«Eshkimge qor bolmaıdy azat basym,
Janymdy jar aımalap, jaz aptasyn!
Tasty oıý – tańdaı qaqqan tamshyǵa syn,
Qasqaıý – qasqyr qandas qazaqqa syn!
Basynyp basymnan sóz asyrmańdar,
Ejelden egiz uǵym – Lashyn, Zańǵar.
Jetesi jeti atadan ári ketken,
Talystaı tamyrymda asyl qan bar!..».
Aqyn asqaqtatqan soıqan salar jasyn minez búginde el qyzmetindegi er-azamattardyń báriniń birdeı boıynda bolmaı tur.
Kezinde ózimiz kýá bolǵan myna bir oqıǵa kesheli beri eske túse berdi. Múmkin sý sharýashylyǵymen baılanysty bolǵandyqtan shyǵar. Osydan onshaqty jyl buryn Jambyl oblysynyń Qordaı aýdanynda Qazaqstan men Qyrǵyzstan tarapynyń úkimetaralyq kezdesýi boldy. Sol jylǵy sý tapshylyǵynan transshekaralyq Shý, Talas ózenderinen nár alatyn jambyldyq Qordaı, Shý, Baızaq aýdandaryndaǵy 45 myń gektarǵa jýyq sýarmaly alqapqa qurǵaqshylyq qaýpi tónip turǵan.
Qyrǵyzstan tarapy Ortalyq Azııa elderine ortaq erejedegi kelisimdi buzyp, Shý men Talas ózenimen bizdiń elge ketetin sý kólemin normatıvten tómen jiberip otyr eken. Iаǵnı olarda da sý tapshylyǵy sezilip, dıqandary bas kótergen kórinedi. Amal joq, olardyń Ortotoǵoı jáne Kırov sýqoımalarynan bizge shyǵatyn arnany bógeýine týra kelgen. Saldarynan Jambyl oblysynyń myńdaǵan gektar sýarmaly alqaby dıqandardyń kóz aldynda qurǵap bara jatty. Álgi jınalysta qyrǵyz tarapy túrli syltaý aıtyp, kónetin túri joq. Sol sátte elimizdiń Sý komıtetiniń sol kezdegi tóraǵasy Islam Ábishev sóz alyp, qyrǵyzstandyq áriptesin tyǵyryqqa tirep, ábden qyzartty. Eks-tóraǵanyń aıtýynsha, keńes ókimeti tarap, burynǵy odaqtas elder óz-ózderine endi kelip jatqan tusta ortaazııalyq elderdiń sý sharýashylyǵynyń basshylary Almatyda úlken dastarqanda bas qosyp, baýyrlas elder retinde qol alysyp, resmı de, beıresmı de kelisimge kelgen eken. Iаǵnı I.Ábishev: «Sý bólisý tóńiregindegi máseleler memleketter arasyndaǵy janjalǵa sep bolmaýy kerek, sý komıtetteriniń basshylary sony úlken daýǵa aınaldyrmaı, ózimiz-aq rettep otyraıyq dep keliskenimiz qaıda qaldy? Sol kezde ekeýimiz de qol alysyp edik qoı», dep dala zańyna tán minez tanytyp edi áriptesi sózge toqtap, sol jerde telefon arqyly Shý ózeniniń qulaǵyn ashtyrtty. Keıde mundaı daýly máselede dittegen maqsatqa jetý úshin bizdiń qazirgi sheneýnikterdiń de minez tanytýy qajet sııaqty. «Ultqa qyzmet etý bilimnen emes, minezden» degen edi ǵoı Alash ardaqtysy Álıhan Bókeıhan.
Jalpy, ultymyzdyń minezi týraly mysal qaı ortada, qoǵamnyń qaı salasynda bolsyn jeterlik. 86-nyń jeltoqsanynda ádildiktiń jalaýyn alańǵa ustap shyqqan jastar taǵdyrdyń tepkisinen myń ólip, myń tirilgen ultymyzdyń rýhynyń áli óshpegenin áıgiledi. Sıdneı Olımpıadasyndaǵy Muhtarhan men Bekzattyń jeńisi kezdeısoq emes, namystan týǵan ór minezden ekenin búgingi urpaq jattap ósýge tıis. Muhtarhanǵa bapkerler áıgili alyp boksshy Rýbalkabamen rıngke shyqpaı-aq qoıý jóninde keńes berip, kóndire almapty, al Bekzattan otandyq Olımpıada komıteti aıtarlyqtaı úmit kútpepti. Namystan qaıralǵan jigitterdiń biri – Muhtarhan ómiri jeńilmegen kýbalyqty alyp ursa, Bekzat barlyq qarsylasyn basym upaımen utyp shyqty...
Al búgin she? Búgin jarty Qazaqstandy sý basyp, qabyrǵamyz qaıysyp otyr. Jaýaptylardyń túrli syltaýyn, aqtalýyn estip boldyq. Biraq aldyn ala qamdanǵan naqty is-áreketterin kórmedik.
Kesheli beri áleýmettik jelide Atyraý oblysynyń Mııaly aýylyndaǵy jaǵdaı qyzý talqylanyp jatyr. Ras bolsa, aýyldyń baskóterer azamattary jergilikti atqarýshy bıliktiń qyr sońynan qalmaı alda qıyndyq týǵyzýy múmkin qarǵyn sýdyń qaýpin seıiltýge erte qamdanǵan eken. Mııalynyń tóbesindegi qus ushar bıikten túsirilgen beınetaspadan bul aýyl quddy bir teńizdiń ortasynda ornalasqan ba dersiń. Aýyldy qorshaı, antalap turǵan tasqyn sýdyń dambadan syzat tappaı turǵany aýyldyń yntymaq-birliginiń, azamattarynyń tabıǵattyń tosyn minezine qarsy turǵan jasyn minezin áıgilep turǵandaı eken.
Alda kóktemniń jer qyzdyryp, tirshilikke jan bitirer jyly kúnderi kele jatyr. Al alty aı boıy qys qursaýynda jatatyn Altaı jaqta toń áli jibigen joq...
