«Jasyl Qyzylorda» jumysqa kiristi

Jalpy, jazy aptap óńirdegi jasyl jelek qatary keıingi jyl­dary sırep qalǵany ras. Ár kóktemde aýyl men qala kóshe­ler­ine egilgen kóshettiń kóbi sý tapshylyǵynan qýrap qalatyny da belgili. Kún jylyna egilgen kóshettiń kóp uzamaı qaýdyraǵan qýraıǵa aınalyp shyǵa kelýine salǵyrttyqtyń da tıgizer kesiri az bolmaıtyn. Jer­gilikti ákimdik «endi ondaı olqy­lyqty boldyrmaımyz» dep otyr.

Byltyr jyl sońynda qalada qurylǵan «Jasyl Qyzylorda» KMM bıyldan bastap kanaldar men aryq júıelerin tazalap, uńǵyma men nasostar arqyly taldarǵa sý jetkizdi. Alleıalar men ortalyq kóshelerdegi gúl­zar­lardy, kógaldy kútip us­tap, qýraǵan aǵashtardy kesý, bap­taý osy mekeme mindetine kirip otyr.

Mekeme jumysshylary Jibek joly, Sarqyrama ka­nal­da­ryn tolyq tazalap, Qyzyl­jar­ma, Tabıǵat kanaldary men qalaishilik aryq júıe­le­ri jaǵ­daıyn bekitilgen kestege sáıkes kún­de­likti baqylaıdy.

«Buryn aıaqsýdy bir mekeme jetkizse, taldarǵa kútimdi basqa kompanııa jasaıtyn. Endi sý alǵannan bas­tap parkter men alleıadaǵy alańdar men tal-daraq­qa kútim jasaý bizge júk­te­lip otyr. Kúzde aryq bit­ken­di qýraǵan shóp pen japyraq toltyratyny da kóz úı­ren­gen kórinis edi. Bul kók­tem­de aıaqsýdyń kerekti kezde jetýine ájeptáýir kedergi keltiretin. Olardyń taza­ly­ǵy­men endi bizdiń mekeme aınalysady», deıdi «Jasyl Qyzylorda» KMM dırek­to­rynyń orynbasary Bolat Beısenbaev.

Osy kúni «Jasyl Qyzyl­or­da» jańa tehnıkalar alý­dy bas­tady. Mekeme jumys­shy­lary qaladaǵy kóshet egilgen aýmaq­tar­dy, park­ter men alleıalardy kúndelikti ba­qy­lap otyr.

Qyzylorda