2023 jyly qarashada Fılıppın astanasy Manılada Azııa birinshiligi ótti. 76 jastaǵy Ámegúlsin áje birneshe qashyqtyqta ozyq shyǵyp, el mereıin asyrdy. Marafonshy ájeı tegis jolda ǵana emes, taýda júgirýden de baıraqty dodalarǵa qatysty. Ámegúlsin áje 8 jyldyń ishinde 6 elge tabany tıip, elimizdegi, sheteldegi saıystardy qosqanda 121 marafonda baǵyn synady.
Qııada: Everesti eńsergen Anar
Byltyr 12 mamyrda jerlesimiz Anar Burasheva Jer sharynyń eń bıik shyńy Everestke shyǵyp, qazaq qyzdary arasynan álemniń eń bıik núktesine taban tiregen tuńǵysh alpınıst atandy. Alpınızmdi turaqty ómir saltyna aınaldyrǵan Anar jýyrda taǵy bir shyńǵa kóterildi. Argentınaǵa tıesili Akonkagýa shyńyna da qazaq qyzynyń tabany tıdi. Teńiz deńgeıinen 6962 metr bıiktegi shyń ońtústik Amerıkanyń eń bıik núktesi sanalady. Quramynda A.Burasheva bar ekspedısııa Akonkagýa shyńyna shyǵý saparyn 21 kúnge josparlaǵanymen, 14 kúnde eńserdi.
Anardyń endigi mejesi – Soltústik Amerıkadaǵy Mak-Kınlı taýy. Osy kók tiregen aspantaýdyń Denalı shyńyna shyǵýdy maqsat etip otyr.
Sýda: Antarktıdany júzip ótken Ánel
Ánel Sytdyqova TMD memleketteri arasynda Antarktıdany júzip ótken tuńǵysh názik jandy atandy. 750 metr qashyqtyqty 19+ mınýtta júzip ótý úshin qolaıly aýa raıyn 10 kún kútti. Trıatlon sportynan tuńǵysh bolyp «Qazaqstannyń temir hanymy» atanǵan Ánel Antarktıdany júzip ótýge bel býyp, zor táýekelmen maqsatyn oryndady.
Ánel birneshe jyl buryn Fransııanyń soltústiginen Brıtan araldarynyń ońtústik-shyǵysyn jalǵaǵan La-Mansh buǵazyn júzip ótip, tańdaı qaqtyrǵan bolatyn. 34 shaqyrym qashyqtyqty 15 saǵat 15 mınýtta gıdrokostıým kımeı-aq júzip ótýi – tańǵajaıyp nátıje.
