Nıkıtanyń altyny

Shańǵyshylarymyz bı-a­tlonnan sprınttik saıysta olja saldy. Erler dodasynda 10 shaqyrymdyq qashyqtyqty 23 mınýt 14 sekýndta óndirgen jerlesimiz Nıkıta Akımov dúbirli dodanyń chempıony atandy. 49 sportshynyń arasynan qara úzip shyqqan sańlaq nysanany kózdeı atýdyń eki kezeńinde de barlyq múmkindigin múlt jibermeı dóp tıgizdi.

Altyn medal – Nıkıtanyń aıtýly alamandaǵy súbeli tabysy. Elimizdiń bıatlonnan eresekter quramasyna ótkenine kóp bola qoımaǵan saıypqyran qatysýshylar arasynda tegeýrindi básekelesteri kóp bolǵanyn aıtty. «Biz, otandasym Polına Egorova ekeýimiz sprınttik saıystyń aldynda mıks-estafeta dodasynda (erler 7,5 shaqyrym, áıel­der 6 shaqyrym) 4-oryndy mise tuttyq. Qola júlde oljalaýǵa múm­kindik týyp, tartysqa túskende kúshi­mizdi sarqyp aldyq. Medal buıyr­maǵany eńsemdi túsirip-aq jibe­rip edi. Búgingi 10 shaqyrymdyq saıys­tyń ekinshi aınalymyna kelgende taǵy da júldesiz qalam ba degen qo­baljý boldy. Biraq barymdy salyp, nysanany kózdep atýda da qate­lespeı dóp tıgizdim. Jahandyq dodanyń altyn medalin elimizge tar­tý etkenime qýanyshtymyn», dedi N.Akımov.

Qysqy Ýnıversıadanyń kezekti medalin qanjyǵamyzǵa bıatlonnyń sprınt saıysynan Arına Krıýkova baılady. 7,5 shaqyrymdy ol 23 mınýt 17 sekýndta óndirdi. Jerlesimiz nysana kózdeýdiń birinshi syny, jer baýyrlap jatyp nysanany kózdeýde barlyq múmkindigin dóp tıgizse, ekinshi tik turyp kezenýde eki múmkindigin múlt jiberip aldy. Degenmen de ýaqytty utymdy paıdalana otyryp, jyldamdyǵyn údetip, qola júldeger atandy. Arına da sporttyq mansabyndaǵy alǵashqy medalin oljalady.

Dúnıejúzilik qysqy Ýnıversıada oıyndarynda parashańǵydan Denıs Zınov 1 400 metrge sprınttik saıys­ta kúmis medal enshiledi. Ol buǵan deıin 10 shaqyrymǵa erkin stılde tartysqa túsip te kúmis júlde alǵan edi. Qazaq sport jáne týrızm akademııasynyń stýdenti keleshekte Paralımpıadanyń chempıony atanýǵa baryn salatynyn jetkizdi. «Qysqy Ýnıversıadanyń baǵ­darlamasyna parashańǵy saıy­sy alǵash ret qosyldy. Soǵan qara­mastan básekelestik óte joǵary. Bapkerlerdiń eńbegi aqtaldy, degenmen ókinishim de joq emes, eki medalimniń biri altyn bolǵanda, shirkin... Keleshekte Paralımpıada saıysynda jeńiske jetýge barymdy salamyn. Týrındegi tartys bizge óte aýyr soqty. Sebebi taýly óńirge tabanymyz tıgennen klımatqa úırenisý ońaı bolmady. Soǵan qaramastan barymyzdy saldyq», dedi sportshy. Kolledjde oqyp júrgende aıaǵyna shańǵy ilgen sportshy 7 jylda osyndaı bıikke qol jetkizip otyr.

Parashańǵydan 1 400 metr qashyq­tyqta (sprınt) Qostanaı kolledjiniń stýdenti Roman Qurbanov qola júlde enshiledi.