Frıstaıl-mogýldan synǵa túsken sańlaq irikteý kezeńinde 77,19 upaımen kósh basyna shyqqan. Aıaýlym Ámirenova 3-satyǵa ornyqty. Fınaldyq básekedegi múmkindiginde de Anastasııa Gorodko óziniń tegeýrindi ekenin tanytyp, 79,79 upaı oljalap kósh bastady. Kúmis medal 76,29 upaı ıelengen japon qyzy Harýko Nakaoǵa, qola medal 75,05 upaı jıǵan nemis qyzy Hanna Ýıske buıyrdy. О́kinishke qaraı irikteý kezinde sátti óner kórsetken Aıaýlym qorytyndyda 5-oryndy mise tutty.
Anastasııa jýyrda ǵana «Shymbulaq» taý shańǵy kýrortynda ótken jasóspirimder arasyndaǵy álem chempıonatynda da top jarǵan bolatyn. «Jahandyq jarystan keıingi qysqa ýaqyt ishinde qaıta kúsh jınap, babyma endim. Ýnıversıada oıyndarynan medal oljalasam dep keldim, jekeleı synda maqsatyma jettim, alda – juptyq saıys, sol dodada da Ánuranymyzdy shyrqatsam deımin. Týrındegi taý silemindegi jarys joly óte jaıly, qolaıly boldy. Aldaǵy álem kýboginiń kezeńinde, AQSh-ta, Kanadada ótetin ǵalamdyq saıysta da jeńiske jetkim keledi. Kelesi jyly osy Italııa eli qysqy Olımpıada dodasyn ótkizedi, sol tórtjyldyq alamanynda da chempıon atanǵym keledi», dedi A.Gorodko.
Qysqy Ýnıversıada dodasynda 57 elden 2000-ǵa tarta stýdent sportshylar baq synap jatyr. Olar 11 sport túrinen 96 medal jıyntyǵyn bóliske salady. Týrın topyraǵyndaǵy qysqy sport dodasy 23 qańtarda máresine jetedi.
Qysqy Ýnıversıadanyń kezekti medaldaryn enshimizge shańǵyshylar Denıs Zınov pen Roman Qurbanov saldy. Parashańǵyshylar arasynda 10 shaqyrymǵa jarysýda jerlesterimizge kúmis pen qola medal buıyrdy. Denıs qysqy Ýnıversıadanyń kúmis, Roman qola júldegeri atandy.
Týrındegi tartysta hokkeıden erler komandasy birinshi oıynda Shvesııa hokkeıshilerin 9:2 esebimen oısyrata utqan edi. Irikteý kezeńindegi ekinshi aıqasty Ońtústik Koreıa komandasyna qarsy ótkizip, 7:1 nátıjesimen aıqyn utty. A tobynda tartysqa túsip jatqan jigitter endi Kanada hokkeıshilerine qarsy aıdynǵa shyǵady.
О́kinishke qaraı, qyzdar komandasy jeńilisten kóz ashar emes. Irikteý kezeńinde aldymen Japonııa qyzdaryna 10:0 esebimen jol berse, ekinshi aınalymda Chehııa komandasyna 1:11 esebimen oısyraı jeńildi.
