Foto: aikyn.kz
Mahambet aýdany ákimdiginiń málimetine súıensek, munda 9 okrýgtegi 21 eldi mekende 30 940 adam turady. Jaıyq ózenine jaqyn ornalasqan 17 aýyldyń mańynda 105 shaqyrym bóget salynǵan.
«Qazir 15 mektepte dáris alatyn 6 288 oqýshy sabaqty onlaın oqyp júr. Aýdanda 22 evakýasııalyq pýnkt ashylyp, sý basý qaýpi tónse, turǵyndardy qabyldaýǵa daıyn tur. Qaýipsiz aımaqqa 5 400 tórt túlik shyǵaryldy», dep habarlady aýdan ákimdigi.
Aýdan ákimi Qaırat Nurlybaevtyń aıtýyna qaraǵanda, Jaıyq ózeniniń jaǵalaýynda kezekshiler úshin 40 beket ashylǵan. Sý aıdynyna jaqyn mańdaǵy aýyldarda jaǵalaýdy bekitý jumysy jalǵasyp jatyr. Oǵan áskerı bólimderdiń 651 sarbazy, Tótenshe jaǵdaılar mınıstrligine qaraıtyn qurylymdardan 200 qyzmetker, 320 erikti men 108 tehnıka tartylǵan.
«Jaıyq ózenine kelip jatqan sý aldyn ala tazartylyp, daıyndalǵan kanaldarǵa aǵyp jatyr. Bógetter, saı, jyralar ashyldy. Ázirge ózendegi sý deńgeıi qaýipti shegine jete qoıǵan joq. Biraq aldaǵy kúnderi mol sý kelýi múmkin», deıdi Qaırat Nurlybaev.
