Rekord Pavlodar qalasy, Ortalyq jaǵalaý, «Ertis Promenade» sahnasynda 30 tamyz kúni oryndaldy. Qazaqstan rekordyn ornatýǵa qaladaǵy «Mýzykalyq kolledj daryndy balalarǵa arnalǵan mýzykalyq mektep-ınternat» kesheni, Qurmanǵazy atyndaǵy balalar mýzyka mektebi, «Jiger» balalar-jasóspirimder klýbynyń ónerpazdary qatysty.
- Kúıshilik ónerde júrgen sheber dombyrashylar «Ortekeni» kóneden beri sheber bılete bilgen. Ekinshi jaǵynan balalarǵa arnalǵan shyǵarmalardy dáripteý úshin taptyrmas óner túri. Halqymyzdyń tabıǵatqa jaqyndyǵyn, jabaıy janýarlarǵa degen qamqorlyǵyn tanytatyn ereksheligi de bar. Bilim berý uıymdary ónerli balalardyń basyn qosyp, ortekelerdi bılete otyryp, «Qarajorǵa», «Salkúreń», «Sekirtpe» kúılerin sahnada sátti oryndap shyqty, - deıdi daryndy balalarǵa arnalǵan mýzykalyq mektep-ınternat kesheniniń basshysy Serik Qasymhanov.
Qazaqstan rekordtar kitabynyń resmı ókili Qýandyq Qudaıbergenov pavlodarlyqtardy jańa rekordpen quttyqtap, atalǵan oqý oryndarynyń ókilderine sertıfıkattar tabys etti.
Orteke– qazaqtyń halyq bıi. Onyń qýyrshaq teke, jeke bıshi jáne bıshiler toby oryndaıtyn túrleri bar. Birinshisinde ústel ústine ornatylǵan qýyrshaq-tekeniń aıaǵy, moıny, denesi qozǵalmaly etip jasalady da, jińishke jipter arqyly dombyrashynyń saýsaqtaryna baılanady. «Orteke» - kúıshilik ónerdegi tartymdylyq ári kórnekilik úshin qoldanylatyn janr.
