Áýdem jer júrgen soń, kózińe aqynnyń qulpytasy ottaı basylady. О́mirin óleńmen órnektegen aqynnyń qulpytasyna qarap, taǵdyrdyń san taraýly jolynda talaılarmen taıtalasyp, jan muńy men syryn júregine júk artqandaı arqalap ótken Tomanov beınesi kóz aldyńda asqaqtaı túskenin sezinesiń.
Taǵdyrdyń mańdaıǵa mórlep basqan, ólshep bergen jasynan asyp qaıda barasyń? О́lim Serik Tomanovtyń ózine úkim shyǵarsa da, óleńine úkim shyǵara alǵan joq. Tomanov beıitiniń basyna barǵan jastardyń qarasyna qarap-aq osyndaı oı túıesiń. Kózi ketse de, sózi jastardyń qurdasyndaı, syrlasyndaı bolǵanyna kúmániń qalmaıdy. Aqynnyń baqyty da osy shyǵar deısiń sosyn...
«Sharýa edim tirliktiń kóshine ergen,
Taýsap tattym jerdegi nesibemnen.
Kóp jyl boldy máńgilik uıqydamyn,
Topyraǵym buıyrdy osy jerden».
Tirisinde Talastyń arnasyndaı tasyp, myńjyldyqtardyń qurdasyna aınalǵan Tarazdyń topyraǵynan nár alyp ótken aqynnyń qulpytastaǵy jazýy sol jaqtaǵy judyryqtaı etti julqyp-julqyp jiberedi. Aıaýly aqynnyń shashyn silkip óleń oqyǵan beınesi kóz aldyńda turyp alady. Sózi de, ózi de shynaıylyqtan alys ketpegen Tomanov áleminiń shetsiz-sheksiz tuńǵıyǵyna batyp ketesiń...
Párýana-ǵumyr kóbelek syndy jalp etkenine de biraz jyldyń júzi boldy. Alaıda Seriktiń ózi ólse de, sózi ólgen joq. Ol óleńdi bárinen bıik qoıdy. Áldekimder sekildi arman qýǵan joq, mýzany izdedi. Jyrymen jaýraǵan júrekterdi jylytty, muńǵa batqan oqyrmandarymen syrlasty. Sodan da bolsa kerek, onyń óleńderin jatqa oqıtyn birneshe býyn ókili qalyptasty. Osylaısha, rýhanı keńistigin keńeıtip ketti.
Qulpytastaǵy jazýyna qaıta telmiresiń. Telmiresiń de, alýan túrli oıdyń jeteginde ketesiń. Janyńdy jańa mazdap janǵan ottyń jalyny sharpyp ótkendeı kúı keshesiń.
«Bir kisideı shaıqap em tirligimde,
Jalǵan dúnıe jalt etpeı turdy kimde?!
Adamdarǵa aıqaıdy salar edim,
Amalym joq, qaıteıin bildirýge»,
depti aqyn tirisinde jazǵan «Epıtafııasynda».
Aqjalyn aqynnyń «Adamdarǵa aıqaıdy salar edim, amalym joq qaıteıin, bildirýge», dep keletin eki tarmaǵynan onyń ózegine túsken ókinish órtin jan júregińmen sezine túsesiń. Basqany oılamaı, taǵdyryn tasqa jazǵan aqynnyń qanshama jerde shermende taǵdyrdyń aldynda bas ımegenin túısinýdiń ózi ońaı emes-aý. О́z otyna ózi órtengen degen de osy shyǵar, bálkim.
«Eı, tiriler!
О́mir joq, ólim barda.
Tilegim sol: soqpasyn jolyń jarǵa,
Qý tirliktiń baǵasyn bilgiń kelse,
Kóz qyryńdy salyp qoı, qorymdarǵa.
Eı, tiriler!
Qulaq as ólilerge,
Esepteser qý tirlik senimen de,
Ajal bir kún aptyǵyp jetip kelse,
Jarty qarys jer qalmas sheginerge»,
dep túıindeıdi aqyn «Epıtafııa» atty óleńin, oqyrmandaryn oıǵa batyryp...
«Eı, tiriler! Qulaq as ólilerge» degen Serik aqyn ómir men ólim arasyndaǵy arpalysty, ajal aldyndaǵy ekiaıaqty pendeniń dármensizdigin jyryna qosty...
Onyń aza boıyńdy qaza qylatyn bul jyry eshkimge uqsamaıdy. Tanymy men túsinigi de múlde bólek. Seri aqyn Serik Tomanov tirisinde óziniń aza jyryn jazyp, taǵdyryna nálet aıtpaı, jyry men syryn jańa býynǵa amanattap ketti. Al biz aqynnyń sol bir amanatyna qııanat jasamadyq pa?
Tekturmastan qaıtqan saıyn «Qulpytastaǵy jazýdyń» shýmaqtaryn ishteı qaıtalaı beresiń. Talastyń tolqynyndaı janyńdy terbeıtin ólmes shýmaqtar kún uzaqqa oıyńda turady. Mańdaıyńdy beımálim bir saǵynysh samaly óbetin sekildi. Bálkim, bul óleńge, poezııaǵa degen qurmet bolar, kim bilsin...
Jambyl oblysy
