Koreıa zamanaýı bı ulttyq kompanııasynyń negizi 2010 jyly qalanǵan. Trýppa birtýar sýretshilermen birlesip jasaǵan úzdik qoıylymdarymen tanymal. О́ner ujymy Koreıanyń qazirgi ómiri men qoǵamyn beıneleıtin týyndylar jasap, olardy mádenı kodyna qaramastan dúnıe júzi kórermenderine túsinikti etip, mańyzdylyǵyn arttyrýdy maqsat etedi.
2023 jyly mamyrda Kım Sonën trýppanyń kórkemdik jetekshisi atanyp, onyń shyǵarmashylyq qýaty men kózqarasy ujymnyń qyzmetine tyń serpin berdi. Onyń qoıylymdary adam ómiriniń mánine tereń enýimen erekshelenedi, bul olardy biregeı ári umytylmastaı etedi.
Bizdiń kórermenge koreıalyq trýppa Kım Sonën qoıǵan «Djýnglı» horeografııalyq týyndysyn daıyndaǵan. Bul spektakl aǵymdaǵy jyly sáýirde Seýldegi CJ Towol art-ortalyǵynyń sahnasynda alǵash ret oryndaldy. Sondaı-aq 23-24 shildede Le 13ème ART teatrynda usynylyp, Parıjdegi kórermenderdiń júregin jaýlap úlgerdi.
«Djýnglı» týyndysy qarapaıym tabıǵat prızmasy arqyly adam ómirin fılosofııalyq turǵyda qalaı zertteýdi kórsetedi. Ol qımyldardyń ereksheligine kóńil bólip, aqyl men emosııanyń, sana men túısiktiń, sulýlyq pen kóriksizdiktiń qatar ómir súretinin sýretteıdi.
Spektakldi jasaýmen jaryq boıynsha sýretshi – Lı Chjonıýn, kostıýmder boıynsha sýretshi Be Gıonsýl de aınalysty. Tóbeden salbyrap turatyn shóp túıini sahnadaǵy negizgi element sanalady. Ol osynaý mátinde tabıǵı orta ǵana emes, túısik áleminiń metaforasy retinde de qabyldanatyn djýnglıdi beıneleıdi. Munda eń myqtynyń aman qalatyny, zamanaýı qoǵamda túısikter qalaı baıqalatyny týraly oı paıda bolady.
Qoıylym basynda ártister sheńberdi aınalyp júredi. Qımyldary kózge úırenshikti jáne qarapaıym bolyp kórinýi múmkin, biraq shyn máninde olar bizdiń kúndelikti ómirimizdi jáne qalalyq ortadaǵy túısiktik júris-turysymyzdy beıneleıdi. Bıshilerdiń qımyldardy sol mezette oılap tapqandaı oryndaýy olardyń óner kórsetýine biregeılik pen erekshelik ústeıdi. Spektakldiń sońynda ártister bir-birine qarap, oı tolǵaý úshin jańa keńistik jasaıdy. Top jeke adamdardy baqylasa, al olar óz kezeginde topqa bir bútin retinde qaraıdy.
Sonymen astanalyq kórermen asyǵa kútken «Djýnglı» – bı shoýy ǵana emes, 17 ártistiń qımyly arqyly adam tabıǵatynyń tereń zertteýi, sondaı-aq ol tabıǵattyń beınesi, tazalyq pen tabıǵılyqtyń rámizi ispettes.
