– Debıýtke qalaı daıyndaldyńyz jáne balettiń mýzykalyq bóliginiń qandaı aspektileri sizge erekshe qyzyqty boldy?
– «Don Kıhot» – álemdik balet repertýarynyń klassıkasy, bul spektakldiń paıda bolǵanyna júz jyldan asty. L.Mınkýs – ataqty kompozıtor, dırıjer, daryndy ustaz, keremet skrıpkashy. Onyń ishekti aspaptar tobyna jarqyn kúıler shyǵarýy sondyqtan bolar. Munymen qosa, ol osy balet mýzykasynda oıyp turyp oryn aldy. Kompozıtordyń bıge arnalǵan mýzykany óte kelisti jazǵanyn aıta ketýimiz kerek. Tańǵajaıyp mýzyka óziniń kórkemdigimen, jaıdarlylyǵymen erekshelenedi, sondyqtan týyndynyń kóńil kúıine tolyq ený úshin men orkestrdiń barlyq aspaptarynyń partııalaryn meńgerýge aıryqsha kóńil bóldim. Keıipkerlerdiń san alýan emosıonaldyq kúıleri men sıýjettiń dramalyq betburysyn mýzyka arqyly jetkizý múmkindigi meni erekshe qyzyqtyrdy.
– Mýzykalyq ınterpretasııa kórermenderdiń baletti qabyldaýyna áser ete ala ma?
– Iá, árıne, kórermenderdiń opera nemese baletti qabyldaýynda mýzykalyq ınterpretasııanyń mańyzy zor. Ol qaıtalanbas atmosfera jasap ári aýdıtorııany qyzyqtyra otyryp, sıýjettiń emosıonaldyq tereńdigin, dramalylyǵyn nemese ázil-syqaqtyǵyn aıshyqtaıdy. Jalpy, mýzykanyń tabıǵatyna eksperıment tán ǵoı. Shynaıy ónerde shekara bolmaıdy.
– О́nerdi beıneli, úndesken hám úılesimdi birtutastyqqa jetkizý úshin bir ýaqytta horeograf, ártister jáne orkestr mýzykanttarymen áriptestikti qalaı júzege asyrasyz? Dırıjerlik basqarýdaǵy óz tájirıbeńizdi aıtyp berińizshi.
– Eger baletke dırıjerlik etý kerek bolsa, men árqashan horeografııalyq mátinniń qyr-syrymen tanysyp, túsinip, tipti ony jattap alý úshin aldymen balet klasyna baramyn. Sondaı-aq solısterdiń qarqynyn, shyǵarmashylyq áleýetin sezinýim úshin mindetti túrde basty partııalardy kimderdiń oryndaıtynyn bilýim kerek, bul jalpy sahnalardaǵy kordebalettiń jumysyna da qatysty. Ári qaraı jumys barysynda qoıýshy horeograftyń kimge basymdyq bergeni túsinikti bola bastaıdy. Sodan keıin ǵana orkestr ártisteriniń daıyndyǵyna kirise alamyn. Bul jerde men ózimniń ınterpretasııamdy mýzykalyq jaǵynan tııanaqty etý úshin ǵana tyryspaımyn, sonymen qatar barlyq erekshelikterdi túsine otyryp, ony daıyndyqta kóp ýaqytymdy birge ótkizgen balet ártisteri úshin túsinikti etkim keledi. Sondyqtan bul – ortaq eńbekti, turaqty baılanysty, ózara áreket pen oı-pikir bólisýdi talap etetin kóp satyly úrdis. Biryńǵaı úılesimdi óner kórsetý úshin barlyǵyn árbir oryndaýshy ózin jalpy mýzykalyq jobanyń mańyzdy býyny retinde sezinetindeı etip uıymdastyrý qajet dep oılaımyn.
– Aıtarlyqtaı az ýaqyttyń ishinde-aq siz «Astana operada» úlken jumys atqardyńyz. Osy kezeń ishinde eń kóp este qalǵan jarqyn, jemisti sáttermen bólisińizshi...
– «Astana operadaǵy» árbir jańa spektaklim – dırıjer retinde men úshin zor tájirıbe, oǵan úlken jaýapkershilikpen qaraımyn. Sondaı-aq men kásibı turǵyda jetilip jatqanymdy túsinemin, kún saıyn dırıjerleýdiń manýaldy jáne kórkemdik tásilderi boıynsha jańa nárseni bilemin. Sondyqtan jańa jobalardy alǵa qadam basýǵa talpynys retinde qabyldaımyn. «Astana opera» meniń stýdent kezimdegi bir armanymdy oryndady desem bolady, munda N.A.Rımskıı-Korsakovtyń mýzykasyna «Sheherazada» baletinde dırıjerlik debıýtim ótti. Shynymdy aıtsam, bul sımfonııalyq sıýıta emes, balet bolady dep oılaǵan joq edim. Aıtýly shyǵarmaǵa S.Rahmanınovtyń «Sımfonııalyq bılerimen» birdeı dırıjerlik etýdi armandadym. Alda baǵyndyrar belesterim, iske asyrǵym keletin jobalarym óte kóp. Sondyqtan qymbatty kórermenderimizge qýanysh pen shabyt syılaý úshin tynbaı eńbek etýdi, áriptesterimnen tájirıbe alýdy jalǵastyra beremin. Jaqynda patsha kóńildi kórermenderimizdi «Don Kıhot» spektaklinde kútemiz.
– Áńgimeńizge rahmet.
Áńgimelesken –
Nazerke JUMABAI,
«Egemen Qazaqstan»
