Gúlshara Ábdiqalyqova konferensııaǵa qatysýshylar aldynda sóılegen sózinde Nursultan Nazarbaevtyń «Qazaq handyǵy – Ortalyq Azııadaǵy tuńǵysh ulttyq memleket» degen tujyrymyna toqtalyp ótti. Memlekettik hatshy Qazaq handyǵynyń tarıhyn zerdeleý isi «Máńgilik El» jalpyulttyq ıdeıasyn, Ult jospary – 100 naqty qadamdy júzege asyrý aıasynda aıryqsha mánge ıe bolyp otyrǵanyn, óıtkeni bolashaǵy birtutas ultty qalyptastyrýǵa negiz bolar jaıttyń biri otandyq tarıhty bilý ekenin aıtty.
Sonymen qatar, Gúlshara Ábdiqalyqova qazaq arýlary ejelden óziniń izet-iltıpatymen, jaratylysynan alǵyr aqyl-parasatymen, barshamen til tabysa biletin dıplomattyq qasıetimen erekshelengenine toqtaldy. Bul rette Qazaq handyǵynyń qalyptasýy men damýyna qosqan olardyń úlesin zertteý isi tól tarıhymyzdy tereń zerdelep, ondaǵy aqtańdaq tustardy tolyqtyrýǵa múmkindik beredi. Is-sharany Qazaqstan Respýblıkasynyń Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, Lev Gýmılev atyndaǵy Eýrazııa ulttyq ýnıversıteti jáne Qazaqstandaǵy BUU Damý baǵdarlamasy birlesip uıymdastyrdy.
Konferensııaǵa sondaı-aq Parlament depýtattary, memlekettik organdardyń, BUU Damý baǵdarlamasynyń ókilderi, joǵary oqý oryndarynyń oqytýshylary, magıstranttary men stýdentteri qatysty. Is-shara barysynda Lev Gýmılev atyndaǵy EUÝ qazaq ádebıeti kafedrasynyń meńgerýshisi, Qazaqstan Respýblıkasy Ulttyq Ǵylym akademııasynyń akademıgi, fılologııa ǵylymdarynyń doktory S.Qasqabasov, ál-Farabı atyndaǵy QazUÝ tarıh fakýltetiniń professory, tarıh ǵylymdarynyń doktory B.Káribaev, Shoqan Ýálıhanov atyndaǵy Tarıh jáne etnologııa ınstıtýtynyń dırektory, tarıh ǵylymdarynyń doktory H.Ábjanov jáne taǵy basqa ǵalymdar baıandama jasady. Olar halqymyzdyń maqtanyshy bolyp sanalatyn, Otanǵa qaltqysyz qyzmet etýdiń úlgisine aınalǵan, alaıda umyt qalǵan nemese ádeıi umyttyrylǵan kóptegen esimderdi qaıta jańǵyrtý baǵytyndaǵy ǵylymı zertteýlerdiń mańyzdylyǵyna toqtalyp ótti.
Osy oraıda, Qarashash pen Aıǵanym hanshalardyń, Bopaı hanym men Baı Ananyń, Toıqara hanymnyń, qazaq áıelderi arasynan shyqqan ózge de kórnekti tulǵalardyń esimderi ataldy. Konferensııa qorytyndysy boıynsha qarar qabyldandy.
Elaman Qońyr.
Derek: akorda.kz. Sýret: abai.kz.
