Aıdyndaǵy tartysta altyn buıyrdy
Oleg Bolıakın baptaıtyn elimizdiń erler quramasy fınalda Japonııa hokkeıshilerin 5–0 esebimen oısyrata utty. Andreı
Býıalskıı 17-mınýtta esep ashsa, Dmıtrıı Breýs 21-mınýtta ekinshi shaıbany soqty. 37-mınýtta Roman Starchenko, Kırıll Panıýkov 42, 44-mınýttarda nátıjeni eseledi.
– Biz Qytaıǵa júrerde altyn medal oljalaımyz dep ýáde berdik. Jigitterdiń oıyn júıesinde eshqandaı qatelik ketken joq. Fınaldyq tartysta Azııa qurlyǵynyń azýly quramasy sanalatyn Japonııa hokkeıshilerin iri eseppen jeńdik. Oıyn yrǵaǵy qurǵan josparǵa saı órbidi. Jigitterge shabýyldy údetip, tópelep soqqy baǵyttaý mindeti júkteldi. Qysqy Azııa oıyndarynyń fınalyna ońaı qurama shyqpaıtyny belgili. Sondyqtan da qarsylastyń qorǵanysyn buzyp, shaıba soǵý jeńil tıgen joq. Eń bastysy – senim aqtaldy, – dedi bas bapker O.Bolıakın.
Qytaıdaǵy doda bastalǵanda-aq bizdiń hokkeıshilerdiń altynnan úmitker ekenine eshkim shúbá keltirgen joq. Toptyq kezeńde Qytaı quramasyn 6-1 esebimen utty, odan keıin Japonııa, Taıpeı, Ońtústik Koreıa quramalaryn yǵystyrdy. Shırek fınaldyq tartysta Gonkong, jartylaı fınalda Qytaı hokkeıshilerin jeńdi. Roman Starchenko men Kırıll Panıýkov qysqy Azııa oıyndarynyń mergeni atanyp, aıdyn ústindegi oıynda 9 shaıbadan toǵytty. Qola medaldy Ońtústik Koreıa hokkeıshileri ıelendi.
Áıelder quramasy Azııa oıyndarynyń kúmis júldesin enshiledi. Sheshýshi synda Ońtústik Koreıa quramasyn 3:0 esebimen jeńdi. Malıka Aldabergenova, Iýlııa Býtorına, Darııa Moldabaı shaıba soqty. Aldyńǵy oıyndarda qyzdarymyz Gonkong quramasyn 12-0, Taıland hokkeıshilerin 9-0, Qytaıdyń Taıpeı komandasyn 5-1, Ońtústik Koreıany 1-0 esebimen jeńdi. Tek Japonııa quramasyna 0-4 esebimen ese jiberdi. Qysqy Azııa oıyndarynda áıelder quramasy buǵan deıin 3 márte chempıon atandy, 3 ret qola medal ıelendi.
Kúmis pen qolany qanaǵat tutty
Mánerlep syrǵanaýdan Mıhaıl Shaıdarov qysqa jattyǵýda 76,75 upaı, erkin baǵdarlamada 169,26 upaı, qossaıys qorytyndysynda 246,1 upaı jınap, qola júldeger atandy. Taǵy bir sportshymyz Dıas Jırenbaev 186,18 upaımen 9-oryndy mise tutty. Áıelder arasyndaǵy dodada Sofıa Samodelkına 4-oryn alsa, Sofııa Farafonova 10-orynǵa turaqtady.
Qytaıǵa altyn medal oljalap, chempıon atanýdy kózdep kelgenin jasyrmaǵan M.Shaıdarov qateleskenine ókinish bildirdi.
– Erkin baǵdarlamaǵa jańa elementterdi engizdik. Dene qyzýym kóterilip aıdynǵa syrqattanyp shyqtym. Elementterdi sátti oryndaǵanymmen, muzǵa qonýda qatelestim. Buǵan deıin bul áýenniń yrǵaǵymen syrǵanap kórgenim joq. Sonyń da áseri shyǵar. Álemde tek ózim ǵana oryndaı alatyn kaskadtyq elementim bar edi. Sony kórsete almadym, – dedi sportshy.
Álem chempıonatynyń kúmis júldegeri, Ońtústik Koreıa sportshysy Chha Jýnhvan altyn alsa, álem birinshiliginde úsh márte kúmis medal enshilegen Japonııanyń úmiti Iýma Kagaıamanyń ónerin qazylar kúmis medalǵa laıyq dep baǵalady.
Bıatlonnan erler quramasyna Azııadanyń kúmis medali buıyrdy. Áset Dúısenov, Aleksandr Mýhın, Kırıll Baýer, Vladıslav Kıreev tórttigi estafetalyq saıysta tek japon sportshylaryna ese jiberdi. Qola medaldy Qytaı quramasy oljalady.
Áıelder arasyndaǵy synda sportshylarymyz qola júldeni enshiledi. Olga Poltoranına, Arına Krıýkova, Darıa Klımına, Elızaveta Beleskaıa tórttigi Qytaı, Ońtústik Koreıa quramalaryna ese jiberdi.
