Qarjysy mol, quryǵy uzyn aqparat quraly kim kóringenniń qoly jete bermeıtin aqparatty elden buryn jarııalaıdy, kásibı myqty jýrnalısterdi jaldaý arqyly sapaly dúnıe usynady. Solar bedeldi. Árıne, keıbir kezeńderde saıası ahýaldardan, menedjmenttiń oısyz sheshimderinen nemese aýdıtorııanyń qalaýyn saýatty zerttemeý, kadr turaqsyzdyǵy sııaqty qatelikterden jap-jaqsy aqparat quralynyń quldyraǵanyn kórip júrmiz. Degenmen dál qazir elimizdiń aqparat quraldarynyń bedeli eshkimnen kem de emes, artyq ta emes. Qal-qadirinshe jumysyn atqaryp jatyr. Jýrnalıstik mıssııasy – aqparat taratý. Ol shyn, naqty, jedel jáne saýatty bolýy shart. Bul baǵytta másele joq, qazaq BAQ álemde bar tehnıka men tásildiń barlyǵyn jetik meńgerdi. Biraq bir másele bar, keıingi jyldardaǵy geosaıası, geostrategııalyq tartystar jýrnalıstıkanyń sıpatyna áser etti. Buryn «tek shynaıy aqparat qana taratý paryz» dep kelgen iri jurttar endi aqparattyq múdde, aqparattyq nasıhat, aqparattyq qorǵaný máselelerin ashyq túrde alǵa shyǵaryp otyr. Sondyqtan bizdiń jýrnalıster de negizgi mıssııa memlekettiń tutastyǵy, birligi, beriktigi ekenin oılaýy kerek. Bul bálkim ótpeli kezeń bolar, erteń kúshtiler de es jııar, biraq bizdiń jumysymyz da sol kúrdeli kezeńniń talaptaryna saı bolýy abzal.
Qazir kórermen, oqyrman men tyńdarman úshin bir qıyn dáýir bolyp tur. Aqparat tym kóp, ony taratatyn, úrleıtin qural odan asyp túsedi. Qaısysy ótirik, qaısysy shyn ekenin aıyrý – kádimgi jumys. «Azamattyq jýrnalıstıka» degen ádemi termındi engizip aldyq ta, endi ıe bola almaı otyrmyz. О́ıtkeni jaýapkershilik az. «Mass-medıa týraly» zań osy máseleni retteýge sep bolady. Ony qabyldaýdaǵy maqsat ta sol tek dástúrli aqparat quraldaryn ǵana emes, jańa medıanyń jumysyn bir retke, eptep júıege keltirý bolsa kerek. Búgin áleýmettik jeliler arqyly aqparat taratý, másele kóterý, dat aıtý, jarnama jasaý beleń alyp tur.
Erkin TAŃATQANULY,
«Abai TV» telearnasynyń dırektory
