Áýejaı habynyń áleýeti

Prezıdenttiń «Áýejaılarymyzdyń júk tasymaldaý múmkindigin arttyrý úshin barlyq jaǵdaıdy jasaý kerek» degen tapsyrmasyn Qaraǵandy áýejaıy kópke sozbady. Bıyl «Saryarqa» áýejaıy bazasynda «CargoHubKaraganda» mýltımodaldy áýe haby qurylady. Budan keler ıgilik – júk tasymaly edáýir ulǵaıyp, halyqaralyq logıstıka múmkindigi artady.

Qaraǵandy áýejaıynyń júk áýe haby retinde áleýeti ájeptáýir. Elimizdegi áýejaılar ishinde júk tasymaldaý boıynsha Almatydan keıingi oryn osy «Saryarqaǵa» tıesili.

«Biz júk ushaqtarynyń tehnıkalyq qonýyna jaǵdaı jasap otyrmyz. Sol ar­qyly operatorlar tartamyz. Ushaqtar osynda qonyp, janarmaı quıady, ekıpajdaryn aýys­tyrady, shaǵyn tehnıkalyq qyzmet kórsetiledi. Júk tasymaldaý salasynda 10 jyl­dan asa jumys istep kelemiz», deıdi «Saryarqa» áýejaıynyń basqarma tóraǵasy Rýslan Ǵabbasov. 

«Saryarqa» áýejaıynyń júk tasymalyna áýeli orna­lasqan orny tıimdi. Ońtústik-shyǵys Azııa elde­ri­nen Eýropaǵa aparatyn eń qysqa jol dál osy Qara­ǵan­dy ústimen ótedi. Júk óńdeý jyldamdyǵy, baǵa arzandyǵy men qyzmet sapa­synyń joǵarylyǵymen de erekshelenedi. Áýejaı búgin­gi kúni Ekvador, Nıder­land, Belgııa, Ońtústik-shyǵys Azııadan elektronıka, avtokólik pen azyq-túlik, basqa da túrli taýar tasıtyn reısterge qyzmet kórsetedi. Munymen qosa, áýejaıǵa Ekvadordan gúl tıelgen 3 reıs, Amsterdamnan 1 reıs, Belgııadan 1 reıs keledi. Halyq tutynatyn taýar jetkizýshi Gonkongten de reıs bar. Apta saıyn Eýropa men Izraılden jetkizilgen 5 tonna ónim óńde­ledi. Ásirese kókónis pen jıdektiń túr-túri bar.

Áýejaı áleýeti artyp, joǵa­ryda atap ótken joba jemisti júzege assa, basqa sala­larǵa da oń serpin berer edi. Atap aıtsaq, júk kóli­gimen tasymaldaý jolǵa qoıylady. Ekıpaj múshe­le­ri aýy­sym kezde aıal­daı­tyn qonaqúı salynady. Sáıkesinshe, áýejaı qyz­met­ker­leriniń jalaqysy ósedi.

Burynyraqta Qaraǵan­dy­da gúl satatyn 200 núkte bar edi. Qazir olardyń sany 700-ge jetti. Buǵan birden bir sebep – áýejaıdyń 2015 jyldan beri gúl qabyldaı bastaýy. Joǵaryda atap ótkenimizdeı, gúl tasıtyn reıs kóp. Bas­tysy, jyldam jetkizedi, baǵa­sy da tıimdi. Áýejaı aýma­ǵynda ornalasqan «Karagandy technical center» JShS qoımaǵa apta saıyn 5 bortpen 400 tonnaǵa deıin gúl qabyldaıdy. Qoıma meńgerýshisi Arman Nur­ma­ǵam­betovtiń aıtýynsha, gúl apta saıyn jáne aıyna eki ret Gonkongten túrli jabdyq keledi.

«Qoımalardaǵy temperatýra rejimi – júktiń saq­ta­lý rejimine qaraı –2 gradýstan +20 gradýsqa deıin. Qoımaǵa kelip túsetin gúlder suryptalady, kedendik tazalaýdan ótip, bir kúnniń ishinde elimizdegi basqa qalalarǵa, TMD elderine jóneltiledi. Jergilikti kásipkerler de gúldi osy jerden alady», deıdi Arman Jarkenuly.

Áýejaıdyń damýy óńir ekonomıkasyna da oń áse­rin beredi. Qazir ınfra­qu­ry­lymdy arttyrýdyń qamyna kirisken.

«Keıingi jyldary ınfra­qu­ry­lym­dy belsendi túrde jetildirip jatyrmyz. Ushý-qoný jolaǵy men jo­laý­­shy ushaqtaryna arnalǵan turaq oryndaryn jóndedik, zamanaýı jab­dyqtar satyp alyp, júkterdi óń­deý jyldamdyǵyn arttyrý maq­sa­tynda bilikti kadrlardy tarttyq. Bul baǵyttaǵy ju­mys­tar áli de jalǵasady», deıdi basqarma tóraǵasy.

Joǵaryda atap ótken joba sátti júzege assa, jylyna óńdeletin júktiń kólemi 15 myń tonnadan 200 myń tonnaǵa deıin ósedi. Bes-alty jyldyń ishinde 2 000-ǵa jýyq jańa jumys orny ashylady. Sáıkesinshe, Ekvadordan tikeleı júk reısterin ashý arqyly halyqaralyq saý­da damıdy. Aptasyna júk ushaqtary 100 reıske deıin kóbeıedi. Ushý-qoný jolaǵyn jóndep, jolaýshylar termınalyn qaıta jańartý, júk termınalyn salyp, mar­shrýt­tyq jelini keńeıtý áýe­jaı múmkindigin eseleı túspek.

Jalpy, «Saryarqa» áýe­jaıy jylyna 320 myńǵa jýyq jolaýshyǵa qyzmet kórsetedi.

Qaraǵandy oblysy