A.Gorodko Sýperfınaldyq tartysta amerıkalyq qarsylasy Rız Chapdelaındy shań qaptyrdy. Munyń aldynda frıstaıl-mogýldan jekeleı saıysta kúmis medal da ıelengen edi. Sańlaq sportshymyz 2022 jyly, byltyr da álem chempıony atanǵan bolatyn.
7 qańtarda bastalǵan álem chempıonaty erteń máresine jetedi. Elimizdiń sańlaqtary Germanııa, Kanada, Qytaı, Fransııa, Shveısarııa, AQSh, Ońtústik Koreıa, Japonııa syndy qysqy sport túrleri qarqyndy damyǵan elderdiń sportshylarymen tartysqa tústi. Jalpy sany 110 sportshy baq synaǵan álem chempıonatynda parallel-mogýldan Anastasııa Gorodko, Iýlııa Feklıstova, Anastasııa Larıonova, Vıktorııa Kýznesova, Iýlııa Mokına, Semıon Rýsakov, Ilnar Ibragımov, Danıl Korotkov, Alekseı Denııarıov, Denıs Rastrýba synǵa tústi. Al shańǵy akrobatıkasynan Dinmuhammed Raıymqul, Ardana Mahanova, Raıana Mahanova, Asan Asylhan, Roman Pogosıan, Ulanbákir О́mirzaqov, Adelına О́mirzaqova el úmitin arqalady.
Jasóspirimder arasynda frıstaıldan álem chempıonaty 1986 jyldan beri Halyqaralyq shańǵy federasııasynyń (FIS) qoldaýymen turaqty uıymdastyrylyp keledi. Elimizde jasóspirimder arasyndaǵy álemdik alaman tuńǵysh ret ótkizildi.
Quramanyń aǵa bapkeri Dmıtrıı Reıherd 1 altyn, 1 kúmis medal oljalaǵan Anastasııa Gorodkonyń eńbegin joǵary baǵalady. «Biz «Shymbulaq» taý shańǵy kýrortynda ázirlik ótkizdik. Anastasııanyń eren jeńisi bapkerler ujymynyń ortaq tabysy», degen jattyqtyrýshy shákirtteri budan keıin de baıraqty dodalarda olja salatynyna senim artatynyn jetkizdi.
Keshe Denıs Rastrýba men Iýlııa Fıklıstova juptyq frıstaıl-mogýldan álem chempıonatynyń kúmis júldesin oljalady. Juptyq tartysta Qazaqstan-2 komandasy (Denıs Rastrýba, Iýlııa Fıklıstova) fınalǵa jetip, 28 upaı jınady. Álem chempıonatynyń altyn medalin AQSh-2 quramasy ıelense, qola medaldy taǵy bir amerıkalyq jup enshiledi.
