Árıne, sóz bostandyǵyn zańmen retteýge bolady, biraq etıkany árbir BAQ óz ishinde qolǵa alýǵa tıis. Qajet bolsa, árbir redaksııanyń óz Etıkalyq kodeksi bolǵany jón. Sonda ǵana kez kelgen jýrnalıst óz mıssııasyna adal bola alady. Al óz isine adal, mamandyǵynyń mıssııasyn biletin jýrnalıske «Mass-medıa týraly» zań sóz bostandyǵyna erkindik, qorǵalýyna múmkindik berse, otandyq jýrnalıstıkanyń damýyna serpin alyp keledi.
Meniń túsinigimde zań mamannyń jumysyn shektemeıdi, damýyna múmkindik beredi. Sebebi jýrnalıst – qoǵamnyń únin jetkizýshi. Úshinshiden, kez kelgen memlekettik organ, kez kelgen aqparat qoljetimdi ári ashyq bolýǵa tıis. Derekterdi alý ashyq bolǵan kezde jýrnalıst eshqandaı suranyshat jibermeı, aqparatty erkin alýǵa múmkindik týady. Qazir biz jeti kún, bes kún dep jatyrmyz. Shyndyǵynda, ózin syılaıtyn jáne syılata biletin, osy eldiń zańyna baǵynatyn kez kelgen memlekettik mekeme men jekemenshik qaýymdastyq jedel ári tekserilgen aqparatty usyna alsa, ózi úshin de paıdaly. Shyn aqparat shyqpasa, erteńgi kúni jalǵan aqparattyń tarap ketý qaýpi basym. Tótenshe jaǵdaı kezinde osyndaı keleńsizdikterdiń jıi qylań berip jatatyny bar. Sondyqtan jaýapty tez berýdiń mańyzdylyǵy jýrnalıske ǵana emes, memlekettik organ úshin de mańyzdy. Demek aqparatqa qoljetimdilik – aqparat quraldarynyń bedelin arttyrýdyń taǵy bir quraly.
Erbolat MUHAMEDJAN,
Maqsut Narikbayev University basqarma tóraǵasynyń orynbasary
