Foto: A.Baıjumanov
Máýlen Áshimbaev áýeli Ý Von Shıkti atalǵan eldiń ulttyq merekesi – Memlekettiń negizi qalanǵan kúnimen quttyqtady. Koreıa Respýblıkasy Qazaqstannyń Azııadaǵy negizgi saıası jáne ekonomıkalyq seriktesteriniń biri ekenin atap ótti.
Kezdesýde eki el arasynda joǵary deńgeıdegi tyǵyz baılanys ornaǵany aıtyldy. Memleket basshylarynyń ózara saparlary Qazaqstan-Koreıa qarym-qatynasyn jańa sapaly kezeńge shyǵarǵany ataldy.
Senat Tóraǵasy Ońtústik Koreıanyń Ulttyq Assambleıasymen yntymaqtastyqty ári qaraı keńeıtý jáne zań shyǵarý baǵytynda tájirıbe almasýdyń mańyzyna nazar aýdardy.
«Biz «Qazaqstan-Koreıa» parlamentaralyq dostyq toby aıasyndaǵy yntymaqtastyqty joǵary baǵalaımyz. Dostyq toby qurylǵan sátten bastap eki eldiń baılanysyn jandandyrýǵa úlken úles qosyp keledi. Aldaǵy ýaqytta biz aqparattyq tehnologııalar, sıfrlandyrý, klımattyń ózgerýine qarsy is-qımyl, jasyl ekonomıkany ilgeriletý, kıberqylmyspen kúres jáne basqa da baǵyttar boıynsha zańnamalyq tájirıbeni zerdeleýge múddelimiz», dedi Senat Spıkeri.
Kezdesý barysynda suhbattasýshylar Álemdik jáne dástúrli dinder lıderleriniń Sezi aıasynda atqarylyp kele jatqan rýhanı dıplomatııany damytý baǵytyndaǵy jumystarǵa da toqtalyp ótti.
Taraptar óńirlik, saýda-ekonomıkalyq jáne ınvestısııalyq yntymaqtastyqqa qatysty máselelerdi de talqylady.
«El óńirleriniń múddelerin qorǵaıtyn Palata retinde biz Ońtústik Koreıanyń aımaqtarymen baılanys ornatýǵa múddelimiz. Sondaı-aq «Ortalyq Azııa – Koreıa Respýblıkasy» formatynda kezdesýler ótkizý bastamasyn qoldaımyz. Kelesi aptada Ashhabadta ótetin Ortalyq Azııa jáne Koreıa Parlamentteri spıkerleriniń ekinshi otyrysynyń nátıjeli bolýyna tilektestigimdi bildiremin. Mundaı bastama ózara is-qımylymyzdy odan ári nyǵaıtýǵa yqpal etedi dep senemin», degen Máýlen Áshimbaev Parlament Senaty aldaǵy ýaqytta da Qazaqstan men Ońtústik Koreıa arasyndaǵy yntymaqtastyqtyń aıasyn odan ári keńeıtýge yqpal etýdi jalǵastyra beretinin aıtty.
О́z kezeginde Ý Von Shık elimizde júrgizilip jatqan reformalardy joǵary baǵalap, eki memleket arasyndaǵy, onyń ishinde parlamentaralyq baǵyttaǵy ózara is-qımyldy damytýdyń mańyzy týraly sóz qozǵady.
Suhbat kezinde Senat Tóraǵasy Qazaqstanda Memleket basshysynyń bastamasymen júzege asyrylyp jatqan áleýmettik-saıası jáne ekonomıkalyq reformalar jóninde aıtyp, Palatanyń zań shyǵarý jumysyna toqtaldy. Bul rette áńgime agroónerkásiptik keshendi damytý sharalary, sıfrlandyrý jáne ınnovasııalardy engizý tásilderi jóninde órbidi.
