Ádebıet synshylary, jalpy oqyrman qaýym tarapynan jazýshynyń «Qyran qalǵymaıdy» atty povester jınaǵy, «Taý joly», «Ekinshi ómir» atty romandary asqan shabytpen jazylǵan baǵaly eńbek retinde jyly qabyldansa, ómirdiń ózekti máselelerin kótergen «Jer taǵdyry», «Seksen bestiń kóktemi», «Adaspańdar, adamdar», «Syńsyp ushqan syńar aqqý» atty shyǵarmalary da sýretkerdi kórkem sózdiń sheberi retinde tanytty. Qalamgerdiń «Jıyrmasynsha ǵasyr», «Uıyq», «Tuıyq» romandary ádebı qaýym tarapynan túrli deńgeıde laıyqty baǵasyn aldy. Al respýblıkalyq jáne oblystyq teatrlar sahnasynda qoıylǵan «Daýyl», «Erteń bıýro», «Tozaq sheńberi» spektaklderi qoǵamnyń ózekti máselelerin qozǵaǵan qundy qoıylym retinde kórermen júreginen oryn aldy. Osy oraıda «Sábıt Dosanovtyń romany óte qyzyq, ótkir, talantty. О́tkir bolyp, darynsyz bolsa – bul úgit. Eger talantty, ádebı áleýeti myqty bolsa, bul – ádebıet!» dep jazýshynyń qalam qýatyn dóp basqan Reseı Memlekettik syılyǵynyń laýreaty, aqyn Oleg Shestınskııdiń bergen baǵasy – shyn baǵa.
Qalamger atqarýshy bılikpen, isker azamattarmen tyǵyz baılanys ornatyp, olardy shyǵarmashylyq álemine tartyp júretin. Bir aıta keterligi, jazýshy Máskeý men TMD qalamgerlerimen de qoıan-qoltyq qarym-qatynasta boldy.
Jazýshy Sábıt Dosanovtyń somdaǵan kórkem beıneleri, iskerligi qazirgi ádebıettiń talǵam tarazysynda baıyptalyp, jurtshylyqpen birge jasaı beredi dep sanaımyz.
