Maqalada mynadaı joldar bar: «Bul kórme Qazaqstan tarıhyn jańa qyrynan tanystyryp, onyń tek kóshpeliler mekeni emes, sanǵasyrlyq órkenıetterdiń toǵysqan ortalyǵy ekenin dáleldeıdi. Qazaq dalasynyń jahandyq tarıhtaǵy orny, mádenıetiniń kópqabatty beınesi, sondaı-aq onyń álemdik órkenıetke qosqan úlesi eýropalyqtarǵa tyń serpin berýde. Gıme mýzeıindegi bul erekshe kórme Qazaqstan týraly az biletin, biraq ony tereńirek túsingisi keletin jandar úshin taptyrmas múmkindik», delingen.
Kórme keń aýqymdy aqparat berip qana qoımaı, kózdiń jaýyn alatyn bes biregeı jádigerden turady. Olar b.d.d. III myńjyldyqtan bastap XVIII ǵasyrǵa deıingi kezeńderdi qamtıdy.
Áýeli kóne dáýirdiń beınesi – Antropomorftyq músin jáne saq jaýyngeriniń altynmen aptalǵan zattary qoıylǵan. Bul jádigerler – Eýrazııa tósinde ómir súrgen saqtar mádenıetiniń kórinisi.
Orta ǵasyrdan syr shertetin VI-XI ǵasyrlarǵa tıesili balbal tastardyń jóni bólek. Túrki dáýirinde jasalǵan bul músinder Qazaqstannyń sol kezeńdegi taıpalyq konfederasııalaryn beıneleıdi. Al XIV ǵasyrdaǵy ataqty bıleýshi Ámir Temir dáýirinen qalǵan qola shamdar Túrkistandaǵy Qoja Ahmet Iаsaýı kesenesi arqyly kóne tarıh qoınaýyna úńildiredi.
Shyńǵys han urpaqtarynyń bıligi – XV-XVIII ǵasyrlardaǵy Qazaq handyǵynyń negizi qalanǵan kezeńdi beıneleıtin jádigerler. Bul dáýir qazaq halqynyń mádenı jáne etnostyq birligi qalyptasqan ýaqyt turǵysynda sıpat tapqan. Sondaı-aq XVIII ǵasyrdan bastap Qazaqstan Reseı ımperııasynyń quramyna engen kezeńdi sıpattaıtyn jádigerler bar. Álgi maqalada taǵy da: «Azııanyń júreginde ornalasqan, alyp dalalarymen erekshelenetin bul el óziniń mádenı jáne tarıhı murasymen tańǵaldyrýdan jalyqqan emes. Osy joly Qazaqstannyń ótkeni men órkenıeti Parıjdegi áıgili Gıme mýzeıinde usynylyp, eýropalyq kórermenderdi tańǵaldyrýda», delingen.
