Sýret: prosports.kz
Osy maqsatta Beıjiń Olımpıadasynyń (2008) chempıony Baqyt Sársekbaev Vetnamda bapker bolyp júrgen jerinen elimizge arnaıy shaqyrtyldy. Hanoı qalasynyń quramasynda keńesshi-bapker bolyp qyzmet etip, osy eldiń chempıonatynda hanoılyq boksshylardyń jeńiske jetýine septigin tıgizgen jampozǵa Týrızm jáne sport mınıstrligi ulttyq qurama janynan rezervtik komanda jasaqtaýdy júktep otyr. Taldyqorǵan tórine qurylǵan rıngte talantymen daralanǵan sańlaqtardan komanda jasaqtaıtyn bapker jattyǵýdy endi bastamaq.
– Bul joba buǵan deıin de iske qosylyp, óz nátıjesin de bergen edi. Biraq ǵumyry kelte boldy. Tájirıbe úlgisindegi komandany 1,5 jyldaı ǵana baptadyq. Álem chempıony Jánibek Álimhanuly, álem birinshiliginiń kúmis júldegeri Tursynbaı Qulahmet, stýdentter arasynda álem chempıony Nurzat Sabyrov syndy talanttar biz jasaqtaǵan komanda sapynan shyqty. Sol úrdisti qaıta jalǵastyrýdyń mańyzy joǵary. Sebebi ár salmaq dárejesinde birinshi nómirli boksshyǵa básekeles bolatyn bes-alty qarsylasy júrýi kerek. Ulttyq quramanyń byltyrǵy Parıj Olımpıadasynda, jazǵy Azııa oıyndaryndaǵy shyqqan bıigi belgili. Boksshylardyń bulaı álsireýi – básekelestiktiń joqtyǵy. О́z salmaǵynda básekeles bolmasa sportshy óspeıdi, – dedi Baqyt Sársekbaev.
Belgili bylǵary qolǵap sheberi ulttyq qurama sapynda júrgende Baqtııar Artaev, Serik Sápıev, Gennadıı Golovkın, Serik Eleýov, Qanat Ábýtálipov, Meıirjan Rahymjanov, Galıb Jafarov syndy kil myqtylarmen ıyqtasa júrip shyńdalǵanyn atap ótti, ulttyq quramaǵa qabyldanǵan ár boksshy tek nátıjege jetý jolynda tynbaı eńbektenýi qajet ekenin basa aıtty.
– Biz jastar arasyndaǵy el birinshiligin ár aımaqtan jınalǵan boksshylardyń arasynan daryndylardy irikteý maqsatynda uıymdastyrdyq. «Meniń balamdy qabyldaısyń ba, mynaý meniń shákirtim edi» dep qıyla habarlasqandar da jeterlik. Biz ondaı keleńsizdikke bara almaımyz. Bári ashyq, ádil bolýy kerek, shyn talanttyń baǵyn ashyp, juldyzyn jaǵý – muratymyz. О́ıtkeni ózim de kezinde Olımpıadanyń altyn medalin jeńip alǵanǵa deıin talaı «tar jol, taıǵaq keshýdi» bastan ótkerdim. Ulttyq qurama sapyna qabyldanǵan soń aıanbaı eńbektendik. Qazirgi jastardan da sony talap etemin. Talanty tas jaratyn boksshylar bar, olardy shyńdaýda orasan jumys atqarý kerek. О́kinishtisi, qazaq boks mektebi keıingi 10-15 jylda qatty ózgerdi, – deıdi Olımpıada chempıony.
Bir aptaǵa sozylǵan jastar arasyndaǵy el chempıonaty barysynda rezerv daıarlaý mindetin arqalaǵan Baqyt Sársekbaev 240-qa jýyq jastyń arasynan kil myqtylar iriktelgenin jetkizdi. Osy boksshylardy baptap aldymen Shrı-Lankada ótetin Azııa chempıonatyna qatystyryp kórmek. Qaı boksshyny qurlyq dodasyna qosatynyn oqý-jattyǵý jıynynan keıin naqtylaıtynyn aıtty. Bapkerlik quramda Vladımır Kım, Nurlan Aıtýarov, Ermek Ertaev, Qanat Ábýtálipov syndy bilikti mamandar bar.
1996 jyldan 2016 jylǵa deıingi aralyqta boksshylar jazǵy Olımpııa oıyndarynan altyn medalsyz qaıtqan emes. Tek 2021 jyly Tokıoda, byltyr Parıjde altyn medal buıyrmady. 2028 jyly Los-Andjeleste ótetin jazǵy Olımpıadada sańlaqtardyń jetistigi bapkerlerdiń deńgeıine ólshem bolmaq.
