Astanada bıyl jobaǵa 4 200 astanalyq jas qatysady. Taıaýda ǵana «Stýdenttik qurylys» jáne «Jasyl el» jastar eńbek jasaqtarynyń HX eńbek maýsymynyń saltanatty ashylýy ótti. Is-sharany jergilikti Jastar saıasaty máseleleri basqarmasynyń qoldaýymen, respýblıkalyq stýdenttik qurylys jáne jastar jasaqtary qozǵalysy qoǵamdyq qory uıymdastyrdy.
– 20 jyl ishinde Astana qalalyq «Jasyl el» shtaby eleýli úles qosyp keledi. Eńbek jasaqtaryna qosylǵandarǵa arnaıy kıim, qural-jabdyqtan bólek, bir aılyq mólsherdegi jalaqy qamtamasyz etiledi. 14-16 jas aralyǵyndaǵy balalar jas erekshelikterine qaraı aptasyna 5 kúnnen, al kúnine 4 saǵattan kóp emes jumys isteıdi. 14 jasqa tolǵan oqýshy balalar óz bilim ordalary mańynda, odan bólek jazǵy mezgilde saıabaqtarda aǵashtarǵa kútim jasap, aramshópterin tazalaıdy. Jobaǵa qatysýǵa nıet bildirgender tolyq aqparattardy áleýmettik jelidegi paraqshalarymyzdan oqı alady, – deıdi «Jasyl el» jobasy jetekshisiniń orynbasary Baqytbek Ábdirashıd.
Sondaı-aq joba aıasynda kópbalaly, áleýmettik az qamtylǵan otbasylardyń balalaryn jazǵy ýaqytta jumysqa ornalastyrý kózdelgen. Osyndaı ilkimdi istiń ıgiligin kórýge Qaraǵandy jastary da asyqqan. Bıylǵy maýsymda óńirde eńbekke aralasýǵa nıet bildirgenderdiń sany byltyrmen salystyrǵanda eki ese kóbeıipti. Jastar qozǵalysyndaǵy ózgerister týraly Qaraǵandy Jastar resýrstyq ortalyǵynyń basshysy Iаkýb Djamalov aıtyp ótti.
– Qatarǵa qosylýǵa 65 oqý orny ótinim berdi. Aılyǵy eń tómengi jalaqyǵa baılanysty beriledi. Sondaı-aq jumys istegen saǵattaryna qaraı esepteledi. Máselen, 14 jastan 16 jasqa deıingi jaýyngerlerge tórt saǵattyq jumyspen qamtylǵan jaǵdaıda aıyna 85 myń teńge úlestiriledi. Al 16 jastan 35 jasqa deıingi azamattarǵa aıyna 127 500 teńge tabýǵa múmkindik bar, – dedi ol.
«Jasyl el» eńbek maýsymy 31 tamyzǵa deıin jalǵasady. Maýsymdyq jumysqa qosylýǵa nıet bildirgenderdiń arasynda 400 aqtaýlyq jas ta bar. Olar eki lekke bólinedi. 16 toptan quralǵan jastar Aqtaýda eki aı boıy qala tazalyǵynyń saqtalýyna óz úlesin qosady.
– Bul joba 2005 jyly bastalǵan bolatyn. «Jasyl el» jastary kógaldandyrý men tazalyq jumystaryna ǵana emes, qalanyń kórkeıýine de úlesterin qosyp jatyr. Mundaǵy basty maqsat – elimizdi kógaldandyrý arqyly jastardyń eńbekqorlyqqa baýlý, – dedi Aqtaý qalalyq ishki saıasat jáne tilderdi damytý bóliminiń basshysy Gúlmıra Balǵojaeva.
Jas sarbazdar jumystaryna birden bilek sybana kirisip ketti. 14 jasar Besmıl Muhamad bizge qoǵamdyq jobanyń ózindik mán-mańyzyn aıtyp berdi.
– «Jasyl elge» jumysqa qabyldaý týraly tanystarymnan bildim. Alǵash ret qatysyp otyrmyn. Jaýaptylar bizge ne isteý keregin jiti túsindirdi. Jumysqa saqadaı saı daıynmyn. Bul óz betinshe aqsha tabýǵa jáne jańa dostar tabýǵa tamasha múmkindik qoı. Onyń ústine jaz mezgilinde bos ýaqytyńdy tıimdi uıymdastyrýǵa múmkindik beredi, – dedi jas sarbaz.
Sondaı-aq maýsymdyq jumyspen qamtý jáne sý tasqyny bolǵan aımaqtarǵa kómek kórsetý maqsatynda «Aýyl» partııasy janyndaǵy «Aýyl jastary» jastar qanaty qurylys jasaqtaryn iske qosty. Qazirgi ýaqytta, Soltústik Qazaqstan oblysynda 40-qa jýyq jas tabıǵı apattan zardap shekkenderge turǵyn úı salýǵa qolǵabys etip jatyr.
Aıta keteıik, «Jasyl el» jastar eńbek jasaǵynyń qyzmeti jergilikti bıýdjet esebinen júzege asyrylady.
