Kollajdy jasaǵan – Almas MANAP, «EQ»
Bıyl naýryz aıynda Qazaqstan men Qytaı «Szıansý – Ortalyq Azııa» kópfýnksıonaldy ortalyǵyn qurý týraly kelisimge kelgen edi. Eksportty qoldaý boıynsha «QazTrade» ulttyq operatory men «Jiangsu SOHO Holdings Group Co Ltd» halyqaralyq kompanııalar toby tıisti qujatqa qol qoıǵan. Taraptar Qytaıdyń Szıansý provınsııasynda saýda ortalyǵyn ashyp, saýda sórelerinde bizdiń ónimderdi satylymǵa shyǵarýǵa sheshim qabyldaǵan bolatyn.
Szıansýǵa sapary barysynda Arman Shaqqalıev kompanııa ókilderimen birqatar kezdesý ótkizip, Qazaqstan men Ortalyq Azııa elderi úshin salynǵan saýda pavılonyn aralady.
«SOHO Holdings Group» ókiliniń aıtýynsha, joba aıasynda Nankın qalasynyń damyǵan aýdanynda 11 ǵımarat salý jospary bar. Bul nysandardyń barlyǵy bıznestiń jańa túrlerin, sonyń ishinde transshekaralyq nysandardy ornalastyrýǵa arnalǵan. Qazaqstandyq jáne Ortalyq Azııa memleketteriniń ónim óndirýshileri úshin tórt qabatty bólek pavılon qarastyrylǵan.
«Qytaı – bizdiń strategııalyq saýda seriktesimiz. Qazaqstanmen ekijaqty saýda aınalymynda jetekshi oryn alady. Memleket basshysy Qytaımen ózara saýdany 100 mıllıard dollarǵa jetkizý mindetin qoıdy. «Szıansý – Ortalyq Azııa» jobasyn júzege asyrý otandyq óndirýshilerdiń Qytaı naryǵyna shyǵýyna yqpal etip, eki el arasyndaǵy saýda-ekonomıkalyq qarym-qatynastyń keńeıýine serpin beredi», deıdi Arman Shaqqalıev.
Mınıstr saýda pavılonynyń aýmaǵy 2 myń sharshy metrdi quraıtynyn, onyń basym bóligi elimizdiń taýarlar kórmesine bólinetinin atap ótti. Joba ázirleýshilerdiń aıtýynsha, saýda kesheniniń birinshi qabatynda qytaılyq kelýshiler úshin Qazaqstannyń mádenıeti men erekshelikteri týraly tanystyrý alańy ornalasady. Ekinshi qabatta ártúrli sanattaǵy otandyq taýardy kórsetý usynylady. Onyń ishinde aýyl sharýashylyǵy ónimderi, ónerkásip taýarlary men basqa da taýarlar bolady. Qalǵan qabattarda bizdegi kompanııalardyń keńseleri ornalasady.
Qytaılyq seriktesterdiń aıtýynsha, Nankındegi «Ortalyq Azııa – Szıansý» saýda ortalyǵynyń resmı ashylýy qyrkúıek aıyna josparlanǵan. Osyǵan oraı Saýda jáne ıntegrasııa mınıstri Arman Shaqqalıev elimizdiń taýar úlgilerin Qytaıdyń Szıansý provınsııasyna jóneltýde jedel daıyndyqty bastaý qajettigin eskertti.
Osyndaı kópfýnksıonaldy ortalyqty elimizde de salý josparda bar. Ortalyq qytaılyq jáne otandyq taýarlar vıtrınasynyń rólin atqaryp qana qoımaıdy, onda bıznes ókilderi halyqaralyq seriktestermen kelisimshartqa otyrady, iskerlik kelissóz júrgizedi, qarjylyq jáne keńes berý qyzmetterin alady, saýda operasııalaryn rásimdeıdi.
