Atyraýdaǵy «Aıbyn–2024» oblystyq dástúrli áskerı-patrıottyq jıyny «Sarmat» mamandandyrylǵan mektep lıseı-ınternatynyń bazasynda ótti. Is-sharaǵa oblys ortalyǵy men aýdandarynan 9 komandadan barlyǵy 140 jasóspirim qatysty. Jas qorǵaýshylar pnevmatıkalyq myltyqtan atý, kúsh jattyǵýlary, gazqaǵar men qorǵanys kostıýmin kııý, AK-74 avtomatyn shashý, qaıta jınaýmen synaldy. Sondaı-aq arqan tartyp, 3000 jáne 1000 metr qashyqtyqqa júgirip jarysty.
– Bul jarystyń maqsaty – áskerge shaqyrylǵanǵa deıingi jastardy patrıottyq sezimge baýlý, áskerı-qoldanbaly sport túrleri men salamatty ómir saltyn nasıhattaý, fızıkalyq daǵdylardy jetildirý. Sáıkesinshe jıyn jastar arasynda áskerı-patrıottyq tárbıe jumystaryn jetildirýge, Qarýly kúshterdiń mártebesin bıiktetýge baǵyttalǵan. Jyl saıyn is-sharaǵa óńirimizdiń daryndy jastary qatysady. Olardyń respýblıkalyq jarystarda joǵary nátıje kórsetkeni qýantady. «Aıbyn–2024» oblystyq áskerı-patrıottyq jastar jıynynyń qorytyndysy boıynsha I oryn Inder aýdanynyń komandasyna buıyrdy. Júldeli II oryndy Qyzylqoǵa aýdanynyń komandasy, III oryndy Qurmanǵazy aýdanynyń quramasy ıelendi. Jeńimpazdarǵa túrli marapattar, kýbokter, dıplomdar men medaldar tabys etildi. Birinshi jáne ekinshi oryn jeńimpazdary «Alı» oqý polıgony bazasynda Almaty qalasynda ótetin respýblıkalyq kezeńge joldama aldy, – dedi «Jas sarbaz» jasóspirimder áskerı-patrıottyq qozǵalysy» respýblıkalyq qoǵamdyq birlestigi Atyraý oblysy boıynsha fılıalynyń tóraǵasy Nurlan Eleýov.
Al Petropavldaǵy spartakıadaǵa ár eldi mekennen iriktelip alynǵan 6 top qatysty. Áskerı-patrıottyq jıynda 14-ten 17 jasqa deıingi 100-ge jýyq bozbala baq synady. Ár topta 15 jasóspirimnen tirkeldi. О́ńirlik saıys 4 kúnge sozyldy.
– Osyndaı jarystarǵa jıi qatysamyn. Ata-anam da áskerı qyzmette. Áskerı-sporttyq jıyndardyń jastar úshin mańyzy zor dep bilemin. Densaýlyqqa da paıdaly, – deıdi qatysýshy Nurjan Sabyrjan.
Mańǵystaýda ótken jıynǵa aýdan, qalalardan 7 komandadan barlyǵy 105-ke jýyq jas qatysty. «Aıbyn–2024» oblystyq áskerı-patrıottyq jastar sletiniń qorytyndysy boıynsha birinshi oryn Aqtaý qalasynyń «Aqtaý» komandasyna buıyrdy. Ekinshi oryndy Jańaózen qalasynyń «Qaısar» komandasy, úshinshi oryndy Qaraqııa aýdanynyń «Jas qyran» komandasy ıelendi.
Is-sharany Mańǵystaý oblysynyń qorǵanys isteri jónindegi departamenti men Mańǵystaý oblysy bilim basqarmasynyń «Oqý-ádistemelik ortalyǵy» uıymdastyrdy.
– О́ńirde daryndy jastardyń jarystary turaqty negizde ótkizilip turady. Biz úshin olardyń respýblıkalyq deńgeıde joǵary nátıje kórsetýi óte mańyzdy, – dedi Mańǵystaý oblysy oqý-ádistemelik bilim berý ortalyǵynyń dırektory Jańagúl Úmbetova.
