Jaqynda Keńes Odaǵynyń Batyry Álııa Moldaǵulovanyń erlikpen qaza tapqanyna 71 jyl toldy. Oblystyq bilim basqarmasynyń uıymdastyrýymen jastardy Otandy súıýge shaqyrý, qan maıdanda qaza tapqan erlerdi eske alý maqsatynda «Máńgilik alaý» janynda «Eske alý shyraǵy» aksııasy ótti. Bul sharaǵa Eset batyr atyndaǵy mekteptiń túlekteri, «Sarbaz» patrıottyq klýby, «Jas ushqysh» mektebi men qalalyq «Jas Ulan» balalar men jasóspirimder uıymynyń músheleri qatysty. Olar «Máńgilik alaý» janyndaǵy aǵashtan oıyp jasalǵan 71 sanyna 71 shyraq jaǵyp, batyr rýhyna taǵzym etti.
– Álııa asqan erligimen Otanǵa, týǵan jerge degen súıispenshiliktiń bıik ólshemin kórsetti. 19 jasynda qyrshyn ketken qaharman qyzdyń erligi óskeleń urpaqqa úlgi. Búgin 71 shyraq jaǵyp, batyr rýhyna bas ıip, qazaqtyń batyr qyzyn qurmettep eske aldyq, – deıdi «Qos shynar» qaıyrymdylyq qory» qoǵamdyq birlestiginiń tóraǵasy Ǵalymjan Baıderbes.
Sol kúni osy sharanyń jalǵasy retinde №27 mektep-lıseıdiń akt zalynda Keńes Odaǵynyń Batyry Álııa Moldaǵulovany eske alý jáne Álııa – Mánshúk atyndaǵy «Qos shynar» qoǵamdyq birlestiginiń 15 jyldyǵyn atap ótýge arnalǵan kesh ótti. Sharada «Qos shynar» qoǵamdyq birlestigi týraly beınebaıan kórsetildi.
Keńes Odaǵynyń Batyrlary Álııa Moldaǵulova men Mánshúk Mámetovanyń erlik joldaryn zerttep, urpaqqa ulaǵattap júrgen bul qor qazaqtyń qaharman qyzdarynyń batyrlyǵyn halyqtyń jadynda jańǵyrtyp otyrý baǵytynda kóp sharýa tyndyrdy. Keshte sóz alǵan birlestik tóraǵasy Ǵalymjan Baıderbes Shyǵystyń qos shynary Álııa men Mánshúktiń taǵdyrlas ekenin, ekeýiniń ata-anadan erte jetim qalǵanyn, maıdanǵa óz erikterimen suranyp attanǵanyn, qan maıdanda qaharmandyqtyń eren úlgisin kórsetip, ekeýi de Keńes Odaǵynyń Batyry atanǵanyn, ekeýiniń de orys jerinde, Álııanyń Novosokolnıkıde, Mánshúktiń Nevelde qaza bolyp, máńgilikke tynystaǵanyn jetkizdi.
Sharanyń osy mektep-lıseıde ótkizilýiniń de reti bar eken. Qashanda qazaqtyń qaharman qyzdarynyń batyrlyǵyn nasıhattaýǵa kúsh-jigerin jumsap júrgen álııatanýshy Ǵalymjan Baıderbes halqymyzdyń batyr qyzdarynyń erlik jolyn biriktire ulaǵattaýdy jón kórip, osy bilim oshaǵynda Álııa men Mánshúktiń mýzeıin uıymdastyrǵan. Qazir mýzeıde batyr apalarymyz týraly bir myńǵa jýyq eksponat bar, deıdi ózi. Batyrlarǵa qatysty is-sharalar udaıy ótkizilip turady.
Keshte Uly Otan soǵysynyń ardageri Alekseı Petrov surapyl soǵystyń aýyrtpalyǵyn aıta kelip, elimizge tynyshtyq tiledi, Elbasynyń maıdangerlerdi jańajyldyq quttyqtaýyna rızashylyǵyn bildirdi. Mektep-lıseıdiń dırektory Dáýir Tólemisov mýzeıdiń jas urpaqqa patrıottyq tárbıe berýdiń ortalyǵyna aınalyp otyrǵanyn tilge tıek etti. Keshte sóz alǵandar Álııa men Mánshúktiń erligi keıingi tolqyn jastarǵa úlgi bolatynyn, halqymyz batyr qyzdaryn eshqashan esten shyǵarmaıtynyn aıtty. Keshte oblystyq basqarmalar men qoǵamdyq uıymdar ókilderi birlestikti 15 jyldyǵymen quttyqtap, syı-sııapattaryn jasady. Shara barysynda jergilikti ónerpazdar án shyrqap, bı bıledi.
Satybaldy SÁÝIRBAI,
«Egemen Qazaqstan».
Aqtóbe oblysy.
