Aıtýly saıysty «Qazaq kuresi» qaýymdastyǵy uıymdastyryp, «Dala qyrandary» sportty qoldaý ulttyq qory demeýshilik etti. Jaqsylyq Úshkempirov atyndaǵy jekpe-jek saraıyndaǵy saıysty 55 kg salmaq dárejesindegi balýandar bastady. Qazaq kúresinen byltyr álem chempıony atanǵan qyzylordalyq Rýslan Temirjan fınaldyq tartysta qostanaılyq Arhat Baımýrzınmen baq synasty. Ekeýi fınalǵa shyǵar jolda nebir tegeýrindi qarsylastaryn utty. Fınaldyq beldesý de asa tartysty ótti. Aldymen Rýslan ábjildik tanytyp, jartylaı jeńis upaıymen alǵa shyqqan. Arhat negizgi ýaqyttyń bitýine 2 sekýnd qalǵanda qarsylasyn alyp uryp, tarazy basyn teńestirdi. Odan keıingi qoıan-qoltyq beldesýde 20 jastaǵy balýan ózin ózi jyǵyp bergendeı kórindi. Rýslandy qapsyra qysyp, keýdesinen asyra laqtyrýǵa áreket etip edi, ońaı berile salatyn Rýslan ba, bar salmaǵyn sala basyp qalyp jeńiske jetti.
60 kg salmaqta Aqtóbelik Nurlyhan Muhanbetov fınaldyq tartysta Ulytaý oblysynyń balýany Nurtilek Qarakesekovti aıqyn utty. 66 kg salmaq dárejesinde astanalyq Erjan Eranǵaıypov Soltústik Qazaqstan oblysynyń balýany Nurǵalı Tursynǵazıevti jeńdi. 32 jastaǵy Erjan áli de babynda ekenin baıqatty.
74 kg salmaqta Aqtóbe oblysynyń ókili Bıbarys Turǵanbekuly jetisýlyq Armat Esqazıevten basym túsip, chempıondyq belbeýdi ıelendi. 22 jastaǵy balýan ózinen bes jas úlkendigi bar tájirıbeli qarsylasynan qaımyqpaı, jeńisti julyp aldy. 82 kg salmaqta shymkenttik Nurdáýlet Baqtybaıuly Abaı oblysynyń balýany Ersin Seıitqazynovty jeńse, 90 kg salmaq dárejesinde Almaty qalasynyń balýany Erasyl Jańataev qyzylordalyq Serik Aqylbekti aıqyn utty.
Tartysty beldesýler 100, 100 kg-dan aýyr salmaq dárejesinde ótti. 100 kg salmaqta fınalǵa deıingi qarsylastaryn erkin eńsergen shymkenttik Ersultan Muzapparov qaraǵandylyq Erǵanat Moldaǵulovpen negizgi ýaqytta ıtjyǵys túsip, qoıan-qoltyq beldesýde jeńiske jetti. О́zinen boıshań qarsylasyn tik kóterip aldy da, qyrqa shalyp aýdaryp tastady. Enshisinde álem chempıony ataǵy, «Qazaqstan barysy» respýblıkalyq týrnıriniń kúmis belbeýi bar Ersultan osylaısha óziniń myqtylyǵyn taǵy bir pash etti.
Asa aýyr salmaqta (+100 kg) qalyń kórermen byltyr «Qazaqstan barysy» respýblıkalyq týrnıriniń chempıony atanǵan Abaı oblysynyń balýany Erasyl Qajybaevtyń baǵy janatynyna shák keltirmeı, senim artqan edi. Biraq Erasyl alǵashqy aınalymda-aq súrindi, Túrkistan oblysynyń balýany Qaısar Shamshıdınovten asa almady. Qaısar qarymdy ekenin ár beldesýinde dáleldedi. О́zinen salmaǵy edáýir aýyr qarsylastaryn aıqyn jeńdi. Fınalda mańǵystaýlyq Nurdáýlet Jarylǵapovpen joly túıisti. Qos alyp negizgi ýaqytta yrǵasyp júrdi de, bir-biriniń sheńgeline iline qoımady. Kilemdegi tóreshi qoıan-qoltyq beldesýge shaqyrdy. Buǵan deıin eki qarsylasyn dál osy qoıan-qoltyq beldesýde shóge túsip aýdaryp tastaǵan edi. Fınalda da dál osy tásilin qoldanýǵa umtylǵanymen, Qaısar tabandylyq tanytyp, berilmedi. Urymtal sátte ózi ádis jasap, aýyr qarsylasyn alyp urdy.
«Qazaq kuresi» qaýymdastyǵynyń bas dırektory Damır Bekbosynov ulttyq kúrestiń qanaty keńge jaıylyp, ózge elderde de damýy jolynda aýqymdy jumys atqarylatynyn atap ótti. Elimizde tól ónerge qyzyǵýshy jastardyń qatary artyp keletinin jetkizdi. «Dala qyrandary» respýblıkalyq týrnırine irikteýden ótip qatysqan ár balýannyń tegeýrindi ekenin aıtty. Jetkinshek órenderdiń ulttyq sportqa yntasyn oıatyp, qyzyǵýshylyǵyn arttyrýda mundaı dodalardyń mańyzy joǵary ekenine erekshe toqtaldy.
Qazaq kúresinen ulttyq quramanyń bas bapkeri Ǵanı Keldiqulov týrnır jańa esimderdiń jarqyrap shyǵatyn dodasy ekenin málim ete kelip: «Jýyrda ǵana qazaq kúresinen el chempıonaty máresine jetti. Sol tartysta jas balýandar top jaryp, ózderiniń qarymyn baıqatty. Astana tórinde ótken «Dala qyrandary» saıysynda da jańa esimder tanyldy. Munyń barlyǵy básekelestiktiń joǵary ekenin aıqyndaı túsedi. Ár salmaqta segiz balýan ǵana beldesýge múmkindik alatyn tartystyń bási de, básekesi de joǵary. Jeńimpazǵa ǵana 5 mıllıon teńge men belbeý beriletindikten, árbir balýan baryn salyp kúresti. Baby kelisip, baǵy janǵan sańlaqtar top jardy», dedi.
Týrnır birneshe jyldan beri turaqty uıymdastyrylyp keledi. Báıgesi qomaqty báseke joǵary deńgeıde uıymdastyryldy. Taǵy bir kóńil qýanarlyq kórinis, olımpıadalyq sport túrleriniń sańlaqtary, Olımpıada, álem chempıondary uzaqty kún ulttyq kúresti ulyqtap, balýandarǵa jankúıerlik tanytty. Rıo jazǵy Olımpıadasynyń chempıony Danııar Eleýsinov, álem chempıony Mereı Aqshalov, London jazǵy Olımpıadasynyń qola júldegeri Aqjúrek Tańatarov, Parıj jazǵy Olımpıadasynyń qola júldegeri Ǵusman Qyrǵyzbaev, álem chempıonatynyń birneshe dúrkin júldegeri Almat Kebisbaev syndy sańlaqtar qatysýshylarǵa qoldaý kórsetti.
