SÝRETTERDE: Azııa stıli boıynsha topjarǵan mergender (soldan ońǵa qaraı): Batyr Beksaýyt, Aıtbek Sarybaı, Eralhan Aıkóz.
Dúbirli dodanyń alǵashqy kúni álemniń tańdaýly mergenderi Majar stıli boıynsha saıysty. Bul stıldiń ereksheligi – bir-birine irgesi japsarlas dıametri 90 sm bolatyn úsh nysana qatar qoıylady. Bulardy atpen shaýyp kele jatyp atasyz. Qansha oq jumsaısyz oǵan shekteý joq. Tek oq jiberýge arnalǵan 100 metrlik ólsheminen shyqpasańyz bolǵany. Eń bastysy, attyń shabysy me mergenniń eptiligi úılesim tapqany lázim.
Osylaı tańnan bastap, kún uıasyna qonǵanǵa deıin jalǵasqan bul saıystyń bas mergeni retinde fransýz sportshysy Rafael Malet tanylyp, saıystyń alǵashqy altyn medal ıegeri atansa, ekinshi orynǵa mońǵolııalyq tanymal jamby atýshy Altynhýıag Nergúı turaqtap, kúmis medalǵa qol jetkizdi. Al úshinshi oryn, qola júlde taǵy bir Fransııa elinen kelgen sadaqshy Gaetan Bloge buıyrdy.
Mońǵolııalyq mergen, atústi sadaq atýdan álem chempıony Altynhýıag Nergúı.
Kelesi kúni mergender Azııa stılinen synǵa tústi. Muny halyqaralyq jarystarda «Koreı stıli» dep te aıtady. Bul kúrdeli saıys túrine jatady. Araqashyqtyǵy 30 metr bolatyn sharshy pishindi tórt burysh úsh nysana qoıylady. Onyń birinshisiniń betin batysqa buryp ornalastyrsa, ortańǵy nysana týra qarap turady. Úshinshi nysana ádettegideı birinshi nysanaǵa qarsy, betin shyǵysqa buryp turady. Árbir nysanada oqtyń daryǵanyna qatysty upaı beriletin arnaıy ólshemder bar.
Bul stıldiń bas mergeni retinde otandyq jambyshy Batyr Beksaýyt tanylyp, altyn medalǵa qol jetkizse, ekinshi-úshinshi oryn, ıaǵnı kúmis-qola júldege taǵy da ózimizdiń kánigi mergender Aıtbek Sarybaı men Eralhan Aıkóz ıe boldy.
Jarysty uıymdastyrýshy Jamby atý federasııasynyń atqarýshy dırektory Elnur Isaqulov myrzamen habarlasqanymyzda: «Bul jolǵy kóshpeliler oıynyna álemniń túkpir-túkpirinen kelip qatysyp jatqan jamby atýshy mergenderdiń daıyndyǵy jaqsy. Biraq kópshilik kórermenge aıta ketetin dúnıe – jamby atý ónerinde mergenniń mingen aty aıryqsha ról atqarady, ıaǵnı at júrisiniń jaılylyǵy men týra baǵytta jyldam qozǵalýynyń mergenniń nátıjeli óner kórsetýine yqpaly zor», dedi.
Osy oraıda federasııa ókilderi jarys ádil ótý úshin syrttan keletin mergenderge arnap 100-ge jýyq jamby atyn daıyndaǵan eken. Bul attardy mergender lotereıalyq tásil arqyly tańdap mingen. Iаǵnı «anaǵan jaqsy at buıyrdy, maǵan osal at kez boldy» deıtindeı ókpege oryn joq.
Sózimizdi túıindep aıtar bolsaq, jamby atýshylar 10-11 qyrkúıek kúnderi Túrki jáne qazaqtyń Jamby atý stıli boıynsha ózara myqtylardy anyqtaıtyn bolady. Jarystyń sońynda joǵarydaǵy tórt stıl boıynsha medal ıegeri atanǵan 12 mergen asa qomaqty júlde taǵaıyndalǵan «Taıtuıaq» jambyny atý túsirýden saıysqa qatysady dep kútilip otyr.
