Kezdesýge QHR Almatydaǵy bas konsýly Szıan Veı, ǵylym jáne bilim jónindegi konsýl Chjan Veı, ǵylymı zertteý ortalyqtarynyń jetekshileri, ǵalymdar qatysty.
Eki el ǵalymdary Chjeszıan tehnologııalyq ýnıversıteti, QHR joǵary tehnologııalyq kompanııalar tobymen birlesip ashylǵan «Qazaqstan-Qytaı ǵylym jáne tehnologııany transferleý ortalyǵynyń» jumysymen tanysyp, aýyl sharýashylyǵy ónimderiniń ónimdiligin arttyrý, sýdy únemdeý tehnologııalaryn damytýǵa baılanysty jobalardy talqylady.
Taraptar munymen qosa Chjeszıan tehnologııalyq ýnıversıtetimen kelisimge oraı ashylatyn «Keńistiktik-ýaqyttyq jasandy ıntellekt jáne turaqty damý jónindegi halyqaralyq birlesken zerthananyń» jobasymen tanysyp, jasandy ıntellekt jáne geoaqparattyq júıeler tehnologııalaryn qoldaný arqyly sý resýrstaryn monıtorıng jasaý, tabıǵat apattarynyń aldyn alý, aýyl sharýashylyǵyn sıfrlandyrý jáne «aqyldy eginshilik» tehnologııalaryn engizýdiń ózektiligin atap ótti.
Han Chýnlın myrza Qytaı agrarlyq ýnıversıteti men «Dayu Irrigation Group» kompanııasymen birlesip qurylǵan «Qurǵaq aımaqtarda sýdy tıimdi paıdalaný boıynsha Qazaqstan-Qytaı halyqaralyq zerthanasynyń», Lanjoý ýnıversıtetimen birlesip ashylǵan «Aqyldy aýyl sharýashylyǵy ortalyǵynyń» jumystarymen de tanysty.
Qazaqstan ǵalymdary keıingi eki jyldyń ishinde Qytaıdyń ǵalymdary jáne kompanııalarymen birlesip, birneshe ortalyq, zerthana ashty. Sonyń biri – Qytaı aýylsharýashylyq ýnıversıteti jáne «Eavision» kompanııasymen birlesken Qazaqstan-Qytaı aýylsharýashylyq drondaryn basqarý boıynsha zertteýler men oqytý ortalyǵy.
UǴA prezıdenti A.Kúrishbaev bul bastamalardyń bolashaqta agrosalany damytyp, sý resýrstaryn basqarý jáne birlesken ǵylymı zertteýler júrgizýge, jańa tehnologııalar transfertin júzege asyrýǵa, básekege qabiletti mamandardy birlese daıarlaýǵa múmkindik beretinin atap ótti.
О́z kezeginde QHR elshisi Han Chýnlın myrza eki el arasyndaǵy yntymaqtastyqty damytýdaǵy oń nyshandarǵa toqtalyp, ǵylym-bilim berý ortalyqtary arasyndaǵy baılanystardy tereńdetý, Qytaı tehnologııasyn Qazaqstanǵa engizý arqyly aýyl, sý sharýashylyǵyn damytý, ekologııalyq taza ónim alýǵa qatysty jobalardyń iske asatyndyǵyna senim bildirdi.
Kezdesý barysynda Chjeszıan tehnologııalyq ýnıversıtetimen jasandy ıntellekt salasyndaǵy kadrlardy daıarlaý jónindegi Halyqaralyq ınstıtýtyn ashý máselesi talqylandy.
ALMATY
