Jaqynda «Nurly jol» temirjol vokzal kesheninde «Qazaqstannyń ulttyq qazynasy» áleýmettik-mádenı jobasynyń tusaýkeseri ótti. Is-sharaǵa Kólik vıse-mınıstri Maqsat Qalıaqparov, Mádenıet jáne aqparat vıse-mınıstri Qanat Ysqaqov, «QTJ «UK» AQ basqarma tóraǵasynyń orynbasary Talǵat Aldabergenov, Astana qalasy ákiminiń orynbasary Erik Meıirhanov, Ulttyq sport túrleriniń prezıdenti Islambek Saljanov, V Dúnıejúzilik kóshpeliler oıyndaryn daıyndaý jáne ótkizý jónindegi dıreksııa basshysynyń orynbasary Abylaı Qondybaev, basqa da qonaqtar qatysty.
Taǵylymǵa toly biregeı joba «QTJ» UK» AQ fılıaly «Magıstraldyq jeli dıreksııasy» bastamasymen, Mádenıet jáne aqparat mınıstrligi, Qazaqstan Respýblıkasynyń Ulttyq mýzeıi, «Nurly jol» vokzal kesheniniń «TCS Engineering» JShS basqarýshy kompanııasy jáne «MYD Production» JShS jarnama operatorynyń qatysýymen iske asyrylyp otyr. Jobanyń ǵylymı tujyrymdamasy men dızaınerlik sheshimin Ulttyq mýzeı ujymy ázirlegen.
– Osy úlken jobany uıymdastyrýshylarǵa alǵys bildiremin. Bul jaı ǵana joba emes, Ulttyq mýzeıi men «Nurly jol» temirjol vokzal kesheniniń biregeı eńbegi. Bıyl Ulttyq mýzeıge 10 jyl tolady, osy ýaqyt aralyǵynda mýzeı 5 mıllıonǵa jýyq azamatqa qyzmet kórsetken. Meniń oıymsha, búgingi sharanyń aıasymen shektelmeı, ári qaraı tynbaı jumys jasaýymyz qajet, – dedi Mádenıet jáne aqparat vıse-mınıstri Qanat Ysqaqov.
Qazirgi tańda Ulttyq mýzeıdiń qor kolleksııalarynan tarıhı-mádenı mura úlgilerine kásibı túrde vızýalızasııa jasalyp, «Nurly jol» kesheniniń kútý zaldary 40 aqparattyq modýlmen bezendirilip otyr. Aqparattyq modýlder serııasy 3 tilde usynylǵan, olar: «Uly Jibek joly», «Ulyq ulys», «Qazaq handyǵy», «Qazaqtardyń rýhanı álemi», «Qazaq halqy salt-dástúrleriniń danalyǵy», «Qazaqstan tabıǵaty», «Qazaq taǵamdarynyń fılosofııasy» sekildi irgeli taqyryptyq bólimderden turady.
«Qazaq halqy salt-dástúrleriniń danalyǵy» bólimindegi sýretterde ultymyzdyń kókpar, altybaqan sekildi oıyndary beınelengen. Sonymen qatar dombyra, qobyz syndy ulttyq aspaptarymyzdyń aıshyqty sýreti kórermenge erekshe sezim syılaıtyny daýsyz. Qylqalam sheberleriniń eńbeginen týǵan páýeske jekken at, oqaly shapan jamylyp, tazy ertken ańshy beınesi kórkem kestelengen. Bitimi bólek óner týyndylary sheteldik týrıster men qala qonaqtarynyń el mádenıetine qyzyǵýshylyǵyn týdyrary anyq.
– Mundaı kórmeniń ashylýy úlken mańyzdy shara dep oılaımyn. Alla buıyrtsa, endi 9 kúnnen keıin elordamyzda V Dúnıejúzilik kóshpeliler oıyndary ótedi. Oǵan 90 memleketten 2000 sportshy, myńdaǵan sheteldik týrısterdiń kelýi josparlanyp otyr. Qazaqstannyń mádenıeti, tarıhy óte mol, bul – ata-babamyzdan qalǵan asyl muramyz. Muny ári qaraı damytýǵa úles qosyp jatyrmyz, osy jolda qyzmet ete de beremiz, – dedi Ulttyq sport túrleri qaýymdastyǵynyń prezıdenti Islambek Saljanov.
«Qazaqstannyń halyq qazynasy» jobasy otandyq temirjoldyń – 120, Ulttyq mýzeıdiń 10 jyldyqtary, sondaı-aq Konstıtýsııa kúnine, Astanada Dúnıejúzilik kóshpeliler oıyndaryn ótkizýge oraılastyryldy. Uıymdastyrýshylardyń bul ekspozısııa elorda jolaýshylary men qonaqtarynyń nazaryn aýdaryp, qazaq mádenıetimen jaqyn tanysýǵa múmkindik bererine senimi mol. Kútý zaldarynda otandyq sýretshiler týyndylarynyń úzindilerimen, mýzeı eksponattarynyń sýretteri arqyly mańyzdy oqıǵalar, tarıhı tulǵalar, qazaq halqynyń materıaldyq jáne rýhanı álemimen jaqyn tanysýǵa bolady.
