Foto: senate.parlam.kz
Senat Spıkeriniń aıtýynsha, ESG qaǵıdalaryn bızneske engizý baıaý júrgizilip jatyr. Ol árqashan tolyq jáne júıeli túrde bola bermeıdi. Keıbir ulttyq kompanııalar úshin bul - PR-dyń bir tetigi. Al basqalar úshin eýropalyq kompanııalarmen seriktestik ornatý tásili.
«Iri kompanııalar bul qaǵıdalardy Eýropa elderimen jáne sol jaqtaǵy seriktestermen baılanys ornatý úshin engizip jatyr. Odan bólek, kómirtegi salyǵy jáne taǵy basqa máseleler de bar. PR baǵdarlama aıasynda da keıbir qyzmetter júzege asyrylady. Qazir bizde ESG kún tártibin úılestirý áli ortalyqtandyrylǵan joq. Jalpy, ESG qazirgi tańdaǵy erejeler jıyntyǵy ǵana emes ekeni túsinikti. Bul – teńgerimdi ornyqty damý ıdeologııasy. Iаǵnı bıznes, halyq jáne memleket múddeleri arasyndaǵy tepe-teńdikti tabý ıdeologııasy. Bıznes qorshaǵan ortany lastap, ekologııalyq standarttardy buzyp, odan ári damı almaıdy. Oǵan eshkim jol bermeıdi», dedi Senat Tóraǵasy.
Sondaı-aq ol qoǵamnyń múddesi men suranysyn eskerýsiz qaldyryp, áleýmettik damýǵa úles qospaı zamanaýı bıznesti tıimdi damytý múmkin emes ekenin atap ótti.
«ESG – bul ómir salty jáne bizge osy kún tártibin ortalyqtandyrylǵan basqarý qajet. Halyqtyń da, memlekettik ınstıtýttardyń da, saıyp kelgende bıznestiń de múddesine sáıkes keletin osy standarttar men prınsıpterdi ilgeritý kerek. Depýtattar energetıka sektoryna zııandy gaz shyǵaryndylary turǵysynan da nazar aýdarýy kerek, bul turǵyda aıtarlyqtaı artta qalyp kelemiz, talpynysymyz da asa baıqala bermeıdi. Bul baǵytta parallel kún tártibi bar. Sondyqtan atalǵan salada másele az emes. Alaıda, bul aldaǵy kezeńde talqylaıtyn bólek aýqymdy taqyryp bolatyn shyǵar», dedi Senat Tóraǵasy.
Aıta ketsek, Parlamenttik komıssııanyń atalǵan kezekti otyrysy ESG qaǵıdalaryn, ıaǵnı bıznes-ortada ODM-ǵa qol jetkizý úshin ekologııalyq, áleýmettik jáne basqarýshylyq tájirıbelerdi engizý máselelerine arnaldy.
