Ulttyq mýzeıdiń baspasóz qyzmetiniń málimetinshe, Leonardo da Vınchıdiń biregeı týyndysyn osy ýaqytqa deıin 6 772 adam tamashalap úlgergen. Kelýshilerdiń deni – eresekter (3 727 adam), sheteldikter (1 017) men mektep oqýshylary (764).
Sýretshi Oksana Qalıakperovanyń aıtýynsha, erekshe sezim syılaıtyn sýretti kórýge ár jan umtylý kerek.
«Leonardo da Vınchıdiń bul týyndysy Astanaǵa kelýime túrtki boldy. Elimizdiń mádenıetin kóterip, uly ónermen, uly sýretshimen aralasýǵa múmkindik bergen uıymdastyrýshylarǵa rızamyn. Arnaıy bólme mýzykalyq jáne kórneki súıemeldeýmen bezendirilgen eken. Týyndynyń erekshe áser etkeni sonshalyq, bir sát lıftpen kóterilip bara jatqandaı áserde boldym. Áleýmettik jelide kórgenimiz ben mýzeıde kýá bolǵanymyz múlde bólek. Naǵyz barýǵa turarlyq dúnıe», deıdi ol.
Sondaı-aq atalǵan murajaıda 23 maýsym kúni Olga Batýrınanyń Leonardo da Vınchıdiń óneri týraly leksııasy ótedi.
Aıta keteıik, tanymal týyndynyń kórmesi Ulttyq mýzeıdiń 10 jyldyǵyna oraı Italııanyń «Scripta Maneant» baspasymen birlese uıymdastyrylǵan. Joǵary Renessans dáýirine jatatyn bul qundy jádiger Eýropadan tys jerge alǵash ret shyǵarylyp otyr. Mádenıet jáne aqparat mınıstrligi, Italııanyń Qazaqstandaǵy elshiligi jáne Italııa mádenıet ınstıtýty uıymdastyrǵan kórmedegi osynaý biregeı týyndy 4 tamyzǵa deıin usynylmaq.
