Foto: elorda.info
Informbıýro baǵdarlamasynyń habarlaýynsha, ystyǵy qatty kóterilip, denesi qyzarǵan 10 jastaǵy qyzǵa dáriger dıagnozdy durys qoımaǵan. Sondaı-aq dárigerler jasóspirimge qoldanýǵa qarsy kórsetilimi bar dárini egip jibergen.
«Aýrýhanaǵa jedel járdemmen barǵan qyzymnyń denesi bir táýlikte úıge qaıtty. Úsh kún buryn kishkentaı Jibektiń máıitin jer qoınyna tapsyrdyq. Qyzýy 40 gradýsqa deıin kóterilgen qyzymnyń dıagnozyn dáriger alǵashynda dóp basyp taba almady. Qyzymnyń SEF-3 dárisine allergııasy bar dep qansha eskertsem de dárigerler balama ekpeni salyp jibergen», deıdi anasy.
Anasynyń sózinshe, aýdandyq ortalyq aýrýhanada tegin berilýi tıis preparattar tabylmaǵan soń aınaladaǵy dárihanaǵa barǵan. Aıtqandaryn aınytpaı aparyp tursa da, dárigerler qyzdyń ómirin saqtap qala almaǵan. Jansaqtaý bólimine túsken 10 jastaǵy Jibektiń jaǵdaıy meńgerýshiniń kesirinen tipten kúrdelenip ketti deıdi ákesi.
Al aýrýhana basshylyǵy bul jaǵdaı boıynsha ujymda ishki tekseris júrgizilip jatqanyn aıtty. Komıssııa quramyna syrttan emes, óz mamandary kiripti. Osy rette bas dáriger tekserý ádil bolady degenge senimsizdik tanytqan jaǵdaıda quzyrly organdarǵa aryz jazýǵa bolatynyn aıtty.
«Prednızolon men allergosept anafılaktıkalyq shok kezinde qoldanylatyn dáriler. Ol mynadaı jaı bólimshede bolmaıdy. Jumys júrip jatqannan keıin barlyǵy 100 paıyz jaqsy bolady dep aıta almaımyn. Kemshilikter bar», deıdi Jetisaı aýdandyq ortalyq aýrýhanasynyń bas dárigeri Nurlan Joldasbekov.
Aıta keteıik, balanyń ólimine qatysty qyzmettik tergeý júrip jatyr. Túrkistan oblysy Jetisaı ortalyq aýdandyq aýrýhanasynyń bas dárigeri tekserý qorytyndysy polısııaǵa beriletinin aıtty.
