbasary Ǵabıt Aman­geldınniń aıtýynsha, jumys toqtaǵannan keıin de «Qazsýshar» RMK birneshe ret memlekettik satyp alý baıqaýyn jarııalaǵanymen, pandemııadan keıin qurylys materıaldarynyń baǵasy qym­battap ketýine baılanysty bul jumysty qolǵa alatyn merdigerler tabylmapty.

– «Gıdrospesstroı» bógettiń ishki betindegi burynǵy beton qabatyn alyp tastap, ornyna jańasyn quıýdy bastaǵan edi. Biraq bul jumys aıaqsyz qaldy. Sonyń saldarynan qabyrǵanyń ishki topyraq beti jalańashtanyp, sý shaıa bastady. Biz ol jerge óz kúshimizben 2 myń tekshe metr kóleminde taý tastaryn tóktik jáne qazir sý deńgeıin tıisti shamadan 30-40 sm tómen ustap otyrmyz. Sondyqtan kóktemgi qar erý maýsymyna daıynbyz, bógettiń buzylý qaýpi joq, – dep sendirdi ol.

Degenmen qansha jerden jasyryp-japqanmen bógetten tóner qaýiptiń bary aıdan anyq. Ol jerge taý tastaryn tókke­ni­­men, onyń sapaly jóndeý sekildi bolmaıtyny taǵy belgili. Biz ony kózi­miz­ben kórdik. Bir qaraǵanda 1,5 shaqy­rymǵa sozylǵan bóget myzǵymaı turǵan sekildi. Biraq burynnan turǵan beton qabaty alynyp tastalǵan, onyń ornyna tas tógilgen. Keı jerlerinde jańa­dan beton quıylypty. Al bóget qabyr­ǵa­synyń ústinen jer astyna qaraı burǵyınek­sııalyq baǵandar ornatylǵan. Bunyń bári – «Gıdrospesstroı» JShS-nyń jasap úlgergen jumystary. Alaıda sý arnasy bas ınjeneriniń aıtýyn­sha, bul jumys­tyń bári sapasyz. Tipti atalǵan burǵyıneksııalyq baǵandar da túbine deıin jetpegen. Ony tipti ekskovatormen qazyp kórgende kóz jetkizgenin aıtady. Iаǵnı qaýip-qaterdiń bar ekenin sý arnasy ókilderiniń sózderinen-aq ańǵarý qıyn emes.

Kim kináli?

О́kinishke qaraı, kóp rette máseleniń aldyn alýǵa tyryspaı, «bolary bolyp, boıaýy sińgen» soń qozǵalatynymyz bar. Sonyń bir mysaly – osy №87 bóget. Eger on shaqty jyl­dan beri jaǵdaıy kúrdeli bolyp turǵan to­pyraq qabyrǵany sý buzyp ótse, onyń arty ne bolaryn shamalaý qıyn emes. 2010 jylǵy Almaty oblysyndaǵy Qyzyl­aǵash oqıǵasy nemese 2020 jylǵy О́zbekstandaǵy Sardoba bógetiniń tragedııa­sy bul sózimizge mysal bola alady.

Biz Sátbaev sý arnasyndaǵy №87 bógettiń qazirgi ahýalyna sebepshi bolyp otyrǵan eki tarap – «Qazsýshar» RMK men «Gıdrospesstroı» JShS-na arnaıy habarlasyp, eki jaqtyń da pikirin tyńdap kórdik. «Qazsýshar» respýblıkalyq mem­lekettik kásipornynyń bas dırektory Baqytjan Kemelbekovtiń aıtýynsha, 2020 jyly sý arnasyn qaıta jańǵyrtý jumystary toqtap, 2021 jyldyń basynda kelisimshart úzilgennen keıin 2022 jyly «Gıdrospesstroı» JShS sotqa aryz túsirgen. Olar bógette jasaǵan jumystaryn 2,2 mlrd teńgege baǵalap, ony «Qazsýshar» mekemesinen óndirip alýǵa tyrysqan.

– Sot-qurylys saraptamasy nysan basyna baryp, jasal­ǵan jumys barysyn tekserip, talap etilip otyrǵan soma zańdy dep sheshim shyǵa­ryp, bas merdigerdiń talabyn qanaǵat­tandyrdy. Biz onymen kelispeı, Bas prokýratýraǵa narazylyq túsirdik. Keıin qaıtadan sot bolyp, Joǵarǵy sottyń aralasýymen aldyńǵy sheshim ózgertilip, 2023 jyly «Qazsýshar» tarapynan bas merdigerge tólenýge tıis soma 340 mln teńgege deıin azaıtyldy. Qalǵan 1,8 mlrd teńgeniń jumysy talapqa saı oryndalmaǵan. Biz byltyr atalǵan somany «Gıdrospesstroıǵa» tolyqtaı tólep berdik, – deıdi ol.

Al «Gıdrospesstroı» JShS prezı­denti Vladımır Trashınniń aıtýynsha, onyń mekemesi osy salada 62 jyldan beri jumys istep kele jatqandyqtan, tájirıbesi mol. Sondyqtan bógetti qaıta jańǵyrtý boıynsha alǵashqy jumys jobasyndaǵy shpýntty qabyrǵa ornatýdyń tehnıkalyq jaǵynan óte qaýip­ti ekenine kóz jetkizgen.

– Sol sebep­ti biz jumys jobasyn ózgertip, bur­ǵyıneksııaly tireýishterden qabyrǵa ornatý durys ekenin aıttyq. Ony arnaıy mamandar qoldady. Qolymyzda barlyq qujat bar. Bul ózgertý «Qazsýshar» tarapynan da qoldaý taýyp, jumysty bas­tap ketken edik. Biraq tapsyrys berý­shi jumysty orta joldan toqtatty. Soǵan qaramastan byltyr jazda komıssııa teksergende, bóget qabyrǵasynan sý ótip jat­qany baıqalmady. Biz olardyń ózderi bekitip bergen jumys jobasynan aýyt­qyǵan emespiz. Aldymyzǵa qoıǵan talapty oryndadyq. Al eger shynymen qabyrǵadan sý ótip jatsa, bul ózderiniń kinási, – deıdi ol.

V.Trashın aradaǵy kelisimsharttyń úzilýine sebepterdiń biri – jumystardyń merziminde oryndalmaýyna da «Qazsý­shar» kásipornyn kinálap otyr. О́ıtkeni olar sapaly jumys jobasyn usynbaǵan jáne ony túzeýge kóp ýaqyt ketirgen. «Gıdrospesstroı» JShS basshylyǵy alǵashqy sotta jáne odan keıingi apellıa­sııalyq alqa sotynda jeńip shyqqanymen, keıin Bas prokýratýranyń aralasýymen ol sheshimniń ózgertilýin zańsyz deıdi.  «Bas prokýratýranyń aralasýynan keıin sot isti «Qazsýshardyń» paıdasyna sheship bergen soń shekten shyqqan bylyq pen absýrd bastaldy. Joǵarydan buıryq berilgen soń, talabymyzdy keri qaıtarýǵa zańsyz «negizdemeler» tabyldy. Sottar men prokýrorlardyń qoldaýyna súıengen «Qazsýshar» RMK bizdi «josyqsyz oryndaýshy» dep taný arqyly jazalaýǵa kiristi», deıdi V.Trashın.

Degenmen «Gıdrospesstroı» JShS tarapy bizge bergen málimetinde №87 bógetti qaıta jańǵyrtý jumystarynyń toqtaýyna onyń sapasyzdyǵy emes, «Qazsýshar» RMK, bas jobalaýshy «Antares Platinum» men avtorlyq qadaǵalaýshy tarapynan bolǵan alaıaqtyq pen sybaılas jemqorlyq degen ýáj aıtady. Kásiporyn basshylyǵynyń aıtýyn­sha, olar 2021 jyly 15 naýryzda sol kezdegi Ekologııa, geologııa jáne tabıǵı resýrstar vıse-mınıstri S.Qojanııazovqa jazǵan hatynda ózderinen barlyq jasalǵan jumystyń kedergisiz qabyl­danýy úshin 500 mln teńge para talap etilgenin jetkizgen. «Biz osy faktiler boıynsha mınıstrlikke de, Sý resýrstary komıtetine de shyqtyq. Alaıda eshqaısysy buǵan nazar aýdarmady. Tek Pavlodar oblysy Polısııa departamenti ǵana aryzymyz boıynsha sotqa deıingi qylmystyq tekserýdi bastap, saraptama júrgizdi, kýágerlerden jaýap aldy. Alaıda sot úderisteriniń júrip jatýy­na baılanysty is toqtatyldy», deıdi V.Trashın bizge bergen jaýabynda. Osy oraıda aıta keteıik, «Gıdrospesstroı» JShS sybaılas jemqorlyq faktileri boıynsha Antıkorǵa da júgingen eken. Alaıda Sybaılas jemqorlyqqa qarsy is-qımyl agenttiginiń Astana qalasy boıynsha departamenti «Qazsýshar» RMK qyzmetkerleri tarapynan sybaılas jemqorlyq qylmystarynyń belgileri baıqalmaǵan», dep jaýap qaıtarǵan.

Árıne, biz óz tarapymyzdan osy sot isi boıynsha daýlasyp jatqan eki taraptyń birin kinálaýdan ne qoldaýdan aýlaqpyz. Maqsatymyz – osyndaı problemanyń bolyp jatqanyn kórsetý jáne sonyń saldarynan el halqynyń úshten birin, ıaǵnı 6,5 mıllıon adamdy aýyzsýmen qamtamasyz etip otyrǵan sý arnasynyń apattyq jaǵdaıda turǵanyn jetkizý. Sondyqtan eki taraptyń da bizge usynǵan málimetterin jan-jaqty berýge tyrystyq. Aıta keteıik, «Qazsýshar» RMK sotta jeńip shyqqannan keıin «Gıdrospesstroı» JShS-yn «josyqsyz oryndaýshy» dep taný úshin Pavlodar oblystyq sotyna qaıta aryz túsirgen. Biz osy maqalany daıyndap jatqanda, ıaǵnı 19 naýryz kúni sot otyrysy ótip, «Qazsýshardyń» talaby qanaǵattandyryldy.

Ne isteý kerek?

Kásiporynnyń bas dırektory Ba­qytjan Kemelbekovtiń aıtýynsha, qazirgi tańda «Qazsýshar» RMK «Sátbaev atyndaǵy sý arnasy» fılıalymen birlesip, jańa jumys jobasyn ázirleýdi bastap ketken. «Biz jumys jobasyn qaıta jasap jatyrmyz. Árıne, atqarylatyn jumystyń quny burynǵydan kóp bolady. Sebebi qazir qurylys materıaldary qymbattap ketti. Bıyl nemese kelesi jyly biz bógetti qaıta jańǵyrtý jumysyn tolyq aıaqtaımyz. Ol úshin basqa merdiger izdeımiz nemese óz kúshimizben atqaramyz», dedi ol.

Biz Baqytjan Kemelbekovten sóz basynda aıtylǵandaı, Sátbaev sý arnasyn sheteldik bankke kepilge qoıyp alǵan aqshanyń qaıda jumsalyp jatqany belgisiz ekeni týraly depýtat Ajar Saǵyn­dyqovanyń synyna qatysty pikir bildirýin suradyq. «Qazsýshar» dırek­to­rynyń aıtýynsha, sý arnasynyń shetel bankine kepilge qoıylǵany týraly málimet jalǵan! «Bizdiń Eýropalyq bank pen Islam damý bankinen jalpy somasy 300 mln dollardan asa nesıe alǵanymyz ras. Onyń kepili – Úkimet. Eger biz tóleı almaı qalǵan jaǵdaıda, ony Úkimet óteýge mindettenedi. Alaıda biz oǵan jol bermeımiz. Byltyrdan beri sol nesıeni óteýdi bastadyq. Ony alǵan sebebimiz – Memleket basshysy 5 jyl ishin­de 600 myń gektar sýarmaly jerlerdi qalpy­na keltirýdi tapsyrǵan edi. Muny oryn­daýǵa respýblıkalyq bıýdjette qara­jat bolmaǵandyqtan, biz 2017 jyly nesıe alý týraly sheshim qabyldadyq», dedi B.Kemelbekov.

Biz «Amanat» partııasy ortalyq apparatynyń partııalyq baqylaý ıns­pektory Aıjan Ysqaqovamen Pavlodar oblysyndaǵy №87 bógetke barǵan saparymyzda kóterilgen taǵy bir másele – sý qoımalary men arnanyń terrorızmge qarsy qorǵalýy. Bul – strategııalyq nysan, alaıda onyń aınalasyna Úkimettiń talaby boıynsha terrorızmnen qorǵaýǵa arnalǵan qorshaý jasalmaǵan. «Jaman aıtpaı, jaqsy joq» arna sýy qandaı da bir zııandy qaldyqpen búlinse, oǵan kim jaýap beredi?

«Qazsýshar» RMK bas dırektory Baqytjan Kemelbekovke osy suraqty qoıdyq. Onyń aıtýynsha, bul – birneshe jyldan beri kóterilip kele jatqan másele. «Úkimettiń talaby bary ras. Prokýratýra jyl saıyn tekserip, terrorızmge qarsy qorshaý joqtyǵy úshin bizdiń fılıaldarymyzǵa 3-4 mln teńge aıyppul salyp ketedi. Sý resýrstary jáne ırrıgasııa mınıstrligi qurylǵannan keıin biz bul máseleni taǵy da kótere bastadyq. Atalǵan qorshaýdy óz kúshimizben ornatýǵa qarajatymyz joq», dep jaýap berdi.

Biz osy suraqty atalǵan mınıstrliktiń Sý sharýashylyǵy qurylystaryn jáne gıdromelıoratıvtik júıelerdi damytý basqarmasynyń bastyǵy Erdos Quljan­bekovke de qoıǵan edik. Onyń aıtýyn­sha, sý qoımalaryna qorshaý jasap, ony kúze­týdiń eshqandaı da qısyny joq. О́ıtkeni sý­dy ýlaımyn degen adam júzdegen shaqy­rym sý arnasynyń kez kelgen jerine baryp sony isteı alady. «Al búkil júzde­gen shaqyrym arnanyń boıyn beton qa­­byr­ǵamen qorshap, oǵan kúzetshi qoıý qan­sha­­lyqty aqylǵa syıa­dy?», dep jaýap berdi ol.

Prezıdent arnaıy mınıstrlik quryp, sý máselesin júıeli túrde retteýdi tapsyrdy. Qazir «Amanat» partııasynyń Partııa­lyq baqylaý komıteti bul problemany óz baqylaýynda ustap otyr. Bizdiń baıqaýymyzsha, bul saladaǵy eń ózekti problemanyń biri – máselesi on jyldan beri sheshilmeı kele jatqan Q.Sátbaev atyndaǵy sý arnasynyń jaǵdaıy.

Astana – Pavlodar – Astana