Foto: 7kun.kz
Ekologııalyq retteý jáne baqylaý komıtetiniń málimetinshe, 2022 jyly «North Caspian Operating Company» (NCOC) kompanııasynyń teńiz keshenine tekserý júrgizilgen. Sonyń nátıjesinde birneshe buzýshylyq anyqtalǵan. Onyń ishinde ekologııalyq talaptardy buzý, ekologııalyq ruqsatsyz kúkirtti gazdy jaǵý, óndiristik sýlardy Kaspıı teńizine tazartýsyz aǵyzý faktileri bar.
«NCOC kompanııasyna qatysty 5 ákimshilik is qozǵaldy. Ákimshilik ister Atyraý qalasynyń ákimshilik quqyq buzýshylyq jónindegi mamandandyrylǵan sotynda qaraldy. Bıylǵy aqpan aıynda Atyraý qalasy sotynyń apellıasııalyq satysymen kompanııaǵa 12 mlrd 419 mln teńge kóleminde aıyppul salyndy. Aıyppul tolyq kólemde tólendi», dep habarlady atalǵan komıtetten.
Qazir buzýshylyqtardy joıý týraly buıryq Joǵarǵy Sotta qaralyp jatyr. Degenmen, Astana qalasy sotynyń 1-shi jáne 2-shi satysynda nusqama zańdy jáne negizdelgen dep tanylǵan.
